Read Diospa Simin Qelqa SALMOS 118 Bible Online

SALMOS 118 - Diospa Simin Qelqa bible

SALMOS 118

¹Señor Diosman graciasta qoychis, payqa allinmi, munakuyninqa wiñaypaqmi.

²Israel runakuna nichunku: Señor Diospa munakuyninqa wiñaypaqmi, nispa.

³Aarón ayllu nichunku: Señor Diospa munakuyninqa wiñaypaqmi, nispa.

⁴Señor Diosta manchakuqkuna nichunku: Señor Diospa munakuyninqa wiñaypaqmi, nispa.

⁵Llaki ñit'iwaqtinmi Señor Diosta waqyakurqani, paytaq uyarimuwarqan, hinaspan kacharichiwarqan.

⁶Señor Diosqa ñoqawanmi kashan, manan manchakunichu. ¿Imanawanmantaq runari?

⁷Señor Diosqa ñoqawanmi kashan, paymi yanapaykuwan, cheqnikuwaqniykunataqa atipasqatan rikusaq.

⁸Señor Diosman hap'ipaykukuymi aswan allinqa runaman hap'ipakuymantaqa.

⁹Señor Diosman hap'ipaykukuymi aswan allinqa umallikunaman hap'ipakuymantaqa.

¹⁰Llapa suyukunan muyuykuwarqan, ichaqa Señor Diospa sutinpin chaykunata atiparqani.

¹¹Tukuyneqmantan muyuykuwarqanku, ichaqa Señor Diospa sutinpin chaykunata atiparqani.

¹²Wanqoyrukuna hinan muyuykuwarqanku, ichaqa khiska rawray hinallan tukukapurqanku, Señor Diospa sutinpin chaykunata atiparqani.

¹³Paykunan tanqarpariwarqanku, ñoqataq urmasharqaniña, Señor Diostaq yanapaykuwarqan.

¹⁴Señor Diosmi kallpachaqniypas amachaqniypas, paymi qespichikuwarqan.

¹⁵Chanin runakunaq karpankunapiqa Diospa yanapasqan atipaqkunan kusisqa takishanku: ¡Señor Diospa kallpanqa atipanmi!

¹⁶¡Señor Diosqa kallpasapallañan! ¡Señor Diospa kallpanqa atipanmi! nispa.

¹⁷Manapunin wañusaqchu, aswanpas kawsasaqmi Señor Diospa ruwasqankunata willanaypaq.

¹⁸Anchatapunin Señor Diosqa muchuchiwarqan, ichaqa manan wañunayta munarqanchu.

¹⁹Atipaqkunaq haykunan punkukunata kicharipuwaychis. Chay punkunkunatan haykusaq, Señor Diostan yupaychasaq.

²⁰Kaymi Señor Diospa punkun, atipaqkunaqa chayninta haykuchunku.

²¹Señor Diosníy, uyariwasqaykiraykun yupaychayki, qespichiqniy kasqaykiraykun yupaychayki.

²²Wasi perqaqkunaq wikch'usqan rumin esquina hap'iq kapun.

²³Chayqa Señor Diospa ruwasqanmi, musphaspataq qhawashanchis.

²⁴Kay p'unchaymi Señor Diospa atipasqan p'unchay, paywan kusikusunchis q'ochukusunchis.

²⁵Señorniyku, rogakuykikun qespichiwanaykikupaq, Diosniyku mañakuykikun t'ikarichiwanaykikupaq.

²⁶¡Saminchasqan Señor Diospa sutinpi hamuqqa! Señor Diospa wasinmantapachan qankunata saminchamuykiku.

²⁷Señorqa Diosmi, paymi k'anchaykuwarqanchis. K'allma hap'intinkama fiesta ruwayta qallariychis, altar waqrakunaq kasqankama riychis.

²⁸Qanqa Diosmi kanki, graciastan qoyki, Diosníy, hatunchamuykin.

²⁹Señor Diosman graciasta qoychis, payqa allinmi, ¡munakuyninqa wiñaypaqmi!