Read Diospa Simin Qelqa SALMOS 140 Bible Online

SALMOS 140 - Diospa Simin Qelqa bible

SALMOS 140

¹(Davidpa takin) Señor Diosníy, millay runamanta qespichiway, maqakuq runakunamanta waqaychaway.

²Paykunaqa sonqonkupin millaykunata yuyaykunku, ch'aqwatapas sapa p'unchaymi hatarichinku.

³Mach'aqwaypa qallun hinan qallunkupas ñawch'illaña, víboraq venenon hinan rimasqankupas.

⁴Señor Diosníy, millaykunaq munaychakuwananmanta waqaychaykuway, maqakuq runakunamanta amachaykuway, urmanaypaq yuyaykuqkunamanta hark'aykuway.

⁵Chay anchaykachaqkunan toqllata pakapi churawarqanku, ñanniypin llikata, waskhata mast'awarqanku, purinaypin toqllakunata churawarqanku.

⁶Señorníy, qantan niyki: Qanmi Diosniy kanki, nispa. Señor Diosníy, waqyakamusqayta uyariykuway.

⁷Apu Señor Diosníy, atiyniyoq qespichiqniymi kanki, qanmi awqa-tinkuy p'unchaypi umayta pakaykuwarqanki.

⁸Señor Diosníy, ama millay runaman munasqankunata qoychu, ama yuyaykusqankuna hunt'akunanta munaychu, paqtan umata hoqarinkuman.

⁹Llullakuspa millayta rimakuwasqanku paykunaman kutichun.

¹⁰Nina sansakuna paykunaman urmaykuchun, unuyoq ukhu-ukhu p'uytuman wikch'uykuy, amaña chaymanta lloqsimuchunkuñachu.

¹¹Yanqa tumpakuq runaqa ama kay suyupi takyachunchu, maqakuq runataqa mana allin hap'ichun, maqashaspalla wañuchichun.

¹²Señor Diosníy, ñoqaqa yachanin wakchapaq chaninchapusqaykita, llakisqa runamanta sayarikusqaykitapas.

¹³Chanin runakunaqa qantan yupaychasunkiku, chanin sonqoyoqkunaqa qayllaykipin tiyanqaku.