Read Diospa Simin Qelqa SALMOS 143 Bible Online

SALMOS 143 - Diospa Simin Qelqa bible

SALMOS 143

¹(Davidpa takin) Señor Diosníy, mañakusqayta uyariykuway, khuyapayawaspayki mañakamusqayta uyariykuway. Qanqa chaninmi hunt'aqmi kanki. ¡Kutichimuway!

²Ama kamachiykita huchachawaychu, manan qayllaykipiqa mayqen runapas chaninchakunchu.

³Awqaykunan qatiykachawanku, pampakaman ñit'iykuwanku, unayña wañusqakunata hinan laqhayaqpi tiyachiwanku.

⁴Sinchitapunin llaki ñit'ishawan, sonqoymi p'iti-p'itishan.

⁵Ñawpa p'unchaykunatan yuyarini, tukuy ruwasqaykikunatan yuyaymanani, makiykiq ruwasqankunatan qhawarini.

⁶Ch'aki hallp'a hinan qanmanta ch'akichikuni, mañakuspaymi makiyta mast'arimuyki.

⁷Señor Diosníy, uyariykamullawayña, wañunayashaniñan. Ama uyaykita pakaykuwaychu, paqtan p'ampanapaq ayakuna hina kapuyman.

⁸Tutallamanta munakuyniykita reparachiway, qanman hap'ipakamusqayrayku. Maynintachus purinayta yachachiway, tukuy sonqo asuykamusqayrayku.

⁹Señor Diosníy, qanmi pakaykuqniy kanki, awqaykunamanta qespichiway.

¹⁰Qanmi Diosniyqa kanki, chayrayku, munayniyki ruwayta yachachiway, allin Espirituyki sumaq ñanninta pusawachun.

¹¹Señor Diosníy, sutiyki yupaychasqa kananpaq kawsachiway, qanqa chaninmi kanki, llaki-phutiymanta horqoway.

¹²Munakuwasqaykirayku, awqaykunata wañuchiy. Ñoqaqa kamachiykin kani, llapa sarunchaqniykunata chinkachiy.