Read Diospa Simin Qelqa SALMOS 144 Bible Online

SALMOS 144 - Diospa Simin Qelqa bible

SALMOS 144

¹(Davidpa takin) ¡Saminchasqa waqaychawaqniy Señor Diosqa kachun! Paymi maqanakunaypaq yachachiwan, paymi awqa-tinkuypaqpas wakichiwan.

²Paymi munakuwaqniypas pukaraypas, paymi pakakunaypas qespichiwaqniypas, paymi escudoypas hark'aykuwaqniypas. Paymi llaqtakunawan kasuchiwan.

³Señor Diosníy, ¿imataq runari payta yuyarinaykipaq? ¿Imataq wañuq runari qhawarinaykipaq?

⁴Runaqa huk samay hinallan, kawsayninqa chinkapuq llanthu hinallan.

⁵Señor Diosníy, hanaq pachata kicharimuspa uraykamuy, orqokunata q'osñinanpaq llamiykuy.

⁶Lliphllikichimuy, awqaykikunata qatiriy, wach'iykikunata wach'imuy, paykunata llaksay.

⁷Hanaq pachamanta makiykita haywarimuway, askha unumanta horqospa aysaway, wak llaqtayoqkunaq makinmanta qespichiway.

⁸Siminkuqa llullatan riman, llullakuspan juramentotapas ruwanku.

⁹Diosníy, mosoq takitan takipusqayki, arpawanmi takipusqayki.

¹⁰Qanmi reykunata atipachinki, kamachiyki Davidtapas qespichinki,

¹¹chayrayku, awqa sonqo runakunamanta kacharichiway, wak llaqtayoqkunaq makinmanta qespichichiway. Siminkuqa llullatan riman, llullakuspan juramentotapas ruwanku.

¹²Wayna churinchisqa huertapi t'ikashaq mallkikuna hina kachun, sipas ususinchisqa palaciota sumaqchaq thupasqa tusakuna hina kachun.

¹³Taqenchisqa imaymana ruruwan hunt'a kachun. Ovejanchisqa waranqanpi mirachun, hallp'anchispi waranqa-waranqa mirachun.

¹⁴Toronchisqa kallpasapallaña kachun, awqanchiskunaqa llaqta perqata ama q'asachunchu, runanchisqa ama kamachi-kayman lloqsichunchu, ama plazanchispi llakisqa qapariypas uyarikuchunchu.

¹⁵¡Kusisamiyoqmi chay hinata q'ochukuq llaqtaqa! ¡Kusisamiyoqmi Señor Diosniyoq llaqtaqa!