Read Diospa Simin Qelqa SALMOS 17 Bible Online

SALMOS 17 - Diospa Simin Qelqa bible

SALMOS 17

¹(Davidpa mañakuynin) Señor Diosníy, chaninchanapaq mañakusqayta uyariykuway, waqyakamusqayta uyariykuway, mana llullakuspa mañakamusqayta uyariykuway.

²Chaninchaykuwanaykitan munani, qanmi yachanki maychus chaninpuni kasqanta.

³Simiywan mana huchallikunaypaqmi yuyaykukurqani, qanmi yuyayniyta llapanta t'aqwirqanki, tutantinmi qhawawarqanki, allin-allintan reqsiykuwarqanki, manataq ima mana chanintapas tariwarqankichu.

⁴Kamachikusqaykikunaman hinan millay ruwaq runakunamanta t'aqakurqani, maqaylla maqakuqkunamantan karunchakurqani.

⁵Allintapunin ñanniykipi purirqani, manan hayk'aqpas karunchakurqanichu.

⁶Diosnilláy, qanmanmi waqyakamuyki, qanmi kutichimuwanki. Maki uyariykuway, simiyta uyariykuway.

⁷Cheqaq munakuyniykita sut'itapuni rikuchiway, qanpi pakaykukuqkunatan awqankumanta qespichinki.

⁸Ñawi ruruykita hina waqaychaway, raphraykiq llanthunpi pakaykuway,

⁹maqakuq millay runakunamanta, wañuchiwanankupaq muyuykuwaqniy awqaykunamanta.

¹⁰Mana sonqoyoqkunan kanku, umata hoqarispan rimanku.

¹¹Qatimuwaspankun muyuykuwankuña, pampaman ch'aqerqowanankupaqmi qhawapayawanku.

¹²Llik'irqariyllataña munaq leonkuna hinan kanku, hap'irqonanpaq qhamiyaq uña león hinan kanku.

¹³Señor Diosníy, sayariy, paykuna contra tupay, paykunata atipay, millay runakunamanta espadaykiwan qespichiway,

¹⁴Señor Diosníy, atiyniykiwan paykunamanta qespichiway, paykunaq kaqninqa kay pacha kaqllan. Waqaychasqayki ñak'ariykunawan paykunata muchuchiy, wawankunatapas, nietonkunatapas muchuchillaytaq.

¹⁵Ñoqataq ichaqa chanin kaspay uyaykita qhawasaq, rikch'arispaymi qanta rikuspay maytapuni kusikusaq.