Read Diospa Simin Qelqa SALMOS 18 Bible Online

SALMOS 18 - Diospa Simin Qelqa bible

SALMOS 18

¹(Saulmanta llapan awqankunamantawan Señor Dios qespichiqtinmi, Davidqa kay hinata takirqan) Señor Diosníy, munakuykin, kallpachaqniymi kanki.

²Señor Diosqa hatun Qaqaymi, pakaykuwaqniymi, qespichiwaqniymi, Diosniyqa pakakunay Qaqan,[2] payqa escudo hina hark'aykuwaqniymi, atiyniyoq qespichiwaqniymi, ancha hatun pakakunaymi.

³Señor Diosqa yupaychanapaq hinapunin, waqyakuqtiymi awqaykunamanta qespichiwan.

⁴Wañuy manchapakuykunan ñit'iykuwarqan, chinkaymi lloqlla hina p'ampaykuwarqan.

⁵Wañuymi sinchita mayt'uykuwarqan, wañuymi toqllanwan maskhawarqan.

⁶Llaki-phutiyniypin Señor Diosta waqyakurqani, yanapaykuwananpaqmi Diosniyta waqyakurqani, ch'uya wasinmantan uyarimuwarqan, qaparisqaytan uyarimuwarqan.

⁷Señor Diosmi phiñakurqan, chaymi kay pachaqa chhaphchikurqan khatatatarqan, chaymi orqokunaqa teqsinkama kuyurirqan chukchurqan.

⁸Senqanmantan q'osñi lloqsimurqan, siminmantan ruphakuq nina qallumurqan, rawrashaq k'illimsapas phawamurqan.

⁹Hanaq pachata kicharqospanmi uraykamurqan, chakinmanmi yanay-yana phuyu phuyuykamurqan.

¹⁰Huk querubinpi sillaykukuspan phalamurqan, wayra patapin phawaylla phawarqan.

¹¹Muyuykuqnin tutayaqwanmi pakachikurqan, para yana phuyuwanmi p'istuchikurqan.

¹²Ñawpaqenpi lliphllikishaq k'anchaymanta lloqsimuspan, yana phuyu sonqonta pasaspan, lliphllikipas chikchipas chayamurqan.

¹³Señor Diosmi hanaq pachamanta q'aqyaqemurqan, Ancha Hatun Diospa kunkanmi uyarikurqan, chikchiwan nina sansawan hinaraq.

¹⁴Wach'inankunatan wach'imurqan, awqankunan ch'eqerirqan, manchay lliphllikiyninwanmi ch'usaqyachirqan.

¹⁵Señor Diosníy, phiñariqtiykin sinchitapuni q'aqchaykuqtiykin, lamar-qochaq ukhunraq rikhurimurqan, kay pachaq teqsinraq rikhurimurqan.

¹⁶Diosqa altomantan hap'iykamuwarqan, manchay ukhu unumantan horqomuwarqan.

¹⁷Atiyniyoq awqaymantan qespichiwarqan, cheqnikuqniykunamantan kacharichiwarqan, paykunaqa ñoqamanta sinchi kallpayoqmi karqanku.

¹⁸Llakiq qatisqan kashaqtiymi phawaykamuwarqanku, Señor Diosmi ichaqa hark'aykuwarqan.

¹⁹Sinchi sasa kawsaymantan horqomuwarqan, munakuwaspanmi qespichiwarqan.

²⁰Señor Diosqa chanin kasqayman hinan qhawariwarqan, ch'uya kawsasqayman hinan saminchawarqan.

²¹Señor Diospa ñanninpin purirqani, manan Diosniymanta t'aqakurqanichu huchallikunaypaq.

²²Kamachikuy siminkunatan yuyallanipuni, unanchay siminkunatapas kasullanipunin.

²³Ñawpaqenpiqa pay sonqollapunin karqani, huchallikuymantaqa t'aqakurqanin.

²⁴Chaymi Señor Diosqa chanin kasqayman hina qhawariwarqan, ch'uya kawsasqayman hinan saminchawarqan.

²⁵Señor Diosníy, hunt'aqpaqqa hunt'aqllataqmi kanki, chanin runapaqqa chaninllataqmi kanki.

²⁶Ch'uyapaqqa ch'uyallataqmi kanki, millay kawsaqpaqqa yuyaysapan kanki.

²⁷Qanmi huch'uyyaykukuqta qespichinki, uma hoqariqtataq k'umuykachinki.

²⁸Señornilláy, qanmi k'anchaykuwanki, Diosnilláy, qanmi laqhayaqniyta k'anchapuwanki.

²⁹Yanapayniykiwanmi llat'anaqkunaman phawaykuni, kallpaykiwanmi llaqta perqaman seqani.

³⁰Diospa ñanninqa chaninpunin, Señorpa siminqa cheqaqpunin, payqa escudo hinan pakaykukuqninkunapaq.

³¹Señorllapunin Diosqa, Diosnillanchispunin pakakuna hatun Qaqaqa.

³²Diosmi kallpachawaqniyqa, paymi ñanniyta allichan,

³³paymi tarukata hina phawachiwan, paymi orqokunapi allinta sayachiwan,

³⁴paymi awqa-tinkuypaq yachachiwan, chaymi bronce p'eqtata chutani.

³⁵Qanmi atipana escudoykita qowanki, paña makiykiwanmi hap'iykuwanki, llamp'u sonqo-kayniykin hatunchawan.

³⁶Allin ñannintan purichiwanki, manan chakiypas llusk'anchu.

³⁷Awqaykunata qatipaspan tariparqani, paykunata wañuchispayñan kutimpurqani.

³⁸Paykunatan saqtarqani, ñawpaqeymanmi kumpakamurqanku, manañan sayarimunkuchu.

³⁹Qanmi awqa-tinkuypaq kallpachawarqanki, churanakuwaqniykunatan k'umuykachimuwarqanki.

⁴⁰Awqaykunatan qayllaymanta qatirirqanki, cheqnikuwaqniykunatan ñut'urqanki.

⁴¹Yanapaykuqtan waqyakurqanku, manataqmi pipas qespichiqninku karqanchu, Señor Diosmanmi waqyakurqanku, manataqmi uyarimurqanchu.

⁴²Wayraq phukusqan ñut'u hallp'ata hinan paykunata ñut'urqani, callepi t'uruta hinan paykunata sarurparirqani.

⁴³Ch'aqwa sayarichiq llaqtamantan qespichiwarqanki, suyukunapin umallita churawarqanki, mana reqsisqay llaqtan serviwan.

⁴⁴Uyariwaspanku hinan ñoqata kasuwarqanku, wak llaqtayoq runakunan qayllaypi huch'uyyaykukurqanku.

⁴⁵Paykunan pisi kallpayapurqanku, pakakunankumantan khatatataspa lloqsimurqanku.

⁴⁶¡Señor Diosqa kawsachun! ¡Saminchasqa kachun hatun Qaqayqa! ¡Hatunchasqa kachun qespichiwaqniy Diosqa!

⁴⁷Diosmi ñoqamanta ayni-kutichiqqa, llaqtakunatapas k'umuykachimuwaqniyqa,

⁴⁸awqaykunamanta qespichiwaqniyqa. Señor Diosníy, contraypi hatarimuqkunatan atipachiwarqanki, maqanakuylla munaq runakunamantan qespichiwarqanki.

⁴⁹Chayraykun Señor Diosníy, suyukuna ukhupi yupaychasqayki, sutiykita hatunchaspan takisaq.

⁵⁰Qanmi churasqayki reyta anchatapuni atipachinki, hawisqayki reytan munakushallankipuni, Davidtawan miraynintawanmi wiñaypaq khuyakunki.