Read Diospa Simin Qelqa SALMOS 27 Bible Online

SALMOS 27 - Diospa Simin Qelqa bible

SALMOS 27

¹(Davidpa takin) Señor Diosmi k'anchaykuwaqniypas qespichiwaqniypas, ¿pitaq manchachiwanman? Señor Diosmi hark'aykuwaqniyqa, ¿pitaq manchachiwanman?

²Mikhurqowanankupaq phawaykuwaspankun, millay awqaykunaqa ñoqa contra sayariqkunaqa misk'akuspa urmaykunqaku.

³Ejercitopas muyuykuwachun, manan sonqoyqa mancharikunqachu, soldadokunapas phawaykamuwachun, manan kuyurisaqchu.

⁴Kayllatan Señor Diosmanta mañakurqani, kayllatan munani: tukuy kawsasqay p'unchaykunapi Señor Diospa wasinpi kayta, sumaq-kayninta qhawanaypaq, yupaychana wasinpi kusisqallaña qhawanaypaq.

⁵Sasa p'unchaykuna chayamuqtinqa Señor Diosmi wasinpi pakaykuwanqa, karpanpi llanthuykuwanqa, qaqa patamanmi sayaykachiwanqa.

⁶Hinaqtinmi muyuykuwaqniy awqaykunata llallisaq, sacrificiokunatan wasinpi kusisqa takispa haywasaq, Señor Diosmanmi takisaq paytan yupaychasaq.

⁷Señor Diosníy, qanmanmi waqyakamuyki. Uyariykuway, khuyapayaykuway, kutichimuway.

⁸Sonqoymi niwan: Señor Diosta yupaychay, nispa. Chaymi ñoqaqa yupaychaq hamuyki.

⁹¡Ama pakakuwaychu! Ama k'arakta phiñakuspa kamachiykita qatiriwaychu. ¡Qanllan yanapaykuwaqniyqa kanki! Qespichiwaqniymi Diosniymi kanki, ama sapallayta saqerpariwaychu, ama wikch'urpariwaypaschu.

¹⁰Taytayña mamayña wikch'upuwanqa chaypas, qan Señor Diosmi uywakapuwanki.

¹¹Señor Diosníy, awqaykunan qhawapayawanku, ñanniykita reqsichiway, allin ñanninta pusaway.

¹²Ama awqaykunaq munayninman hap'iykachiwaychu, llulla testigokunan contraypi sayarimunku, maqanallawankupaqñan qhawashawanku.

¹³Ichaqa allintan yachani: kay kawsay pachapin Señor Diospa sumaq sonqo-kayninta rikusaq.

¹⁴¡Señor Diosman hap'ipaykukuy! ¡Kallpachakuy, ama pisipaychu! ¡Arí, Señor Diosman hap'ipaykukuy!