Read Diospa Simin Qelqa SALMOS 34 Bible Online

SALMOS 34 - Diospa Simin Qelqa bible

SALMOS 34

¹(Rey Abimelecpa qayllanpin Davidqa waq'aman tukurqan, chaymi Abimelecqa wikch'urqan, Davidtaq ripurqan. Chaymantan Davidqa kay takita kamarirqan) Señor Diostaqa tukuy tiempon saminchallasaqpuni, simiyqa paytan yupaychashallanqapuni.

²Ñoqaqa Señor Dioswanmi anchata kusikuni, ¡sarunchasqakuna, chayta uyarispa kusikuychis!

³Señor Diosta kuskalla qhapaqchaspa yupaychasun, sutintapas kuskalla hatunchasun.

⁴Señor Diosmanmi waqyakurqani, paytaq kutichimuwarqan, lliw manchakusqaymantan librawarqan.

⁵Payta qhawaqkunaqa kusisqallañan kapurqanku, manan hayk'aqpas p'enqachisqachu kanqaku.

⁶Ñoqa wakchan waqyakurqani, Señor Diostaq uyariykuwarqan, lliw llaki-phutiymantan qespichiwarqan.

⁷Señor Diospa angelninqa, Señor Diosta manchakuqkunatan muyuykunpas qespichinpas.

⁸Reqsiykuychis, hinaspa rikuychis may sumaqchus Señor Diosqa kashasqanta. ¡Kusisamiyoqmi payman hap'ipaykukuq runaqa!

⁹Señor Diosta manchakuychis, payman sonqollikuqkuna, payta manchakuqkunapaqqa manan imapas pisinchu.

¹⁰Leonkunapas pisichikuspan yarqachikunku, Señor Diosta kasukuqkunapaqmi ichaqa allin kaqkuna mana pisinchu.

¹¹Hamuychis, wawaykuna, maki uyariwaychis, Señor Dios manchakuytan yachachisqaykichis.

¹²¿Unaytachu kawsayta munanki? ¿Kusisqachu kawsayta munanki?

¹³Ama millayta rimaychu, ama llullakuychu.

¹⁴Mana allinmanta karunchakuy, allinkaqtataq ruway, runa-masiykikunawan thak-kaypi kawsay, chay hinallatapuni kawsakushay.

¹⁵Señor Diosqa chanin runakunatan qhawashan, waqyakusqankutapas makillan uyarishan.

¹⁶Señor Diosqa millay ruwaqkunatan mana qhawarinchu, sutinkutan kay pachamanta chinkachinqa.

¹⁷Señor Diosqa chaninkunaq waqyakusqantan uyarin, tukuy llaki-phutiyninkumantan horqon.

¹⁸Señor Diosqa llakisqa sonqoyoqkunaq qayllanpin kashan, payqa llakiq ñit'isqan sonqoyoqkunatan qespichin.

¹⁹Askhan chanin runaq llakikuyninqa, chaypas Señor Diosmi tukuy chaykunamanta qespichin.

²⁰Paymi llapa tullunkunata waqaychan, manataqmi huk tullullanpas p'akikunqachu.

²¹Millay runataqa millay-kaynillantaqmi wañuchinqa, chanin runata cheqnikuqkunapas muchuchisqan kanqaku.

²²Señor Diosmi ichaqa kamachinkunata qespichin, manataqmi payman hap'ipaykukuqkunaqa muchuchisqachu kanqaku.