Read Diospa Simin Qelqa SALMOS 37 Bible Online

SALMOS 37 - Diospa Simin Qelqa bible

SALMOS 37

¹(Davidpa takin) Ama llakikuychu millay ruwaq runakuna hawa, ama envidiakuychu mana chanin ruwaqkunata.

²Usqhayllan q'achu hina ch'akipunqaku, llanllashaq qora hinan naq'epunqaku.

³Señor Diosman hap'ipaykukuy, allinkaqtataq ruway, kay hallp'api tiyakuy, hunt'aqllapunitaq kay.

⁴Hinallataq Señor Dioswan anchata kusikuy, paytaq sonqoykiq munasqankunata qosunki.

⁵Señor Diosman kawsayniykita hap'iykachikuy, payman hap'ipaykukuy, paytaqmi yanapaykusunki.

⁶Chaninchayniykitan pacha illariyta hina k'anchachinqa, kuskachayniykitan chawpi p'unchay intita hina k'anchachinqa.

⁷Señor Diospa qayllanpi ch'inlla tiyakuy, paytaqa suyakullay. Ama llakikuychu kawsayninkupi t'ikariqtinku, mana chanin yuyaykusqankupi allinyaqtinku.

⁸Ama phiñakuychu, ama k'araktaqa phiñakuychu, amapuni renegaychu, chayqa mana allinkunallatan paqarichin.

⁹Millay runakunaqa wikch'usqapunin kanqaku, Señor Diosta suyakuqkunan ichaqa kay hallp'ata chaskinqaku.

¹⁰Pisi tiempomantaqa chinkapullanqan millay runakunaqa, maskhaspaykipas manañan tarinkichu.

¹¹Llamp'u sonqokunan ichaqa kay hallp'ata chaskinqaku, sumaq thak-nisqataq tiyakunqaku.

¹²Millay runaqa chanin runaq mana allinnintan yuyaykun, pay contran k'utupakun.

¹³Señor Diosmi ichaqa paymanta asikun, yachanmi paypaqqa muchunan p'unchay chayamushasqanta.

¹⁴Millay runakunaqa espadankutan horqokunku, wach'inankutan mat'inku, wakchakunatapas mana imayoqkunatapas urmachinankupaq, chanin kawsaqkunata wañuchinankupaq.

¹⁵Espadankuqa sonqollankumantaqmi haykunqa, p'eqtankupas p'akirqarikunqan.

¹⁶Aswan allinmi chanin runaq pisilla kaqninqa, askha huchasapakunaq askhallaña kaqninkumantaqa.

¹⁷Mana chaninkunaq atiyninqa qollupunqan, chaninkunatan ichaqa Señor Dios takyachinqa.

¹⁸Señor Diosqa qhawamushanmi chanin runakunaq kawsasqanta, hallp'ankupas wiñaypaqmi kashanqa.

¹⁹Mana allin tiempopiqa manan p'enqachisqachu kanqaku, yarqay p'unchaykunapiqa saksatan mikhunqaku.

²⁰Millay runakunan ichaqa chinkapunku, Señor Diospa awqankunaqa qora hinan kanku, paykunaqa q'osñi hinan chinkapunku.

²¹Millay runaqa manukunmi manataq kutichipunchu, allin runan ichaqa sumaq sonqo kaspa qoykun.

²²Señor Diospa saminchasqankunaqa kay hallp'atan chaskinqaku, paypa ñakasqankunan ichaqa wikch'usqa kapunqaku.

²³Señor Diosmi runataqa pusan may ñannintachus purinanta, paymi munasqan runata allinta sayachin.

²⁴Urmanqaña chaypas, manan wikch'urayashallanqachu, Señor Diosmi paytaqa makinmanta aysarin.

²⁵Waynallan karqani, kunantaq machuyapuniña, manan hayk'aqpas rikurqanichu chanin runata Señor Diospa saqerparisqanta, manan hayk'aqpas rikurqanichu wawankunatapas mikhuna mañapakushaqta.

²⁶Sumaq sonqo kaspan aynirillanpuni. Wawankunapas saminchapunin.

²⁷Mana allinkaqmanta t'aqakuy, allinkaqtataq ruway, chaymi wiñaypaq kawsanki.

²⁸Señor Diosqa chanin runatan munakun, manan pay sonqo runataqa saqerparinchu. Wiñaypaqmi paykunaqa waqaychasqa kanqaku, millay runakunaq mirayninmi ichaqa chinkachisqa kanqaku.

²⁹Chanin runakunaqa kay hallp'atan hap'ikapunqaku, chaypin wiñaypaq tiyanqaku.

³⁰Chanin runaq siminqa yachaytan riman, qallunpas chaninchasqatan riman.

³¹Diosninpa yachachikuynintaqa sonqonpin hap'ishan, manan hayk'aqpas llusk'akunqachu.

³²Millay runaqa chanin runatan qhamiyan, wañuchiytapunin munan.

³³Señor Diosqa manan paywan hap'iykachinqachu, manallataqmi juzgaqtinkupas huchachanqachu.

³⁴Señor Diosta suyakuy, simintapas kasukuy, paytaqmi hatunchasunki hallp'ata chaskinaykipaq, ñawiykiwanmi rikunki millaykunaq wañurasqanta.

³⁵Huk millay runatan sinchi uma hoqariqta rikurqani, k'allmasapa q'omer sach'a hina mast'arikushaqta,

³⁶ichaqa chinkapurqanmi, manañan kapurqanchu, maskharqanin manañan tarirqanichu.

³⁷Qhawariy mana huchachana runata, qhawariy chanin runata, thak-kaypi kawsaq runaqa mirayniyoqmi kanqa.

³⁸Huchasapakunan ichaqa llapallan wañuchisqa kanqa, mirayninkupas chinkachisqan kanqa.

³⁹Chanin runakunataqa Señor Diosmi yanapaykun, paymi llaki-phutiy p'unchaykunapi pakaykuqninqa.

⁴⁰Paykunan Señor Diosman hap'ipaykukunku, chaymi paykunataqa yanapaykunpas qespichinpas, millay runakunamantan kacharichispa qespichin.