Read Diospa Simin Qelqa SALMOS 39 Bible Online

SALMOS 39 - Diospa Simin Qelqa bible

SALMOS 39

¹(Davidpa takin) Ñoqan nirqani: Imaynachus kawsasqaytan qhawakusaq ama simiywan huchallikunaypaq, senq'apawanmi simiyta senq'apakusaq millay runakunaq qayllanpi kashaspa, nispa.

²Upallakurqanin, manan rimarirqanichu, anchataña upallakuqtiymi nanayniypas astawan sinchiykuwarqan,

³sonqoymi sansariwarqan. Chaypi yuyaykushaqtiymi sonqoyqa astawan rawrariwarqan, hinaspan rimayta kacharirqani:

⁴Señor Diosníy, imayna tukukunayta willaykuway, hayk'a unay kawsanaytapas willaykuway. ¡Qhaphra kasqaytan yachakuyta munani!

⁵Manan unaytachu kawsachiwarqanki, wataypas ñawpaqeykipiqa manapas kanmanchu hinallan. ¡Arí, llapa runaqa huk samay hinallan!

⁶¡Arí, llapa runaqa llanthu hinallan! ¡Arí, yanqapaqmi llakipakun! Qhapaq kaykunatan huñun, manataq yachanchu pichus chaykunata hap'inanta.

⁷Kunanri, Señor Diosníy, ¿imatañataq suyakusaq? Qantan suyakushayki.

⁸Tukuy huchallikusqaykunamanta qespichiway. Ama mana yuyayniyoqwan asipayachiwaychu.

⁹Upallakurqanin, manan rimarirqanichu, qanmi chayta ruwarqanki.

¹⁰Amaña hasut'iwayñachu, makiykiq k'irisqanmi unphuyapushani.

¹¹Huchallikusqanmanta muchuchispaykin runata wanachinki, aswan munasqantan thuta hina k'utunki. ¡Arí, llapa runaqa huk samay hinallan!

¹²Señor Diosníy, mañakusqayta uyariykuway. ¡Waqyakusqayta uyariykuway! ¡Waqashasqayta rikuspa ama upallakuychu! Wak llaqtayoqmi qanpaqqa kani, lliw ñawpa taytaykuna hina qorpachasqallan kani.

¹³Amaña phiñasqa qhawariwayñachu asllatapas kusirikunaypaq, manaraq ripushaqtiy, manaraq chinkaripushaqtiy, nispa.