Read Diospa Simin Qelqa SALMOS 50 Bible Online

SALMOS 50 - Diospa Simin Qelqa bible

SALMOS 50

¹(Asafpa takin) Dioskunaq Diosnin, Señor Diosmi riman, inti lloqsimuymanta inti haykuykama tiyaqkunatan waqyakun.

²Ancha munayllaña Sión llaqtamantan Diosqa k'ancharimun.

³Diosninchismi hamun, ichaqa manan ch'inllachu, ruphaq ninan ñawpaqenta qallumun, sinchitapunin muyuriqninpi wayran.

⁴Diosmi hanaq pachatapas kay pachatapas llaqtanta juzgasqanta rikunankupaq waqyan:

⁵Ñoqapaq hunt'aq runaykunata huñupuwaychis, sacrificiota haywawaspanku ñoqawan rimanakuqkunata huñupuwaychis, nispa.

⁶Hanaq pachan willakun Diospa chanin kasqanta, Diospa juez kasqanta.

⁷Llaqtalláy, uyariy, rimapayashaykin, Israel-lláy, sut'itapunin contraykita rimasaq. Diosmi kani, Diosniykin kani.

⁸Manan sacrificioykimantachu phiñariyki, manan ruphachina sacrificioykimantachu anyayki, chaykunataqa haywashallawankipunin.

⁹Chaypas manan torillo uywaykikunatachu mañakuyki, manan kanchaykipi cabrakunatachu mañakuyki.

¹⁰Ñoqaqmi sach'a-sach'api llapallan salqa animalkunaqa, ñoqaqmi hinantin orqokunapi uywakunapas,

¹¹reqsinin orqokunapi llapan phalaq animalkunatapas, ñoqaqmi campopi llapa animalkunapas.

¹²Yarqawanman chaypas, manan willaykimanchu, ñoqaqmi teqsimuyuntinqa, tukuy chaypi kaqkunantin.

¹³Ñoqari, ¿toro aychatachu mikhuni? ¿Cabra yawartachu ukyani?

¹⁴Gracias qoy sacrificiota ñoqa Diosman haywaway, prometekusqaykikunata ñoqa Ancha Hatun Diospaq hunt'ay.

¹⁵Llaki-phutiy p'unchaypi waqyakamuway, ñoqan qespichisqayki, qantaq yupaychawanki.

¹⁶Millay runatan ichaqa Diosqa nin: ¿Pitaq qanri kanki kamachikuy simiykunata rimanaykipaq? ¿Pitaq qanri kanki rimanakusqaytapas rimanaykipaq?

¹⁷Manan anyaykunayta munankichu, simiykunatapas qheparparipunkin.

¹⁸Suwata rikuspaykipas sumaqtan chaskiykunki, wasanchay hucha ruwaqkunawantaq huñukunki.

¹⁹Simiykin mana allinkaqta riman, qalluykitaq llullakuyta paqarichin.

²⁰Tiyaykuspan wawqeyki contra rimanki, wachay masiykitan tumpashanki.

²¹Chaykunatan ruwarqanki, ñoqari, ¿upallakuymanchu? ¿Qan hina kasqaypaqchu yuyawanki? Manan, aswanpas phiñariykipunin, chaykunatan uyaykipi niyki.

²²Qonqapuwaqniykuna, allinta kayta reparaychis, paqtan ñoqa llik'irqariykichisman, manataq pipas kacharichiqniykichis kanmanchu.

²³Gracias qoy sacrificiota haywaqniyqa hatunchawanmi. Chanin ñannillaytapuni puriqtaqa ñoqan qespichisaq, nispa.