Read Diospa Simin Qelqa SALMOS 51 Bible Online

SALMOS 51 - Diospa Simin Qelqa bible

SALMOS 51

¹(Davidmi Betsabewan huchallikurqan, chay qhepatan profeta Natanqa payman rirqan. Chaymantan Davidqa kay takita kamarirqan) Diosníy, ancha munakuqmi kanki, khuyapayaykuway. Ancha khuyapayakuqmi kanki, huchallikusqaykunata pichaykuway.

²¡Llapallanta mana allin-kayniyta maylliykuway, huchaymanta ch'uyanchaykuway!

³Ñoqaqa reqsikunin mana kasukusqaykunata, ñoqaqa yuyashallanipunin huchallikusqayta.

⁴Qan contrallapunin huchallikuni, qan contrapunin millakusqaykita ruwani. Huchachawasqaykiqa chaninpunin, juzgawasqaykiqa chaninpunin.

⁵Cheqaqtapunin huchallantinña nacerqani, huchallantintañan mamay wachakuwarqan.

⁶Qanqa runaq sonqonpi cheqaq kaytan munakunki, chayrayku yachayniyoq kayta sonqoypi yachachiway.

⁷Ch'uyanchaway, ch'uyataq kasaq, maylliway, rit'imantapas aswan yuraqtaq kasaq.

⁸Huktawan q'ochukuyta kusikuyta uyarichiway, llakiq ñit'isqanña kashani chaypas kusirichiway.

⁹Ama huchaykunata qhawariychu, lliw mana allin-kayniykunatapas pichaykuway.

¹⁰Diosníy, ch'uya sonqota kamariway, cheqaq sonqoyoq kanaypaq mosoqyachiway.

¹¹Ama qayllaykimanta wikch'uwaychu, ama Santo Espirituykita qechukapuwaychu.

¹²Qespichiwasqayki q'ochukuywan q'ochurichillaway, qanta usqhaylla kasukuq sonqoyoqta ruwaway,

¹³chaymi mana kasukuqkunaman ñanniykikunamanta yachachisaq, huchasapakunataq kutirikamusunkiku.

¹⁴Qespichiwaqniy Diosníy, ama munaychu runa wañuchiq kanayta, ñoqaqa chanin kasqaykitan takisaq.

¹⁵Señor Diosníy, rimarichiway, chaymi yupaychasqayki.

¹⁶Manan sacrificiotachu munanki, ruphachina sacrificiota haywaqtiypas manan chaskiwankimanchu.

¹⁷Sonqoykiman chayaq sacrificioqa llakikuq sonqoymi, Diosníy, qanqa manan qhawarparinkichu llakikuq huch'uyyaykukuq sonqoyoqtaqa.

¹⁸Allin sonqoykiwan Sión llaqtata sumaqta qhawariy, Jerusalén muyuriq perqata wakmanta perqachiy.

¹⁹Chaypachan chanin sacrificiokuna kanqa, chaypachan altarniykipi ruphachina sacrificiokuna, torillokuna kanqa, chaykunan sonqoykiman chayaqpuni kanqa.