Read Diospa Simin Qelqa SALMOS 55 Bible Online

SALMOS 55 - Diospa Simin Qelqa bible

SALMOS 55

¹(Davidpa takin) Diosníy, mañakusqayta uyariykuway, mañakamuqtiy ama qheparpariwaychu.

²Uyariykuway, kutichimuway, llakikuymi ñit'iykushawan.

³Awqaypa rakhu kunkanmi q'aqchawan, millay runakunaq qapariykuwasqanmi llaksawan. Ñit'ikuq llakitan chayaykachimuwanku, phiñasqan cheqnipakushawanku.

⁴Sonqoymi phataqeshawan, wañuy manchakuymi chayamuwan.

⁵Manchakuymi khatatataymi hap'iwan, manchasqan chukchushani.

⁶Ninin: Urpiq hinalla raphray kapuwanman, chaypachan phalaripuspa samakuyman.

⁷Phalarispayqa karumanpunin ripuyman, ch'inneqpin tiyakamuyman.

⁸Usqhayllan ayqekuyman sinchi wayramanta, lloqlla paramantawan pakakunaypaq, nispa.

⁹Señor Diosníy, awqaykunata ñut'uy, panta-pantata rimachiy. Llaqtapin maqanakuytawan ch'aqwaytawan rikuni,

¹⁰tuta-p'unchay chay llaqta perqata muyuykushaqta. Chay ukhupin mana chanin-kaypas pisichanakuypas hunt'aykushan.

¹¹Chay ukhupiqa waqlliyllañan kashan, plazankupiqa kashallanpunin q'otuypas llullakuypas.

¹²Manan awqachu k'amiwarqan, chaytaqa muchuymanmi karqan, manan cheqnikuwaqniychu asipayawarqan, paymantaqa pakakuymanmi karqan.

¹³Aswanpas qanmi, qharimasíy, sonqo tupachiqmasíy, puriqmasíy, k'amiwarqanki.

¹⁴Sonqollapi hap'isqakunatan sumaqllataña kuska willanakurqanchis, kuskan Diospa wasinpi kasharqanchis.

¹⁵¡Qonqaylla awqaykunaqa wañuchunku! Kawsashaqlla Wañuy-pachaman urmaykuchunku, wasinku ukhupin mana allinqa kashan.

¹⁶Ñoqan ichaqa Diosta waqyarikuni, Señormi qespichiwanqa.

¹⁷Ch'isinmi, tutamantanmi, chawpi p'unchaymi Diosman uyarichikuni, anchini, paytaqmi kunkayta uyariwanqa.

¹⁸Paymi awqa-tinkuykunapi qespichiwanqa, askhaña awqaykuna kashaqtinpas kawsayniytan qespichiwanqa.

¹⁹Wiñay-wiñaynintin kamachikuq Diosmi uyariwanqa, hinaspan paykunata k'umuykachinqa. Paykunaqa kaqllatapunin kawsashanku, manapunin Diostapas manchakunkuchu.

²⁰Chay runan puriqmasinkunata maqarqan, sumaq kawsanankupaq rimanakusqantaqa manan hunt'arqanchu.

²¹Simi rimasqanqa mantequillamantapas aswan llamp'un, chaywanpas sonqonpiqa ch'aqwayllatapunin munan. Simi rimasqanqa aceitemantapas aswan llamp'un, chaywanpas ñawch'iyachisqa espada hinan k'irin.

²²Señor Diosman llakipakuyniykikunata saqey, paymi qaqata sayachisunki, manan hayk'aqpas chanin runataqa urmachisqa kananta munanqachu.

²³Diosníy, runa wañuchiqkunapas runamasinta hap'iykachiqkunapas manan unaytachu kawsanqaku, aswanpas wañunqakun, qanmi paykunata wañuy t'oqoman urmaykachinki. Ñoqan ichaqa qanman sonqollikusaq.