Read Diospa Simin Qelqa SALMOS 57 Bible Online

SALMOS 57 - Diospa Simin Qelqa bible

SALMOS 57

¹(Qaqa t'oqomanmi Davidqa Saulmanta ayqerqan. Chaymantan kay takita kamarirqan) Diosníy, khuyapayaykuway, ñoqata khuyapayaykuway, qanpin pakaykukuni. Raphrayki ukhupin pakaykukusaq sinchi sasakuna pasanankama.

²Ancha Hatun Diostan waqyakuni, yanapaykuwaqniy Diostan waqyakuni.

³Paymi hanaq pachamanta uyarimuwaspa qespichiwanqa, paymi qatiykachawaqniykunata atipanqa, paymi munakuynintapas hunt'aq-kaynintapas rikuchiwanqa.

⁴Runa mikhuq leonkuna ukhupi hinan wikch'urayashani, kirunkuqa lanzakuna hinan, wach'inakuna hinan, qallunkuqa ñawch'iyachisqa espada hinan.

⁵Diosníy, hanaq pachapi hatunchasqa kasqaykita rikuchikuy, qhapaq-atiyniyki kay pachantinman hunt'aykuchun.

⁶Chakiypaqmi llikata mast'arqanku, sonqoymi pisiparqan. T'oqotan ñanniypi hasp'irqanku, ichaqa paykunallataqmi chayman urmaykurqanku.

⁷Diosníy, tukuy sonqoywanmi hap'ipakamuyki, sonqoyqa manan pisipanchu, qanman takinaypaq yupaychanaypaq.

⁸¡Rikch'ariy, almalláy! ¡Waqariy, tawtinkulláy! ¡Tocariy, arpalláy! ¡Pacha illarimuytan rikch'arisaq!

⁹Señor Diosníy, llaqtakuna ukhupin yupaychasqayki, suyukuna ukhupin takipusqayki.

¹⁰Munakuyniykiqa hanaq pachamantapas aswan hatunmi, hunt'aq-kayniykiqa phuyuq kasqanmanraqmi aypan.

¹¹Diosníy, hanaq pachapi hatunchasqa kasqaykita rikuchikuy, qhapaq-atiyniyki kay pachantinman hunt'aykuchun.