Read Diospa Simin Qelqa SALMOS 74 Bible Online

SALMOS 74 - Diospa Simin Qelqa bible

SALMOS 74

¹(Asafpa takin) Diosniyku, ¿imanaqtintaq saqerpariwankiku? ¿Wiñaypaqchu saqerpariwankiku? ¿Imanaqtintaq michinayki ovejakunapaq k'araktapuni phiñakunki?

²Ñawpamantaña tarikusqayki t'aqaykita yuyarikuy, aylluyki kanaykupaq horqokampusqayki llaqtata yuyarikuy, tiyasqayki Sión orqotapas yuyarikuy.

³Hamuy purunyachisqa raqaykunata qhawarinaykipaq, awqaqa llapantañan yupaychana wasipi kaqkunata thunirqan.

⁴Awqaykikunan ch'uya wasiykipi uywa hina qaparkacharqanku, llallisqankuta willakuspankun banderankuta chaypi sayachirqanku.

⁵Thunispan rikch'akurqanku sach'a-sach'api hachawan wit'uqkunaman.

⁶Paykunan hachawan combowan llapa llaqllasqakunata ñut'urqanku.

⁷Ch'uya wasiykitan kanaykurqanku, teqsinkama thunispan qanta yupaychananku wasita sarunchakurqanku.

⁸Sonqonkupin nirqanku: Hukpaqkamallaña paykunata sarurqapusun, nispa. Qan yupaychana llapa cheqastan kanaykurqanku.

⁹Manañan imapas qanmanta willakuq kanñachu, manañan ima profetapas kanñachu, hayk'aqkamachus kay kanantaqa manan yachallaykupaschu.

¹⁰Diosniyku, ¿hayk'aqkamataq awqakunaqa k'amisunki? ¿Wiñaypaqchu awqakunaqa sutiykita pisichanqa?

¹¹¿Imanaqtintaq manaña yanapaykuwankikuchu? ¿Imanaqtintaq manaña imatapas ruwankichu?

¹²Diosníy, qanmi ñawpamantaña reyniy kanki, qanmi suyuntinpi yanapallawankikupuni.

¹³Qanmi atiyniykiwan lamar-qochata iskayman t'aqarqanki, chaypi hatuchachaq wak'a animalkunaq umankunatan p'akirqanki.

¹⁴Wak'a Leviatanpa umankunatan t'astarqanki, hinaspan ch'inneqpi salqa animalkunaman qaraykurqanki.

¹⁵Qanmi pukyutapas mayutapas phullpuchimurqanki, hatun mayukunatapas ch'akichirqanki.

¹⁶Qanpan p'unchaypas tutapas, qanmi killatapas intitapas churarqanki.

¹⁷Qanmi kay pachaq qorpankunata churarqanki, qanmi poqoytapas chirawtapas ruwarqanki.

¹⁸Señor Diosníy, yuyariy awqaq k'amisqasuykita, mana yuyayniyoq runakunapas pisichasqasuykita.

¹⁹¡Ama salqa animalkunaman urpiykita qaraykuychu! ¡Ama sarunchasqa llaqtaykita qonqaychu!

²⁰Rimanakusqaykita yuyariy, suyuq tutayaq cheqasninkunamanmi maqayta munaqkunaqa hunt'aykun.

²¹Ama sarunchasqa runaqa p'enqachisqachu kachun. Wakchapas mana piniyoqpas yupaychasunkikun.

²²¡Diosníy, qanpa kaqmanta sayariy! ¡Yuyarikuy mana iñiyniyoqpa sapa p'unchay k'amisqasuykita!

²³Ama qonqaychu awqaykikunaq qaparisqanta, contrayki sayariqkunaq qaparkachashasqanta.