Read Diospa Simin Qelqa SALMOS 78 Bible Online

SALMOS 78 - Diospa Simin Qelqa bible

SALMOS 78

¹(Asafpa takin) Llaqtalláy, yachachisqayta uyariy, simi rimarisqayta maki uyariy.

²Rikch'anachiy simikunatan rimarisaq, ñawpa tiempopi mana yachasqakunatan sut'inchasaq.

³Uyarispayku yachasqaykutapas tayta-mamaykuq willawasqankutapas sut'inchasaqmi.

⁴Manan chaykunata wawaykuman pakasaqkuchu, aswanmi Señor Diospa atiynintapas musphana ruwasqantapas qhepa mirayman willasaqku.

⁵Diosmi Jacobpaq kamachikuy simita churarqan, Israelpitaq imaymana kawsanata churarqan, ñawpa taytanchiskunatan kamachirqan, chayta wawankuman yachachinankupaq,

⁶qhepaman naceq wawakuna chayta yachanankupaq, paykunapas chayta wawankuman yachachinankupaq.

⁷Chaymi Diosman sonqollikunqaku, manan ruwasqankunatapas qonqapunqakuchu, kamachikusqankunatapas hunt'anqakun.

⁸Manan ñawpa taytanku hinañachu kanqaku, mana kasukuq k'ullukuna, maynillanpi munakuq sonqoyoqkuna, Diosta wasancharpariqkuna.

⁹Efraín ayllu runakunan allin wach'iqkuna kashaspankupas awqa-tinkuy p'unchaypi kutirikapurqanku.

¹⁰Manan Dioswan rimanakusqankuta hunt'arqankuchu, manan yachachikuyninkunata kasukuytapas munarqankuchu.

¹¹Paypa ruwasqantan qonqapurqanku, paykunaman rikuchisqan musphana ruwasqankunatan qonqapurqanku.

¹²Ñawpa taytankuq qayllanpin Diosqa utirayanakunata ruwarqan, Egipto suyu Zoán pampapi.

¹³Iskaymanmi lamar-qochata t'aqarqan, hinaspan unuta perqata hina sayachispa chayninta paykunata chimpachirqan.

¹⁴P'unchaymi paykunata phuyuwan pusarqan, tutataq nina k'anchaywan pusarqan.

¹⁵Qaqakunatan ch'inneqpi ch'eqtarqan, mayuta hinan unuta phawachirqan.

¹⁶Diosqa qaqamantan unuta phullpuchimurqan, mayuta hinan unuta phaqchachimurqan.

¹⁷Chaypas paykunaqa Dios contran huchallikushallarqankupuni, Ancha Hatun Dios contran ch'inneqpi hatarirqanku.

¹⁸Munasqanku mikhunata mañakuspankun Diosta sonqonkupi wateqarqanku.

¹⁹Dios contran rimarqanku: ¿Diosri ch'inneqpi mikhunata mast'apuwasunmanchu?

²⁰Arí, payqa qaqatan ch'eqtarqan, chay qaqamantan mayu hinaraq unu phullpumurqan, hinaspan pampantin qochayaykurqan. Chayri, ¿t'antatapas aychatapas llaqtanman qollanmantaqchu? nispanku.

²¹Chaymi chayta uyarispa Señor Diosqa phiñakurqan, Jacob contra nina hina rawrarirqan, Israel contra k'arakta phiñakurqan.

²²Manan Diospi iñirqankuchu, manallataq yanapayninpipas creerqankuchu.

²³Chaywanpas, Diosmi phuyukunata kamachirqan hanaq pacha punkukunata kicharinanpaq,

²⁴maná nisqa mikhunatan parachimurqan mikhunankupaq, hanaq pacha mikhuytan qomurqan.

²⁵Angelkunaq t'antantan runa mikhurqan, saksanankukaman Diosqa mikhunata qorqan.

²⁶Hanaq pachapin inti lloqsimuy wayratapas uray wayratapas atiyninwan wayrachimurqan,

²⁷paykunapaqmi aychata ñut'u hallp'ata hinaraq parachimurqan, phalaq animalkunatan lamar-qocha aqota hinaraq rikhurichimurqan.

²⁸Chaykunatan karpa-karpaman chayachimurqan, tiyananku muyuriqmanpas urmaykachimurqan.

²⁹Saksanankukamaraqmi mikhurqanku, chhaynatan Diosqa munapakusqankuta qorqan.

³⁰Ichaqa manan munapakusqankuwan amikurqankuchu, simillankupiraq mikhunaqa hunt'a kashaqtinmi,

³¹Diosqa k'arakta paykunapaq phiñakurqan, aswan kallpasapakunatan wañurqarichirqan, Israelpi aswan allinninkunatan sipirqarirqan.

³²Chaywanpas huchallikushallarqankun, manan musphana ruwasqankunatapas creerqankuchu.

³³Chaymi samayta hinalla Diosqa kawsayninkuta qechurqan, manchay ñak'ariywanmi qonqaylla paykunata wañuchirqan.

³⁴Wakinninkuta Dios wañuchiqtinqa, paymanmi wakinqa kutirikapurqanku, yuyayta hap'ispankun Diosmanta tukuy sonqo mañakurqanku.

³⁵Paykunan yuyarirqanku Diosqa pakaykuqninku kasqanta, Ancha Hatun Diosqa kacharichimuqninku kasqanta.

³⁶Ichaqa siminkuwanmi llunk'upayarqanku, qallunkuwanmi q'oturqanku,

³⁷manan paypaq sut'i sonqochu karqanku, manallataq rimanakuyninpipas hunt'aqchu karqanku.

³⁸Diosmi ichaqa khuyapayakuq kaspa huchallikusqankuta pampachallaqpuni, manataq paykunata tukurparirqanchu. Askha kutin mana phiñakurqanchu, mayninpiqa pisillatan phiñakurqan.

³⁹Runalla kasqankutan yuyarirqan, ripuspa mana kutimuq wayra hinalla kasqankuta.

⁴⁰¡Hayk'a kutitan ch'inneqpi payta mana kasurqankuchu! ¡Hayk'a kutitan chay ch'inneq cheqaspi payta llakichirqanku!

⁴¹Yapapas-yapan Diostaqa wateqarqanku, Israelpa Ch'uya Diosnintan phiñachirqanku.

⁴²Manan atiyninta yuyarqankuchu, manallataq awqankumanta qespichimusqan p'unchaytapas yuyarqankuchu,

⁴³chaypachan Egipto suyupi utirayanakunata ruwarqan, Zoán pampapi musphanakunata ruwarqan.

⁴⁴Mayunkutapas yawarman tukuchirqan, hinan Egipto runakunaqa mana ukyayta atirqankuchu.

⁴⁵Paykunamanmi tankaylluta wakwaykachirqan, chaykunan paykunata kanirqan, hinallataq k'ayratapas wakwaykachirqan, chaykunan hallp'ankupi asnarirqan.

⁴⁶Cosechankutapas kurumanmi qaraykurqan, llank'asqankutapas langostawanmi mikhuchirqan.

⁴⁷Chikchiwanmi uvas chakrankuta saqtachirqan, higos sach'ankutapas qasawanmi qasachirqan.

⁴⁸Chikchiwanmi wakankuta wañuchirqan, ovejankutapas illapawanmi sipichirqan.

⁴⁹Diosmi sinchitapuni paykunata muchuchirqan, k'arakta phiñakuspa, rawraqta phiñakuspa, paymi angelninkunata kacharqan wañuchimunankupaq.

⁵⁰Payqa phiñakurqanpunin, manan kawsayninkuta wañuymanta hark'arqanchu, aswanmi paykunata onqoywan wañuchirqan.

⁵¹Egiptopin llapa phiwita wañuchirqan, llapa kurak qhari wawakunata Cam miray karpakunapi wañuchirqan.

⁵²Hinaspan Israel runakunata oveja t'aqata hina horqomurqan, llaqtantan ch'inneqninta pusamurqan.

⁵³Waqaychaspanmi paykunata pusamurqan, chaymi mana manchakurqankuchu, awqankutataq ichaqa lamar-qocha p'ampaykurqan.

⁵⁴Ch'uya hallp'anmanmi llaqtanta pusampurqan, paypa hap'isqan orqo-orqomanmi chayachimpurqan.

⁵⁵Israelpa qayllanmantan suyukunata wikch'urqan, sorteaspan ayllunkuman hallp'ata rakirqan, hinaspanmi paykunata tiyanankupi tiyachirqan.

⁵⁶Paykunataq ichaqa Ancha Hatun Diosta wateqarqanku phiñachirqanku, manataq kamachikusqan simikunata kasurqankuchu,

⁵⁷aswanpas mana hunt'aqmi kapurqanku, ñawpa taytanku hinan awqa sayarirqanku, mana allin ruwasqa p'eqta hinan waqllipurqanku.

⁵⁸Orqo patapi yupaychana cheqaswanmi payta phiñachirqanku, idolokunata yupaychaspan payta phiñachirqanku.

⁵⁹Diosmi chayta rikuspa phiñakurqan, hinaspan Israelmanta hukpaqkama t'aqakapurqan.

⁶⁰Silopi kaq tiyanantan saqepurqan, runakuna chawpipi tiyasqan karpatapas saqepurqan.

⁶¹Awqanwanmi rimanakuynin arcata qechuchirqan, qhapaq-atiynin rikch'aytan hap'ichirqan.

⁶²Anchatapunin llaqtanpaq phiñakurqan, awqaq espadanmanmi paykunata qaraykurqan.

⁶³Waynakunan kanasqa wañurqanku, sipaskunapaqtaq casarakuy takita manaña takirqankuchu.

⁶⁴Sacerdotekunan espadawan wañuchisqa karqanku, viudankutaq mana waqarqankuchu.

⁶⁵Chaypachan Señor Diosqa puñuymanta hina rikch'arirqan, vinowan loqheyaq kallpasapa hina,

⁶⁶hinaspanmi awqankunata atipaspa qatirirqan, wiñaypaqmi paykunata p'enqachirqan.

⁶⁷Josepa miraynintapas manan munarqanchu, Efraín ayllutapas manan akllakurqanchu,

⁶⁸aswanmi Judá aylluta akllakurqan, munakusqan Sión orqotapas akllakurqan.

⁶⁹Ch'uya wasintan wasichachirqan hatun hanaq pachata hina, wiñaypaq takyachisqan kay pachata hina.

⁷⁰Oveja michiq kamachin Davidtan akllakurqan,

⁷¹uñayoq oveja michinamantan waqyamurqan llaqtan Jacobta qhawananpaq, herencian Israelta michinanpaq.

⁷²Davidqa chanin sonqonwanmi paykunata michirqan, allin yachaq makinwanmi paykunata kamachirqan.