Read Diospa Simin Qelqa SALMOS 80 Bible Online

SALMOS 80 - Diospa Simin Qelqa bible

SALMOS 80

¹(Asafpa takin) Israelta michiq, uyariwayku, qanmi Josepa mirayninta oveja t'aqata hina pusaqqa kanki, qanmi querubinkuna patapi tiyaqqa kanki.

²Efraintapas, Benjamintapas, Manasestapas k'anchaykamuy, kallpaykita rikuchiy, hamuspayki atiyniykiwan qespichiwayku.

³Diosniyku, imaynachus kasqaykuman kutirichiwayku, sumaqta qhawarimuwayku, chaymi qespichisqa kasaqku.

⁴Tukuy-atiyniyoq Señor Diosniyku, ¿hayk'aqkamataq llaqtaykiq mañakusqasuykiwan phiñasqalla kashanki?

⁵Weqe mikhunatan mikhuchiwarqankiku, weqe ukyanatan askhallataña ukyachiwarqankiku.

⁶Qorpayku suyukunawanmi asipayachiwarqankiku, awqaykun ñoqaykumanta burlakunku.

⁷Tukuy-atiyniyoq Diosniyku, imaynachus kasqaykuman kutirichiwayku, sumaqta qhawarimuwayku, chaymi qespichisqa kasaqku.

⁸Egiptomantan uvas yurata apamurqanki, suyukunatan qarqorqanki, hinaspan chayta plantarqanki.

⁹Chaypaqmi pampata picharqanki, uvas yurataq saphinkunata mast'arispa suyuntinman hunt'aykurqan.

¹⁰Orqokunatan llanthunwan llanthuykurqan, k'allmankunawanmi hatuchaq cedro sach'akunata llanthuykurqan.

¹¹K'allmankunan lamar-qochakama mast'arikurqan, ch'ikchimusqankunan Eufrates mayukama chayarqan.

¹²¿Imanaqtintaq perqankunata thunirqanki, ñanninta tukuy puriqkuna uvasta p'itinanpaq?

¹³Monte khuchin thunirqapun, salqa animalkunan mikhurqapun.

¹⁴¡Tukuy-atiyniyoq Diosniyku, kutirimullawaykuña! Hanaq pachamanta allintapuni qhawarimuwayku, kay uvas yurata yuyarikamuy,

¹⁵qanpa plantasqayki yurata, qanpa wiñachisqayki ch'ikchita.

¹⁶Awqaykun chayta wit'uspa ruphaykachirqanku, k'arak phiñakuyniykiwan paykunata wañuchiy.

¹⁷Akllakusqayki runata ichaqa yanapaykuy, takyachisqayki reyta yanapaykuy.

¹⁸Manataqmi hayk'aqpas qanmanta t'aqakusaqkuchu. Kawsachiwayku, qanllatapuniñan yupaychasqaykiku.

¹⁹Tukuy-atiyniyoq Señor Diosniyku, imaynachus kasqaykuman kutirichiwayku, sumaqta qhawarimuwayku, chaymi qespichisqa kasaqku.