Read Diospa Simin Qelqa SALMOS 83 Bible Online

SALMOS 83 - Diospa Simin Qelqa bible

SALMOS 83

¹(Asafpa takin) Diosníy, ¡ama ch'inlla kakuychu! Diosníy, ¡ama upallakuychu! ¡Amataq hinallaqa kaychu!

²¡Qhawariy! Awqaykikunan qaparimunku. Cheqnikuqniykikunan awqayki sayarimunku.

³Llaqtayki contra yuyaykuspan chhiwchinakunku, waqaychasqaykikuna contran yuyaychanakunku.

⁴Ninkun: Hamuychis, tukurparisun amaña huk suyu kanankupaq, Israel suti chinkapunanpaq, nispa.

⁵Huk sonqollan rimanakunku, qan contran rimanakunku:

⁶Edom runakunapas, Ismael runakunapas, Moab runakunapas, Agar runakunapas,

⁷Gebal runakunapas, Amón runakunapas, Amalec runakunapas, Filistea runakunapas, Tiro runakunapas.

⁸Asiria runakunapas paykunawanmi huñukun Lotpa wawankunata yanapanankupaq.

⁹Madián runakunata hina paykunata ruway, Cisón mayupi Sisaratawan Jabintawan ruwasqaykita hina,

¹⁰chaykunan Endorpi wañurarqanku, hallp'a wanumanmi tukupurqanku.

¹¹Umallinku Orebtawan Zeebtawan ruwasqaykita hina ruway, llapa kamachikuqninkuta Zebatawan Zalmunatawan ruwasqaykita hina ruway.

¹²Paykunan nisqaku: Diospa qosqan sumaqkaq q'achu pampata hap'ikusun, nispa.

¹³Diosníy, khiska ruruta hina wayrawan apachiy, wayraq apasqan ñut'u pajata hina.

¹⁴Imaynan ninaqa sach'a-sach'ata ruphaykun, imaynan ninaqa rawraspa orqokunata q'olaykun

¹⁵ahinallatataq paykunata manchay wayraykiwan qatiykachay, tutuka hatun wayraykiwan mancharichiy.

¹⁶Señor Diosníy, p'enqasqata k'umuykachachiy, qanman kutirikamunankupaq.

¹⁷Wiñaypaq p'enqachisqa manchapachisqa kachunku, k'umuykachisqa kaspa wañuchunku.

¹⁸Qanllapuni Señor Diosqa kasqaykita yachachunku, qanllapuni teqsimuyuntinpi Ancha Hatun Dios kasqaykita reqsichunku.