Read Diospa Simin Qelqa SALMOS 88 Bible Online

SALMOS 88 - Diospa Simin Qelqa bible

SALMOS 88

¹(Hemanpa takin) Señor Diosníy, qespichiwaqniy Diosníy, tuta-p'unchaymi yanapayniykita mañakamuyki.

²¡Mañakamusqayta chaskiykuway! ¡Waqyakamusqayta uyariykuway!

³Sinchitapunin mana allin ñit'iykushawan, Wañuy-pachamanñan haykuykushani.

⁴Aya p'ampanaman wantuykunapaqñan kapushani, mana kallpayoqmi kapushani.

⁵Ayakuna ukhupi wikch'usqan kashani, wañuchisqakuna p'ampasqa hinan kashani, paykunatan manaña yuyarinkiñachu, manañan yanapaykunkiñachu.

⁶Wañuy t'oqomanmi wikch'uykuwarqanki, laqhayaqmanmi ukhu pachamanmi wikch'uykuwarqanki.

⁷K'araktan phiñariwarqanki, tukuy phoqchiqeqniykiwantaq chinkaykachiwarqanki.

⁸Reqsisqaykunatan ñoqamanta karunchawarqanki, paykunawanmi millachiwarqanki. Wisq'aykusqan kashani, manan lloqsiyta atinichu,

⁹sinchita waqaspaymi ñawsayapushaniña. Señor Diosníy, sapa p'unchaymi waqyakamuyki, makiytan mast'arimuyki.

¹⁰¿Wañusqakunapaq musphanakunata ruwawaqchu? ¿Wañusqakunari yupaychanasuykipaq sayarimunkumanchu?

¹¹¿Munakuyniykimanta aya p'ampanapi willankumanchu? ¿Cheqaq-kayniykimantapas chinkay-pacha ukhupi willakunmanchu?

¹²¿Musphana ruwasqaykikunata pipas wañuy laqhayaqpi reqsinmanchu? ¿Chanin-kayniykitapas imaymana qonqana pachapi reqsinmanchu?

¹³Señor Diosníy, ñoqan ichaqa qanta waqyakamuyki, sapa paqarmi mañakamuyki.

¹⁴Señor Diosníy, ¿imanaqtintaq wikch'uwanki? ¿Imanaqtintaq mana qhawarimuwankichu?

¹⁵Wayna kasqaymantapachan llakikuni, yaqa-yaqan wañuni, manchachiwasqaykitan muchuni, manan muchuyta atiniñachu.

¹⁶K'arak phiñakuyniykin atiykuwan, manchachiwasqaykin ñit'iykuwan,

¹⁷millp'uq unu hinan muyuykushallawanpuni, huk-nisqallan ch'unkukamuwan.

¹⁸Amigoytawan puriq-masiytawanmi qayllaymanta karunchawarqanki, kunanqa laqhayaqllapiñan kapushani.