Read Diospa Simin Qelqa PROVERBIOS 1 Bible Online

PROVERBIOS 1 - Diospa Simin Qelqa bible

PROVERBIOS 1

¹Davidpa churin Salomonpa rikch'anachiy siminkuna, paymi Israel suyupi rey karqan. Kay rikch'anachiy simikunaqa

²yachaytawan yachachiytawan tarinapaqmi, ancha yachaywan rimasqakunata entiendenapaqmi,

³allin yachachisqa kaywan tanteaywan kawsanapaqmi, chaninkaqtapas, chaninchaytapas, k'apak-kaytapas ruwaspa,

⁴warmakunata yuyaysapaman tukuchinapaqmi, waynakunatapas yuyaychaspa yuyayta hap'ichinapaqmi.

⁵Yachayniyoqpas chaykunata uyarispaqa aswan yachayniyoqmi kanqa, yuyayniyoqpas aswan allin yuyaychasqan kanqa.

⁶Chay hinapi, rikch'anachiy simitapas mana sut'i kaq simitapas, yachayniyoqkunaq simintapas watuchiyninkutapas entiendenapaq.

⁷Yachayniyoq kanapaqqa ñawpaqtaraqmi Señor Diosta manchakuna, mana yuyayniyoqkunaqa pisipaqmi qhawarinku yachaytapas yachachiytapas.

⁸Churilláy, uyariy taytaykiq yachachiyninta, kasukullaypuni mamaykiq yachachisqasuykita,

⁹umaykipaq t'ika corona hinan kanqa, kunkaykita sumaqchaq walqana hinan kanqa.

¹⁰Churilláy, huchasapakunachus q'otuyta munasunki chayqa, ama kasukuychu.

¹¹Paykunachus nisunkiku: Haku ñoqaykuwan, runata wañurqachinapaq suyapamusunchis, mana huchayoqta yanqapuni wañuchimusunchis.

¹²Wañuy-pacha hina kawsashaqta paykunata millp'uykusun, aya t'oqoman chinkaykuqta hina kaqtapacha oqoykusun.

¹³Imaymana qhapaq kaytan tarisun, qechusqakunawan wasinchista hunt'achisun.

¹⁴Ñoqaykuman hinan qanmanpas tupasunki, llapallanchis huk bolsallayoq kasun, nispa chayqa,

¹⁵churilláy, ¡amapuni paykunawan puriysikuychu! Purinankumanta karunchakuy.

¹⁶Paykunaqa mana allinmanmi phawarinku, runata wañuchinankupaqmi usqhanku.

¹⁷Yanqapaqmi toqllata churanku phalaq animalkunaq rikushasqanqa,

¹⁸paykunaqa kikinkupaqmi toqllata churakunku, toqlla churasqallankupitaqmi wañunqaku.

¹⁹Chay hinatan tukukun suwakuyman sonqollikuqqa, chay sonqollikuymi payta wañuchin.

²⁰Yachaymi callekunapi waqyakun, plazakunapi qaparin,

²¹askha runaq kasqankunapin waqyakun, llaqta haykuna punkukunapin chayasqa simikunata riman:

²²Yaw, pisi yuyayniyoqkuna, ¿hayk'aqkamataq pisi yuyayman k'askakunkichis? Yaw, asipayaqkunapas, ¿hayk'aqkamataq asipayaspa kusirakunkichis? Yaw, mana yuyayniyoqkunapas, ¿hayk'aqkamataq yachayta cheqnikunkichis?

²³Anyaykuyniyta maki uyariwaychis, ñoqan yachayniyta mast'arimusqaykichis, simiykunatan yachachisqaykichis.

²⁴Waqyamurqaykichismi, manataq uyarimuyta munawarqankichischu, makiytan mast'arimurqaykichis, manataq rikuqpas tukuwarqankichischu.

²⁵Aswanmi llapa kunaykuyniykunata wikch'uykukurqankichis, manan anyaykuyniytapas munarqankichischu.

²⁶Chaymi ñoqapas muchuqtiykichis asikusaq, hatun llaki chayamusuqtiykichispas kusipayasqaykichis,

²⁷hatun llaki lloqlla hina chayamuqtin, muchunaykichis muyuq wayra hina chayamuqtin, qankunaman llakipakuypas phutikuypas chayamuqtin.

²⁸Chaypachan waqyakamuwankichis, manataqmi kutichimusqaykichischu, maskhawankichismi, manataqmi tariwankichischu.

²⁹Yachaytan cheqnikurqankichis, manan Señor Diostapas manchakuyta munarqankichischu.

³⁰Kunaykuyniytan wikch'uykukurqankichis, manan ima anyaykuyniytapas chaskikurqankichischu.

³¹Mana allin ruwasqaykichispa ruruntan cosechankichis, mana allin yuyaykusqaykichispa rurunwanmi amichikunkichis.

³²Pisi yuyayniyoqkunataqa pantasqallankutaqmi wañuchinqa, mana yuyayniyoqkunataqa llakhi kasqallankutaqmi wañuchinqa.

³³Uyariwaqniymi ichaqa mana imanasqalla tiyanqa, mana imatapas manchakuspalla kawsanqa.