Read Diospa Simin Qelqa PROVERBIOS 10 Bible Online

PROVERBIOS 10 - Diospa Simin Qelqa bible

PROVERBIOS 10

¹Salomonpa rikch'anachisqan simikuna: Yachayniyoq churiqa taytantan kusichin, mana yuyayniyoq churitaq mamanta llakichin.

²Mana chaninpi tarisqa qhapaq kaykunaqa manan allinpaqchu, chaninta kawsaymi ichaqa wañuymanta qespichin.

³Señor Diosqa chanin runataqa manan hinallatachu yarqasqata qhawan, millay runakunaq munapakusqantan ichaqa qolluchinqa.

⁴Qella kaspan runaqa wakchayan, k'uchi kaspataqmi qhapaqyan.

⁵Cosecha tiempopi cosechaqqa yuyayniyoq runan, mikhuy hoqariy tiempopi puñuqmi ichaqa mana p'enqakuq runa.

⁶Chanin runapaqqa saminchakunan chayamun, millay runakunatan ichaqa k'arak rimayninku heq'epachin.

⁷Chanin runata yuyarispaqa: Allinmi, ninkun, millay runatan ichaqa usqhaylla qonqapunku.

⁸Yachayniyoqqa kamachikusqakunatan chaskin, yanqa thawtiqmi ichaqa waqllipun.

⁹Cheqanta puriqqa manan manchapakunchu, waqlliypi puriqmi ichaqa hap'irqosqa rikukun.

¹⁰Ñawinwan q'esuykuqqa hukkunatan k'irin, sut'i simiwan anyaykuqmi ichaqa sumaqta kawsachin.

¹¹Chanin runaq siminqa kawsay pukyun, millay runatan ichaqa k'arak rimaynin heq'epachin.

¹²Cheqnikuyqa ch'aqwatan sayarichin, munakuymi ichaqa llapa huchallikusqakunata pampachan.

¹³Yachayniyoqqa yachaytan riman, mana yuyayniyoqtaq hasut'isqa kanan.

¹⁴Yachayniyoqkunaqa yachasqankutan waqaychakunku, mana yuyayniyoqpa siminmi ichaqa waqllichinan patapiña kashan.

¹⁵Qhapaq runataqa qhapaq kayninmi amachaykun, wakcha runataqa wakcha-kayninmi waqllichin.

¹⁶Chanin runaq ganasqanqa kawsanapaqmi, millay runaq tarisqanmi ichaqa huchapaq.

¹⁷Kunaykuykunata maki uyariqqa kawsaymanmi rin, pichus kunaykuyta mana uyarikuqmi ichaqa chinkayman rin.

¹⁸Cheqnikuyta pakaykuqqa llullan, yanqa tumpaykuna ch'eqechiqqa mana yuyayniyoqmi.

¹⁹Askha rimasqapiqa kallanpunin pantayqa, upallakuqmi ichaqa allin yuyayniyoq.

²⁰Chanin runaq rimasqanqa ch'uyayachisqa qolqe hinan, millay runaq yuyayninmi ichaqa mana chanin.

²¹Chanin runaq siminqa askha runatan uywan, mana yuyayniyoqkunan ichaqa mana yuyayniyoq kaspa wañunku.

²²Señor Diospa saminchayninqa qhapaqyachinmi, chay saminchayqa manan llakichinchu.

²³Mana yuyayniyoqqa, mana allinkunata ruwaspan kusikun, yuyayniyoqmi ichaqa yachaywan kusikun.

²⁴Chanin runaqa imachus munasqantan chaskin, millay runan ichaqa imachus manchapakusqanta chaskin.

²⁵Millay runataqa muyuq wayran aparikapun, chanin runan ichaqa wiñaypaq sayan.

²⁶Imaynan vinagreqa kiruta “chhuk” nichin, imaynan q'osñipas ñawita k'arachin, chay hinan qellaqa kachaqninpa umanta nanachin.

²⁷Señor Diosta manchakuyqa unaytan kawsachin, millay runakunaq kawsayninmi ichaqa pisiyachisqa kanqa.

²⁸Chanin runakunaq suyakuyninqa kusikuymanmi tukupunqa, millay runakunaq suyakuyninmi ichaqa qollupunqa.

²⁹Señor Diosqa waqaychanmi allinkaqta ruwaqkunata, mana allinkaqta ruwaqkunatan ichaqa chinkachin.

³⁰Chanin runaqa manan hayk'aqpas kuyurichisqachu kanqa, millay runakunan ichaqa suyupi mana tiyanqakuchu.

³¹Chanin runaq siminmantan yachay paqarimun, waqllisqa runaq qalluntan ichaqa kuchunqaku.

³²Chanin runaqa tupusqallatan maypipas riman, millay runakunan ichaqa waqllisqallata riman.