Read Diospa Simin Qelqa PROVERBIOS 14 Bible Online

PROVERBIOS 14 - Diospa Simin Qelqa bible

PROVERBIOS 14

¹Yachayniyoq warmiqa wasintan sayarichin, mana yuyayniyoqmi ichaqa makinkunawan thunin.

²Allin kawsaypi puriqqa Señor Diostan manchakun, waqllisqa kawsaypi puriqmi ichaqa Señor Diosta pisichan.

³Mana yuyayniyoqpa rimasqanqa hatunchakuyllan, yachayniyoqkunaq rimasqanmi ichaqa kikinkuta waqaychan.

⁴Toro mana llank'aqtinqa ch'usaqmi taqe kashan, llank'aq toroq kallpanwanmi ichaqa askha mikhuna kan.

⁵Cheqaq testigoqa manan llullakunchu, llulla testigon ichaqa llullallatapuni riman.

⁶Asipayakuqqa yachaytan maskhan, manataq tarinchu, reparaq runan ichaqa mana sasachaspalla yachaqan.

⁷Mana yuyayniyoqpa qayllanmanta karunchakuy, siminpiqa manan yachayta tarinkichu.

⁸Yuyaysapaqa imaynatachus kawsasqanta qhawarikuspanmi yachayniyoq kasqanta rikuchin, mana yuyayniyoqkunatan ichaqa mana yuyayniyoq-kaynillankutaq q'otun.

⁹Mana yuyayniyoqkunaqa huchankumantan asikunku, chaninkuna ukhupin ichaqa Diospa munayninman hina kawsanku.

¹⁰Sonqoq hayasqanqa payllapaqmi hayan, kusikusqanpipas manataqmi wak runaqa kusiysikunchu.

¹¹Millay runakunaq wasinqa thunisqan kanqa, chaninkunaq wasinmi ichaqa allinyanqa.

¹²Runapaqqa kanmi cheqanman rikch'akuq ñan, p'uchukayninmi ichaqa wañuna ñan.

¹³Asikushaqtinpas sonqoqa nanashanmanmi, kusikuypas llakipi tukukunmanmi.

¹⁴Waqllisqa sonqoyoqqa imaynatachus kawsasqanwanmi amichikun, allin runan ichaqa ruwasqankunawan kusikun.

¹⁵Pisi yuyayniyoqqa tukuy uyarisqantan creen, yuyayniyoqmi ichaqa thaskisqankunata allinta qhawan.

¹⁶Yachayniyoqqa mana allintan manchakun, hinaspan chaymanta t'aqakun, mana yuyayniyoqmi ichaqa usqhaylla phiñakun, pay kikinpi confiakuspataq imatapas ruwallan.

¹⁷Usqhaylla phiñakuqqa mana ruwanakunatan ruwan, mana allin yuyaykuqtaq cheqnisqa rikukun.

¹⁸Pisi yuyayniyoqkunaqa mana yuyayniyoq-kaytan chaskinku, allin yuyayniyoqkunan ichaqa yachayta coronata hina chaskinku.

¹⁹Millay runakunaqa allin runakunamanmi k'umuykunqaku, millay runakunaqa chaninkunaq ñawpaqenpin qonqorikunqaku.

²⁰Wakcha runamantaqa wasimasinpiwanpas anchhurinmi, qhapaqmi ichaqa askhallaña amigoyoq.

²¹Runamasinta pisichaqqa huchallikunmi, wakchakunata llakipayaqmi ichaqa kusisamiyoq.

²²Mana allinkaqta ruwayta yuyaykuqkunaqa pantankun, allinkaqta ruwayta yuyaykuqkunan ichaqa munakuytapas cheqaq-kaytapas rikuchinku.

²³Llank'aspan runaqa kaqniyoq kan, rimaylla rimaqmi ichaqa wakchayan.

²⁴Yachayniyoqkunaq qhapaq kayninqa yachaysapa kayninmi, mana yuyayniyoqkunataq zonzo-kayllata rikhurichin.

²⁵Cheqaq testigoqa hukkunatan qespichin, llulla testigon ichaqa q'otun.

²⁶Señor Diosta manchakuqqa allin waqaychasqapunin kashan, wawankunapas allin hark'aykusqallataqmi kashan.

²⁷Señor Diosta manchakuyqa kawsay pukyun, wañuy toqllakunamantan karunchan.

²⁸Askha runata kamachiq reyqa mentasqan kanqa, pisi runata kamachiqtaqmi pisipaq qhawasqa kanqa.

²⁹Mana usqhay phiñakuqqa allin yuyayniyoqmi, saltaq sonqon ichaqa mana yuyayniyoq.

³⁰Llamp'u sonqoqa cuerpotan kawsachin, envidiakuymi ichaqa tullukunata ismuchin.

³¹Wakchata sarunchakuqqa Kamaqnintan pisichan, wakchata khuyapayaqmi ichaqa Diosta yupaychan.

³²Muchuy hamuqtinmi millay runakunaqa urmaykapunqaku, wañuyña chayamuqtinpas chanin runakunaqa waqaychasqallapunin.

³³Allin reparaqpa sonqonpin yachayqa kashallanpuni, mana yuyayniyoqkuna ukhupipas chay yachayqa allin reqsisqan.

³⁴Chaninkaqta ruwayqa suyutan hatunchan, huchan ichaqa mayqen llaqtatapas p'enqayman churan.

³⁵Kusa llank'aq kamachitan reyqa sumaqta qhawarin, mana allinta llank'aqpaqmi ichaqa phiñakun.