Read Diospa Simin Qelqa PROVERBIOS 15 Bible Online

PROVERBIOS 15 - Diospa Simin Qelqa bible

PROVERBIOS 15

¹Llamp'u simiwan kutichikuqqa phiñakuytan thasnun, k'arak simin ichaqa astawan phiñachin.

²Yachayniyoqkunaq rimasqanqa yachaytan sumaqchan, mana yuyayniyoqkunan ichaqa yanqakunata rimarqarin.

³Señor Diosqa hinantin pachatan rikushan, allin runatapas mana allin runatapas qhawashanmi.

⁴Llamp'u simiwan rimayqa kawsarichinmi, waqllisqa k'arak rimaymi ichaqa sonqota k'irin.

⁵Mana yuyayniyoqqa taytanpa kunaykusqantan pisichan, anyaykusqata hap'ikuqmi ichaqa allin yuyayniyoq.

⁶Chanin runaqa wasinpi askha kaqniyoqmi, millay runapaqmi ichaqa tarisqankunapas uma nanaylla.

⁷Yachayniyoqkunaq siminqa yachaytan mast'arin, mana yuyayniyoqkunaqa manan chhaynatachu mast'arin.

⁸Señor Diosqa millay runakunaq sacrificio haywasqantan millakun, chanin runa mañakuqtinmi ichaqa kusikun.

⁹Señor Diosqa millay runakunaq imaynachus kawsasqantan millakun, pichus chanin kawsaqtan ichaqa munakun.

¹⁰Allin ñanta saqeqtaqa k'arak simiwanmi anyana, anyaykusqata mana uyarikuqqa wañunqan.

¹¹Wañuy-pachatapas Ukhu-pachatapas Señor Diosqa sut'itan qhawashan, ¿chaychu runakunaq sonqontaqa mana rikunman?

¹²Uma hoqariqqa manan phiñariqninta munakunchu, manallataqmi yachayniyoqkunatapas tapurikunchu.

¹³Kusisqa sonqoqa uyatan sumaqchan, llakisqa sonqotaq uyata unphuyachin.

¹⁴Reparaq sonqoqa yachaytan maskhan, mana yuyayniyoqkunan ichaqa yanqa simikunawan saksaykun.

¹⁵Llakisqa sonqoyoqpaqqa sapa p'unchaypas sasakaman, kusisqa sonqoyoqpaqmi ichaqa sapa p'unchaypas kusikuyllapuni.

¹⁶Aswan allinqa wakcha kaspa Señor Diosta manchakuymi, qhapaq kaspa llakipakuymantaqa.

¹⁷Aswan allinqa munakuypa kasqanpi yuyu mikhuymi, cheqnikuypa kasqanpi wira waka aycha mikhuymantaqa.

¹⁸T'impuq sonqo runaqa ch'aqwatan sayarichin, mana usqhay phiñakuqmi ichaqa ch'aqwata thanichin.

¹⁹Qellaq ñanninqa khiskawan kanchachasqa hinan, chanin runaq purinanmi ichaqa sumaq ñan hina.

²⁰Yachayniyoq churiqa taytantan kusichin, mana yuyayniyoq runan ichaqa mamanta pisichan.

²¹Mana yuyayniyoqqa zonzo-kayninwanmi kusikun, yuyayniyoqmi ichaqa chaninllatapuni kawsayta munan.

²²Yuyaychaq mana kaqtinqa, imachus yuyaykusqakunan qollupun, askha yuyaychaqkuna kaqtinmi ichaqa yuyaykusqakunaqa hunt'akun.

²³Runaqa kusikunmi allin tupasqata kutichisqanwan, tiemponpi rimasqapas may allinmi.

²⁴Yachayniyoqqa kawsayman pusaq ñannintan purin, manan wañuyman pusaq ñannintachu purin.

²⁵Señor Diosqa uma hoqariqpa wasintan raqayman tukuchin, viudaq hallp'antan ichaqa mana qechuchinchu.

²⁶Señor Diosqa millakunmi millay runakunaq yuyaykusqankunataqa, sumaq sonqowan rimasqakunan ichaqa ch'uyakama.

²⁷Suwakuyman k'askakuqqa wasintan sasaman tanqaykun, lluk'iykuyta cheqnikuqmi ichaqa kawsanqa.

²⁸Chanin runaqa allintan yuyaykun kutichinanpaq, millay runan ichaqa millaykunata rimarqarin.

²⁹Señor Diosqa millay runakunamantan karunchakun, chanin runakunaq mañakusqantan ichaqa uyarin.

³⁰Munakuywan qhawariyqa sonqotan kusirichin, allin willakuyqa wakmantan kallpachallantaq.

³¹Sonqo kawsarichiq anyaykuyta uyariqqa yachayniyoqkunaq qayllanpin kusisqa kashanqa.

³²Wanaykachiyta pisichaqqa pay kikintan pisichakun, anyaykusqata uyarikuqqa allin yuyaytan tarin.

³³Señor Diosta manchakuqqa yachayniyoq-kaytan yachaqan, k'umuykukuq runaqa hatunchasqan kanqa.