Read Diospa Simin Qelqa PROVERBIOS 16 Bible Online

PROVERBIOS 16 - Diospa Simin Qelqa bible

PROVERBIOS 16

¹Runaqa sonqonpin imatapas yuyaykun, Señor Diosmi ichaqa: “Arí”, ninpas, “manan”, ninpas.

²Runapaqqa tukuy ruwasqanpas ch'uyamanmi rikch'akun, Señor Diostaqmi yuyaykusqankunata juzgan.

³Lliw ruwanaykikunata Señor Diosman hap'iykachiy, hinan yuyaykusqaykikuna hunt'akunqa.

⁴Señor Diosqa tukuy imatapas huk yuyaywanmi ruwarqan, millay runatawanpas muchuchina p'unchaypaqmi ruwarqan.

⁵Señor Diosqa millakunmi llapan hatunchakuq sonqoyoqtaqa, paykunaqa huchachasqapunin kanqaku.

⁶Munakuywan cheqaq-kaywanmi huchaqa pampachakun. Señor Diosta manchakuspan runaqa mana allinmanta t'aqakun.

⁷Señor Diosqa runaq allin kawsasqanwan kusikun chayqa, awqankunawanpas paytaqa sumaqtan kawsachinqa.

⁸Aswan allinqa chaninninpi pisilla tarisqan, mana chaninninpi askhata tarisqamantaqa.

⁹Runaqa sonqonpin imachus ruwananta yuyaykun, Señor Diostaqmi imayna kanantaqa unanchan.

¹⁰Reyqa Diospa rimachisqantan riman, juzgaspanqa chaninninpin rimarin.

¹¹Señor Diosmi munan chanin balanzatapas chanin romanakunatapas, payqa llapa pesakunatan qhawan.

¹²Reykunaqa millakunmi mana chanin ruwasqakunata, chanin ruwaywanmi reypa kamachikuyninqa allinta sayan.

¹³Chanin rimasqakunawanmi reykunaqa kusikunku, paykunaqa cheqaqkaq rimaqtan munakunku.

¹⁴Reypa k'arak phiñakuyninqa wañuymanta willakuq hinan, yachayniyoq runan ichaqa chay phiñakuyta thasnun.

¹⁵Reyta kusisqa uyantinta rikuqqa kawsanqan, sumaq qhawarimuyninqa poqoypi para phuyu hinan.

¹⁶Aswan allinqa yachayta tariymi qori tariymantaqa, aswan allinqa yuyayta akllakuymi qolqe akllakuymantaqa.

¹⁷Chanintapuni kawsaqqa mana allinmantan t'aqakun, imayna kawsasqanta qhawakuqqa pay kikintan waqaychakun.

¹⁸Uma hoqariqqa qhepamanmi waqllinqa, anchaykachaq sonqoqa qhepamanmi urmanqa.

¹⁹Aswan allinqa wakchakunawan k'umuykukuymi qechusqakunata uma hoqariqkunawan rakinakuymantaqa.

²⁰Yachachikuyta maki uyariqqa allinyanqan, Señor Diosman hap'ipaykukuqqa kusisamiyoqmi.

²¹Takyasqa yuyayniyoqqa “allin tanteaq” nisqan, misk'i simiqa yachayniyoq kaytan yapaykun.

²²Allin yuyayniyoq-kayqa yuyayniyoqkunatan kawsarichin, mana yuyayniyoq-kaytaq mana yuyayniyoqkunata muchuchin.

²³Yachayniyoqqa allin chayasqatan riman, rimasqankunaqa aswantan creechin.

²⁴Sumaq rimasqakunaqa miel misk'i hinan, simipaqmi misk'i, cuerpopaqmi hampi.

²⁵Runapaqqa kanmi cheqanman rikch'akuq ñan, p'uchukayninmi ichaqa wañuna ñan.

²⁶Mikhunayachikuqqa allintan llank'an yarqay payta qatirisqanrayku.

²⁷Millay runaqa waqllisqakunatan yuyaykun, siminpas qallushaq nina hinan.

²⁸Waqllisqa runaqa ch'aqwatan hatarichin, simi apataq ancha munanasqa amigokunata t'aqanachin.

²⁹Maqakuq runaqa runamasintan q'otun, mana allin ñannintataq pusanpas.

³⁰Pipas waqllisqakunata ruwananpaq yuyaykuqqa ñawintan q'esuykun, pipas mana allinkuna ruwayta yuyaykuqqa simintan q'estichin.

³¹Unayta kawsayqa chanin runakunaq premionmi, soqoyoq kayqa umatan munaychan.

³²Kallpasapamanta aswan allinqa mana usqhay phiñakuqmi, huk llaqta hap'iqmanta aswan allinqa pay kikinta cuidakuqmi.

³³Diospa munayninta yachanapaqqa sorteankun, Señor Diostaqmi tukuyta sut'inchan.