Read Diospa Simin Qelqa PROVERBIOS 17 Bible Online

PROVERBIOS 17 - Diospa Simin Qelqa bible

PROVERBIOS 17

¹Ch'aqwaykunaq kasqan wasipi askha mikhunamantaqa aswan allinmi sumaq kawsaypa kasqan wasipi huk khamuykuy ch'aki t'anta.

²Allin yuyayniyoq kamachiqa mana p'enqakuq churitan kamachinqa, wawqenkunawantaqmi herenciata chaskinqa.

³Crisolpin qolqetaqa ch'uyayachinku, hornopin qoritaqa ch'uyayachinku, Señor Diostaqmi sonqokunata pruebaqqa.

⁴Millay runaqa mana chanin rimasqatan uyarin, llullaqa millay simitan uyarin.

⁵Wakcha runata asipayaqqa Kamaqnintan asipayan, muchuqmanta kusikuqqa muchuchisqapunin kanqa.

⁶Yuyaq runakunaq coronanqa nietokunan, wawakunaq kusikunanqa tayta-mamakunan.

⁷Mana yuyayniyoqpaqqa manan allinchu yachaysapa simikunata rimayqa, kamachikuqpaqpas manallataqmi allinchu llullakuyta rimayqa.

⁸Lluk'iykuyta yachaqpaqqa khuya rumi hinan lluk'iykuyqa, maymanña rin chaypas payqa allillanpunin.

⁹Huchallikuyta pampachaqqa munakuytan t'ikarichin, huchallikusqata willarqariqmi ichaqa amigokunata t'aqanachin.

¹⁰Allin reparaq runaqa huk anyaykusqallawanmi astawan yachaqan pachak maki hasut'iwan mana yuyayniyoqpa yachaqasqanmantaqa.

¹¹Millay runaqa contra hatariyllatapunin munan, ichaqa sinchi muchuchiq runatan payman kachanqaku.

¹²Aswan allinqa uñankuna qechusqa china ukumariwan tupaymi, mana yuyayniyoq millaykunata ruwashaq runawan tupaymantaqa.

¹³Runachus allinmanta mana allinwan kutichin chayqa, wasinpiqa sasachakuy kashallanqapunin.

¹⁴Ch'aqwata hatarichiqqa qocharayaq unuta kacharpariq hinan, chayrayku ch'aqwa manaraq qallarishaqtin churanakuyta saqepuy.

¹⁵Huchallikuqta mana huchayoqman tukuchiytapas, chanin runata huchachaytapas Señor Diosqa millakunmi.

¹⁶Mana yuyayniyoqri, ¿imapaqtaq qolqeta apamun yachayta rantinanpaq, mana yuyaynin kashaqtinri?

¹⁷Tukuy tiempon amigoqa munakun, llaki-phutiy tiempopipas wawqe hinan khuyapayakun.

¹⁸Mana yuyayniyoq runaqa fiakunanpaqmi prometekun, hinaspan wasimasinpaq fiakun.

¹⁹Ch'aqwayta munaqqa huchallikuytan munan, alabakuqqa waqlliynintan maskhan.

²⁰Millay sonqoyoqqa manan hayk'aqpas allinkaqta tarinchu, llullakuqpas mana allinmanmi urmaykun.

²¹Mana yuyayniyoq churiqa taytantan llakichin, mana yuyayniyoq runaq taytanqa manan kusikunchu.

²²Kusisqa sonqoqa allin hampin, llakisqa sonqon ichaqa onqochin.

²³Millay runaqa pakapi lluk'iykusqatan chaskikun chaninchayta waqllichinanpaq.

²⁴Yuyayniyoqqa yachayllawanpunin ruwayta munan, mana yuyayniyoqmi ichaqa imaymanaman chapukun.

²⁵Mana yuyayniyoq churiqa taytantan llakichin, mamantapas waqapachin.

²⁶Manan allinchu chanin runata muchuchiyqa, manallataqmi allinchu allichachaq runakunata hasut'iypas chanin kawsayniyoq kasqankumantaqa.

²⁷Takyasqa runaqa tupusqallatan riman, allin reparaqqa samp'a sonqollan.

²⁸Mana yuyayniyoq upallakuqtinqa, yachayniyoqpaq hap'isqan kanqa, upallakuqqa yuyayniyoqpaq hap'isqan kanqa.