Read Diospa Simin Qelqa PROVERBIOS 2 Bible Online

PROVERBIOS 2 - Diospa Simin Qelqa bible

PROVERBIOS 2

¹Churilláy, simiykunata hap'ikuy, kamachikusqaykunatapas sonqoykipi waqaychay.

²Yachayta makilla uyariy, allin yuyayman sonqollikuy,

³allin reparayta chaskinaykipaq mañakuy, allin yuyayta tarinaykipaqpas waqyakuy,

⁴qolqeta hina maskhay, chaniyoq pakasqa illakunata hina t'aqwiy.

⁵Chaymi Señor Dios manchakuyta yachanki, paytapas reqsinki.

⁶Señor Diosmi yachayta qoqqa, paypa siminmantan paqarimun, yachaypas, allin yuyayniyoq-kaypas.

⁷Señor Diosmi chanin runakunata yanapaykun atipanankupaq, chanin kawsaqkunatan amachaykun.

⁸Señor Diosmi runamasinkupaq chaninkaqta ruwaqkunata waqaychan, payman sonqollikuqkunatapas hark'aykun.

⁹Chaypachan entiendenki imaynatachus allinta kawsanaykipaq, entiendellankitaq imachus chanin-kayta, chaninchayta, k'apak-kaytapas.

¹⁰Chaymi yachayniyoq kanki, reqsiywanpas misk'illikunki,

¹¹chaypachan allin reparayqa waqaychasunki, allin yuyaypas makilla cuidasunki.

¹²Yachaymi millay ñanmanta karunchasunki, waqllisqakunata yuyaykuq runakunamanta qespichisunki.

¹³Yachaymi allin ñanta saqepuqkunamanta karunchasunki, tutayaq ñankunanta puriqkunamanta qespichisunki,

¹⁴millaykaqta ruwaspa kusikuqkunamantapas karunchasunki, waqllispa viciopi kusikuqkunamantapas qespichisunki.

¹⁵Chay runakunaqa waqlliypin kawsanku, kawsayninkuqa q'ewisqallapunin.

¹⁶Yachayqa wasanchaq warmimantapas karunchasunkin, wayllupayaspa rimaq wak warmimantapas hark'aykusunkin.

¹⁷Paymi sipas kasqan qosanta wikch'upun, Diosninpa qayllanpi rimanakusqantapas qonqapun.

¹⁸Wasinman riyqa wañuyman riy hinan, payman qayllaykuyqa wañusqakunaman qayllaykuy hinan.

¹⁹Pipas wasinman haykuqqa manan kutimunqachu, manañan hayk'aqpas kawsay ñanninta purinqachu.

²⁰Chay hinaqa, allinkunaq ñanninta puriy, chaninkunaq kawsasqanta hinapuni kawsay.

²¹Chanin kawsaqkunaqa kay suyupin tiyanqaku, mana huchallikuqkunapas kaypin kashanqaku,

²²millay runakunan ichaqa kay suyumanta wikch'usqa kanqaku, wasanchaqkunapas chaymanta t'irasqan kanqaku.