Read Diospa Simin Qelqa PROVERBIOS 23 Bible Online

PROVERBIOS 23 - Diospa Simin Qelqa bible

PROVERBIOS 23

¹Allin wiraqochawan mikhuq tiyaykuspaykiqa, allinta yuyaykuy pichus ñawpaqeykipi kashasqanta.

²Sinchitachus mikhunayachikunki chayqa, thoqayllaykita millp'uykukuy.

³Ama munapakuychu sumaq mikhunankunata, paqtan payqa q'otushallasunkiman.

⁴Qhapaqyanaykipaq ama afanakuychu, chaymanta waqaychakunaykipaq yuyayniyoq kay.

⁵Huk ratollan chaytaqa qhawarinki, manataq kapunchu, chaykunaqa ankakuna hinan raphrachakun, hinaspa phalaripun.

⁶Ama mich'a runawanqa mikhuq tiyaykuychu, ama sumaq mikhunankunatapas munapakuychu.

⁷Payqa imayna mikhunaykitapas yuyayninpin tupushan, payña: ¡Mikhuy! ¡Ukyay! nispa nisunki chaypas simillanmi chaytaqa riman.

⁸Mikhusqaykitan aqtumunki, sumaq rimasqaykikunapas yanqapaqmi kanqa.

⁹Ama mana yuyayniyoqtaqa rimapayaychu, allin yachaywan rimasqaykikunatan pisicharparinqa.

¹⁰Aman ñawpa qorpa rumi churasqataqa kuyurichinkichu, aman mana tayta-mamayoqkunaq chakranmanpas suchuykunkichu,

¹¹paykunata amachaqqa Atiyniyoq Diosmi, paymi mana tayta-mamayoqkunata amachaspa qan contra sayarinqa.

¹²Yachachikuyman sonqollikuy, yachayniyoq simikunatapas maki uyariy.

¹³Wawachus wanachinapaq kaqtinqa, payta wanachiy, hasut'isqaykiwanqa manan wañunqachu.

¹⁴Waqtaykunkichus chayqa, Wañuy-pachamantan karunchanki.

¹⁵Churilláy, yachayniyoqchus kapunki chayqa, sonqoytapas kusichillawankitaqmi,

¹⁶anchatan kusikusaq chanin rimasqaykikunata uyarispa.

¹⁷Ama huchasapakunata envidiakuychu, aswanpas Señor Diosta manchakushallaypuni.

¹⁸Qanpaqqa kashanraqmi qhepa p'unchay, suyakuyniykiqa manan qollupunqachu.

¹⁹Churilláy, maki uyariy, yachayniyoq kay, allin ñanllatapuni puriy.

²⁰Ama machaqkunawanqa huñukuychu, amallataq rakrapukunawanpas huñukuychu,

²¹machaqkunapas rakrapukunapas wakchayapunkun, puñuylla-puñuqpas thanta p'achayoqmi kapunqa.

²²Uyariy churiyaqniyki taytaykita, payayapuqtinqa ama mamaykita qhawarpariychu.

²³Cheqaq-kayta rantiy, amataq chayta vendeychu, tarillaytaq yachaytapas, tupusqalla-kaytapas, yuyayniyoq-kaytapas.

²⁴Anchatan chanin runaq taytanqa kusikun, yachayniyoqta churiyaqqa paywanmi q'ochukun.

²⁵Taytaykipas mamaykipas kusikuchun, wachaqniykipas q'ochukuchun.

²⁶Churilláy, tukuy sonqoykiwan uyariway, imayna kawsasqaytapas allinta qhawariy.

²⁷Chinkaykuq ukhu p'uytun rabona warmiqa, k'ikllu p'uyunkun wasanchaq warmiqa.

²⁸Paypas suwa hinan qhamiyan, askha qharikunatan wasanchaspa huchallichin.

²⁹¿Pipaqmi muchuyqa? ¿Pipaqmi nanayqa? ¿Pipaqmi ch'aqwaykunapas waqaykunapas? ¿Pipaqmi yanqa-qasilla k'irisqakunaqa? ¿Pipaqmi pukayasqa ñawikunaqa?

³⁰Vinota mana hayk'aq kachariqkunapaqmi, tupachisqa machana ukyanata maskhaqkunapaqmi.

³¹Ama vinota munapakuychu pukayashaqtinqa, vasopi colornin k'ancharishaqtinqa, llamp'ulla millp'uykuchikushaqtinqa.

³²Chaymantañan ichaqa mach'aqway hina k'utun, víbora hina kanin.

³³Ñawiykiqa mana rikusqankunatan qhawarinqa, yuyaykunkipas rimankipas waqllisqakunatan.

³⁴Lamar-qocha ukhupipas puñushawaq hinan kanki, otaq barcopi hatunkaray k'aspi puntapipas puñushawaq hina.

³⁵Ninkitaqmi: Maqawasqakun, ichaqa manan nanawanchu, soq'aykuwasqakun, ichaqa manan repararqanichu. ¿Hayk'aqmi rikch'arisaq astawan vinota ukyanaypaq? nispa.