Read Diospa Simin Qelqa PROVERBIOS 27 Bible Online

PROVERBIOS 27 - Diospa Simin Qelqa bible

PROVERBIOS 27

¹Ama paqarin p'unchay imachus ruwanaykimanta alabakuychu, manan yachankichu imachus chay p'unchaypi kananta.

²Ama qan kikiyki hatunchakuychu, hukkunan hatunchanasuykiqa, manan allinchu qan kikiykiq hatunchakuyniykiqa.

³Llasan rumiqa, llasallataqmi aqopas, mana yuyayniyoq runaq phiñachisqanmi ichaqa aswan llasaraq.

⁴Sinchi millaymi phiñakuyqa, phoqchiq unu hinan k'arak phiñakuyqa, envidiakuymi ichaqa mana sayachiy atiy.

⁵Aswan allinmi sut'ita phiñariyqa, munakuspa mana ima nispapas niymantaqa.

⁶Amigoqa munakuspan nanaqta k'amiykusunki, awqayki much'aykuqtinmi ichaqa cuidakunki.

⁷Saksasqa runaqa manan miel misk'itaqa munanchu, yarqasqapaqmi ichaqa llapa hayapas misk'i.

⁸Imaynan phalaq animalpas q'esanta saqepun, chay hinan wasinta saqepuq runaqa.

⁹Q'apaq hawinapas inciensopas sonqotan kusichin, amigoq allin yuyaychasqanqa runatan kallpachan.

¹⁰Amapuni amigoykitaqa saqeychu, amallataq taytaykiq amigontapas. Llaki-phutiypi kasqayki p'unchaypiqa ama wawqeykiq wasinta riychu, aswan allinmi sispa wasimasiman riyqa karupi kashaq wawqeqta riymantaqa.

¹¹Churilláy, yachayniyoq kay, hinaspa sonqoyta kusirichiway, chaymi k'amiwaqniyman kutichisaq.

¹²Yuyayniyoqqa mana allin kaqtan reparan hinaspan pakakun, pisi yuyayniyoqkunan ichaqa pasallanku hinaspan k'irisqa rikukapunku.

¹³Wak llaqtayoq runapaq fiakuqpa p'achanta chaskiy, wasanchaq warmipaq fiakuqpa p'acha prendanta waqaychay.

¹⁴Tutallamanta runamasinta kunkayoqta napaykuqqa ñakanmanpas hinapaq hap'isqan kanqa.

¹⁵Paray tiempopi mana thanispa sut'uq hinan ch'aqwaylla-ch'aqwaq warmiqa,

¹⁶payta upallachiyqa wayrata sayachiy munay hinan, aceiteta paña makipi hap'iykuyta munay hinan.

¹⁷Fierrotaqa fierrowanmi filochanku, chay hinatan runataqa runamasin allinyachin.

¹⁸Higos sach'ata cuidaqqa rurusqantan mikhunqa, patronninta cuidaqpas hatunchasqan kanqa.

¹⁹Imaynan uyaqa unupi rikhurin, chay hinan runaq sonqonpas paypa imaynachus kasqanta rikhurichin.

²⁰Wañuy-pachawan Ukhu-pachawanqa manan hayk'aqpas saksanchu, chay hinan runaq ñawinpas munapakushallanpuni.

²¹Crisolpin qolqetaqa ch'uyayachinku, hornopin qoritaqa ch'uyayachinku, runataq hukkunaq hatunchasqanwan reqsichikun.

²²Trigo ch'aqesqa ukhupi huk tunawawanña mana yuyayniyoqta maranpi kutawaq chaypas, manapunin mana yuyayniyoq-kayninqa paymanta lloqsinqachu.

²³Allintapuni yachay ovejaykikunaq imaynachus kashasqantaqa, makilla qhaway oveja t'aqaykikunata.

²⁴Qhapaq kaykunapas manan wiñaypaqchu sayan, coronapas manan wiñaypaqchu kashan.

²⁵Ichhusqa q'achu ch'ikchimuqtinqa, orqokunapi kaq q'achupas q'achusqa kaqtinqa,

²⁶borregoykikunan p'achaykipaq millmata qosunki, orqo cabraykikunan qolqechasqaqa chakra rantinaykipaq kanqa,

²⁷cabraykikunaqa askha lechetan qosunki qanpa ukyanaykipaq, familiaykiq ukyananpaq, warmi kamachiykikunaq ukyananpaqwan.