Read Diospa Simin Qelqa PROVERBIOS 31 Bible Online

PROVERBIOS 31 - Diospa Simin Qelqa bible

PROVERBIOS 31

¹Masa llaqtapi tiyaq rey Lemuelpa siminkuna. Kay simikunataqa mamanmi payman yachachirqan:

²¿Ima nisqaykin wawalláy? ¿Ima nisqaykin sonqo rurulláy? ¿Ima nisqaykin Diosmanta mañakusqay wawalláy?

³Ama kallpaykitaqa warmikunapi tukuychu, amallataq usuchiychu reykunata waqllichiq warmikunapiqa.

⁴Lemuel, manan reykunapaqqa allinchu vino ukyayqa, manallataqmi kamachikuqkunapaqpas allinchu poqosqa vinota munapakuyqa,

⁵paqtan chayta ukyaykuspa kamachikuy simita qonqapunkuman, hinaspa llapa wakchakunaq derechonta waqllichinkuman.

⁶Wañunayashaqman machachikuq ukyanata qoychis, haya sonqoyoqkunamantaq vinota qoychis.

⁷Ukyachunku, hinaspa wakcha kasqankuta qonqachunku, muchusqankutapas amañataq yuyarichunkuchu.

⁸Mana rimarichisqapaq rimaripuy, wikch'usqakunata amachay.

⁹Rimariy, chaninninpi kuskachay, wakchapas k'umuykukuqpas uyarichikuqtin yanapaykuy.

¹⁰Sasan ancha allin warmi tariyqa, umiñakunamantapas aswanraqmi chaniyoq-kayninqa.

¹¹Paymanmi qosanqa sonqollikun, qosanqa imaymanayoqmi kanqa.

¹²Qosanpaqqa tukuy kawsasqan p'unchaykunapin allillantapuni ruwan.

¹³Allin millmatan allin linotan tarimun, k'uchitaqmi llank'an.

¹⁴Payqa negociaqpa barcon hinan, karumantan mikhunata apamun.

¹⁵Tutaraq hatarispan wawankunaman mikhunata haywan, hinallataq warmi uywasqankunamanpas haywan.

¹⁶Chakratan allinta tantean, hinaspa chayta rantin, llank'aspa tarisqanwanmi uvas chakrata ruwan.

¹⁷Mana mancharispan llank'an, kallpasapa kaspan llank'an.

¹⁸Qhawarinmi qhatusqanqa allinyashasqanta, tutakaman llank'anpas.

¹⁹Makinwanmi phuskanpas phillillutapas muyuchin.

²⁰Wakchamanmi qoykun, pisichikuqmanmi yanapaykun.

²¹Rit'iqtinqa manan familianmanta llakikunchu, familianqa llapallanmi phatu p'achawan p'achasqa kashan.

²²Payqa chusikunatan awakun, ñañuy-ñañu linomantawan sani-puka millmamantawanmi p'achakun.

²³Qosanqa llaqta haykuna huñukuna cheqaspi allin reqsisqan kurak runakunawan kuska tiyaykuqtin.

²⁴Payqa lino p'achakunatan awaspa venden, rantiqkunamanmi chumpikunatapas venden.

²⁵Payqa allin kallpayoqmi allin respetanan, manan qhepa p'unchaykunamantapas llakikunchu.

²⁶Yachaywanpunin rimarin, ancha munakuywantaq yachachinpas.

²⁷Familianpa imaynatachus kawsasqantan qhawarin, manataqmi mikhunatapas mana llank'aspachu mikhun.

²⁸Wawankunan sayarispa payta saminchanku, qosanpas paytaqa hatunchallantaqmi:

²⁹Askha warmikunan allinkunata ruwanku, qanmi ichaqa llapankumantapas aswan allinraq kanki, nispa.

³⁰Sonqo suwaq munaycha-kayqa q'otullan, sumaq rikch'ayniyoq-kayqa yanqallan. Señor Diosta manchakuq warmitaqa respetanan.

³¹Ruwasqankunamanta allinwan payman kutichiychis, tukuy ima ruwasqanmanta llaqta haykuna punkukunapi payta hatunchachunku.