Read Diospa Simin Qelqa ECLESIASTÉS 1 Bible Online

ECLESIASTÉS 1 - Diospa Simin Qelqa bible

ECLESIASTÉS 1

¹Predicadorqa Davidpa churinmi, Jerusalenpin rey karqan. Paymi nirqan:

²¡Yanqapunin! ¡Qasipunin! ¡Tukuy imapas tukukuqllan!

³¿Ima allintan runaqa llank'asqanmanta tarin tukuy sasachakuywan kay pachapi llank'aspa?

⁴Wakinmi wañupushan, wakintaq paqarimushan, kay pachan ichaqa kaqllapuni kashan.

⁵Intin lloqsimun, hinaspan haykupun, chaymantataq usqhaylla kutiripun maymantachus lloqsimusqanman, wakmanta lloqsimunanpaq.

⁶Wayran urayman wayramun, chaymantataq wichayman kutirin. Muyu-muyurispan wayraqa kasqan purinallanmantaq kutirinpun.

⁷Mayukunaqa llapallanmi lamar-qochaman haykun, lamar-qochataq manapuni hunt'anchu. Maymantachus mayukunaqa lloqsimun, chayllamantaqmi kutipunku wakmanta phawamunankupaq.

⁸Tukuy imaymanan sinchitapuni runata sayk'uchin, chaykunaqa sinchi askhan mana rimariy atiyraqmi. Manan ñawipas qhawaspa utinchu, manan ninripas uyarispa amikunchu.

⁹Imachus karqan, chayllataqmi kanqa, imachus ruwakurqan, chayllataqmi ruwakunqa, manan kay pachapiqa ima mosoqpas kanchu.

¹⁰¿Imallapas kanchu: Kayqa mosoqmi, ninapaq? Manapunin kanchu, unay watakunamantañan karqan, manaraq kashaqtinchismi karqanña.

¹¹Ñawpa runakunaqa qonqasqañan kapunku, paqarimunqaku chaykunapas, qhepankuta nacemuqkunaq qonqasqallantaqmi kapunqaku.

¹²Ñoqa Predicadormi Jerusalenpi Israel suyu rey karqani.

¹³Tukuy sonqo maskhaspaymi yachaywan t'aqwirqani kay pachapi tukuy imaymana ruwasqata. ¡Diospa runakunaman qosqan llank'anaqa sinchi uma nanaymi!

¹⁴Tukuy imaymana kay pachapi ruwasqakunatan qhawarirqani, tukuy chaykunaqa yanqan, wayrata hap'iykuy hinallan kasqa.

¹⁵Q'ewisqa kaqqa manan kuskachakuyta atikunchu, mana hunt'asqa kaqpas manan yapakuyta atikunchu.

¹⁶Sonqoypin nirqani: Ñoqaqa hatunyaykapunin, Jerusalenpi tukuy ñoqamanta ñawpaqkaq kamachikuqkunamantapas astawanmi yachaykapuni, ñoqan ancha yachayniyoqpas yuyayniyoqpas kani, nispa.

¹⁷Yachaytapas, waq'ayaywan rimaytapas, mana yuyaywan rimaytapas allinta entiendenaypaqmi kallpachakurqani. Chaymi repararqani chaypas wayra hap'iykuy hinalla kasqanta.

¹⁸Askha yachaypiqa uma nanayllapunin kan, astawan yachaqqa, astawanmi muchunqa.