Read Diospa Simin Qelqa ECLESIASTÉS 3 Bible Online

ECLESIASTÉS 3 - Diospa Simin Qelqa bible

ECLESIASTÉS 3

¹Kay pachapiqa imaymanapaqmi tiempo kan, tukuypas maychus kananpin suceden:

²Kanmi nacena tiempo, wañuna tiempopas. Kanmi plantana tiempo, kallantaqmi t'irana tiempopas.

³Kanmi wañuchina tiempo, hampina tiempopas. Kanmi thunina tiempo, perqana tiempopas.

⁴Kanmi waqana tiempo, asikuna tiempopas. Kanmi lutokuna tiempo, tusuna tiempopas.

⁵Kanmi rumi ch'eqechina tiempo, rumi huñuna tiempopas. Kanmi abrazana tiempo, mana abrazana tiempopas.

⁶Kanmi maskhana tiempo, chinkachina tiempopas. Kanmi waqaychana tiempo, wikch'una tiempopas.

⁷Kanmi llik'ina tiempo, sirana tiempopas. Kanmi upallakuna tiempo, rimana tiempopas.

⁸Kanmi munakuna tiempo, cheqnikuna tiempopas. Kanmi hatun maqanakuy tiempo, sumaq kawsay tiempopas.

⁹¿Ima allintataq runari may sasawan llank'asqanmanta tarin?

¹⁰Ñoqan rikurqani Diosqa ruwashanankupaq runakunaman llank'ana qosqanta.

¹¹Diosqa lliwtan tiemponpi sumaq tupaqta ruwarqan. Runamanqa qoykurqanmi wiñay-wiñay kaqkunapi yuyariy atiyta, chaypas runaqa manan llapanta entiendeyta atinchu Diospa qallariymanta tukukuykama ruwasqantaqa.

¹²Ñoqaqa yachanin, kawsashanankamaqa manan aswan allinqa runapaq kanchu, aswanpas kusikunallanmi, allinkaqllatapuni ruwanallanmi.

¹³Diospa qowasqallanchistaqmi mikhunchisña, ukyanchisña, tukuy llank'asqanchiswanña q'ochukunchis chaypas.

¹⁴Yachanin tukuy imapas Diospa ruwasqanqa wiñaypaq kasqanta. Manan chaymanqa imapas yapakunqañachu, manallataqmi pisiyachikunqañapaschu. Chhaynatan Diosqa ruwan runakuna payta manchakunanpaq.

¹⁵Kunan imachus kaqqa karqanñan, hamuq p'unchaypi imachus kanqa, chaypas karqanñan. Diosqa imachus karqanña chaytan kutichimunqa.

¹⁶Kay pachapiqa rikullarqanitaqmi chanin ruwaymantaqa mana chanin ruwaqta, kuskachaymantaqa mana allin ruwaqta.

¹⁷Chaymi sonqoypi nirqani: Chanin runatapas mana chanin runatapas Diosmi juzganqa, tukuy ruwananpaqpas tukuy imapaqpas tiempo kasqanrayku, nispa.

¹⁸Runamantapas sonqoypi nillarqanitaqmi: Chayqa hinapunin, runakunatan Diosqa probashan, paykunaqa animalkuna hina kasqankuta reparakunankupaq.

¹⁹Runapas uywapas kaq tukukapuynillayoqmi: runapas uywapas wañupuqllan, kaqkama kawsay samayniyoqmi kanku. Runaqa manan aswan allinchu uywamantaqa. Tukuy imapas yanqallan.

²⁰Lliwmi kaq cheqasllaman ripun, llapallanmi ñut'u hallp'amanta ruwasqa karqan, llapallantaqmi ñut'u hallp'aman tukupunqa.

²¹¿Pitaq yachan runaq espiritun altoman wicharipusqanta, animalpa espiritunpas hallp'a pacha ukhuman uraykusqanta?

²²Reparanin runapaq aswan allinqa llank'asqanwan kusikunan kasqanta, chaymi paypa tupaqninqa. Manan pipas paymanqa rikuchinqachu wañupusqan qhepata imachus kanantaqa.