Read Diospa Simin Qelqa ECLESIASTÉS 5 Bible Online

ECLESIASTÉS 5 - Diospa Simin Qelqa bible

ECLESIASTÉS 5

¹Dios yupaychana wasita rispaykiqa qhawarikuy maypichus kashasqaykita. Aswan allinqa makilla uyarinaykipaq asuykuymi mana yuyayniyoqkuna hina sacrificiota haywanapaq asuykuymantaqa, paykunaqa manan yachankuchu mana allin ruwashasqankuta.

²Ama hawan-ukhuntaqa rimaychu, ama sonqoykipipas Diosmanqa usqhayllata prometekuychu. Diosqa hanaq pachapin kashan, qantaq kay pachapi kashanki. Chayrayku, rimasqaykiqa pisilla kachun.

³Sinchi llakipakuywanmi mosqopakuypas kan, askha rimasqakunapin mana yuyaywan rimaypas kan.

⁴Diosman prometekuspaykiqa usqhayllata hunt'ay, Diostaqa manapunin mana yuyayniyoqkunaqa kusichinchu. Hunt'ay prometekusqaykitaqa.

⁵Aswan allinmi kanman mana prometekuyniyki, prometekushaspa mana hunt'anaykimantaqa.

⁶Ama simiykiwan huchaman tanqaykachikuychu, aman sacerdotetapas: Prometekusqayqa pantasqan karqan, ninkichu. ¿Imapaqtaq Diosta simiykiwan phiñachiwaq? Paymi makiykiq ruwasqanta waqllichinman.

⁷Ancha mosqopakuylla kan chayqa, askhayanmi yanqa rimasqakunapas. Qan ichaqa Diosta manchakuy.

⁸Mayqen llaqtapipas wakchakuna ñak'arishaqta rikunki, hinallataq chaninchaytapas kuskachaytapas waqllichisqata rikunki chayqa, aman chaywan musphankichu. Hatun kamachikuqtaqa huk aswan hatun kamachikuqmi qhawamushan, chay iskay hatun kamachikuqkunatapas aswan hatun kamachikuqraqmi qhawamushan.

⁹Chaywanpas hallp'aqa tukuypaqmi allin, kikin reypas hallp'aq rurunwantaqmi kawsan.

¹⁰Qolqeman sonqollikuqqa, astawanpunin munan, imaymanayoq kayta munaqpas, astawanraqmi tariyta munan. Chaypas yanqallataqmi.

¹¹Imaymanapas askhayaqtinqa gastaqkunapas askhayallantaqmi. ¿Ima allinninpaqtaq dueñopaqqa kanqa chaykunata qhawariqtin?

¹²Llank'aqqa misk'itan puñun, askhataña pisitaña mikhun chaypas, qhapaqtan ichaqa askha kaqninkuna mana puñuchinchu.

¹³Huk sinchi mana allintan kay pachapi rikurqani: Huk runan qhapaq kaykunata waqaychan, chaykunan mana allinninpaq kapun.

¹⁴Chay qhapaq kaykunaqa mana allin ruwaykunapin usupun, churiyasqan wawanpaqpas manan imapas qhepanchu.

¹⁵Imaynan mamanpa wiksanmanta q'alalla paqarimurqan, ahinallataqmi q'alalla kutipunqa. Manataqmi ima llank'asqantapas apanqachu, mana imallantinmi ripunqa.

¹⁶Kaypas sinchi mana allinmi: Imaynan kay pachaman hamurqan, ahinan kutipunqa. ¿Ima allinninpaqtaq may sasawan yanqapaq llank'asqanri?

¹⁷Hinaspapas, tukuy kawsasqan p'unchaykunapin laqhayaqpi kashan, sinchi llakikuywan, onqoywan, phiñakuywan ima.

¹⁸Kaytan ñoqa repararqani: Runaq kusikuyninqa, q'ochukuyninqa llank'asqanmanta mikhuyninmi, ukyayninmi. Diosmi chayta qorqan pisillata kawsasqan p'unchaykunapi ruwananpaq. Chaymi runaq tupaqninqa.

¹⁹Pi runamanchus Diosqa qon qhapaq kaykunatapas ima kawsaykunatapas chayqa, qollantaqmi chaykunamanta mikhunanpaq, tupaqninta chaskinanpaq, may sasawan llank'asqanmanta kusikunanpaq. Chayqa Diospa qosqanmi.

²⁰Sonqonta Dios kusichiqtinmi, runaqa mana anchatachu yuyarin kawsasqan p'unchaykunata.