Read Diospa Simin Qelqa ECLESIASTÉS 6 Bible Online

ECLESIASTÉS 6 - Diospa Simin Qelqa bible

ECLESIASTÉS 6

¹Huk mana allintan kay pachapi rikurqani, runakunapaq sasa kasqanta:

²Diosmi runaman qon qhapaq kaykunata, kaqniyoq kayta, respetasqa kaytapas, paypaqqa tukuy ima munasqanmi kan, ichaqa Diosmi mana munanchu chaykunawan paypa q'ochukunanta, aswanpas wak runan chaykunawanqa q'ochukun. Chaypas yanqan, khuyay llakikuymi.

³Runaqa pachak wawayoqña kanman chaypas, askha watataña kawsanman chaypas, unay watayoqña kanman chaypas, manataq allinkaqwan q'ochukunmanchu, manataq allin p'ampasqapaschu kanman chayqa, ñoqan nini: Sullusqa wawan chay runamantaqa aswan kusisamiyoq, nispa.

⁴Chay wawaqa yanqapaqmi hamun, tutayaqpitaq ripun, sutinpas laqhayaqpa pakasqanmi kapun.

⁵Manan intitapas rikurqanchu, imatapas yacharqanchu, chaywanpas chay runamantaqa sullusqa wawan aswan allintaraq samakunqa.

⁶Chay runaña iskay waranqa watata kawsanman manataq kaqninkunawanpas q'ochukunmanchu chayqa. ¿Manachu llapapas kaq cheqasllamantaq ripunku?

⁷Runaq tukuy llank'asqanqa mikhunallanpaqmi, chaypas manan yarqayninqa thasnukunchu.

⁸¿Imapitaq yachayniyoqqa mana yuyayniyoqmanta aswan allin? ¿Imatataq wakcha runaqa tarin, runamasinkunaq qayllanpi allintaña purin chaypas?

⁹Aswan allinmi ñawiwan rikuyqa yuyayllapi munapakuymantaqa. Chaypas yanqan, wayra hap'iykuy hinallan.

¹⁰Kunan kaqqa sutiyoqñan karqan, yachakuntaqmi imachus runaqa kasqanpas. Manan mayqen runapas paymanta aswan atiyniyoqwanqa churanakuyta atinchu.

¹¹Cheqaqtapunin askha rimasqapiqa yanqa askha thawtiykuna kallantaq. Chaywanpas, ¿imatan runaqa tarin?

¹²Chay hinaqa, manan pipas yachanchu imachus yanqa kawsaynin p'unchaykunapi runaq allinninpaq kasqanta, chaykunapin payqa llanthu hinalla kawsan. Chayri, ¿pitaq runaman willanqa imachus wañusqan qhepata kay pachapi kananta?