Read Diospa Simin Qelqa ECLESIASTÉS 7 Bible Online

ECLESIASTÉS 7 - Diospa Simin Qelqa bible

ECLESIASTÉS 7

¹Aswan allinmi sumaqpaq hap'isqa kay, q'apaq hawinamantaqa. Aswan allinmi wañukapuy p'unchay nacemuy p'unchaymantaqa.

²Aswan allinmi wañuqpa wasinman riy q'ochukuna wasiman riymantaqa, wañuyqa llapa runaq p'uchukaynin kasqanrayku. Kawsashaqqa chaytan yuyarinan.

³Aswan allinmi waqay asikuymantaqa, llakisqa uyaña kan chaypas sonqonqa kusikunmi.

⁴Yachayniyoqqa wañuypin yuyan, mana yuyayniyoqmi ichaqa kusikuyllapi yuyan.

⁵Aswan allinmi yachayniyoqpa anyaykuyninta uyariy, mana yuyayniyoqkunaq alabasqanta uyariymantaqa.

⁶Mana yuyayniyoqpa asisqanqa q'onchapi p'arararaspa rawraq khiska hinan. Chaypas yanqallataqmi.

⁷Yachayniyoq hukkunata sarunchan chayqa, pisi yuyayniyoqmanmi tukupun, lluk'iykuypas sonqontan waqllichin.

⁸Aswan allinmi imakunaqpas tukukuynin qallariyninmantaqa. Aswan allinmi muchukuq sonqo kay, hatunchakuq sonqo kaymantaqa.

⁹Ama sonqoykipi usqhaylla phiñakuychu, phiñakuyqa mana yuyayniyoqkunaqmi.

¹⁰Aman hayk'aqpas ninkichu: ¿Imanaqtintaq ñawpa p'unchaykunaqa kay p'unchaykunamanta aswan allin karqan? nispaykiqa. Manan chayqa yachaywan tapukuychu.

¹¹Yachayniyoq qhapaq kayqa allinmi, allintaqmi kay pachapi tiyaqkunapaqpas.

¹²Yachayniyoq kaypas qolqeyoq kaypas runatan waqaychan, yachayniyoq kaymi ichaqa runata allinta kawsachin.

¹³Qhawariy Diospa ruwasqanta. ¿Pitaq paypa q'ewisqanta cheqanyachinman?

¹⁴Allinkaq p'unchaypi allinkaqwan q'ochukuy, mana allin p'unchaypitaq allinta qhawariy, Diosmi iskaynintapas paqarichin. Chay hinaqa manan pipas yachanchu qhepaman imapas kanantaqa.

¹⁵Yanqa kawsasqay p'unchaykunapin kay iskayta rikurqani: Kanmi chanin runa, allin kaqkunata ruwashaspa wañupuq, kallantaqmi mana chanin runa, mana chanin kaqkunata ruwashaspa unayta kawsaq.

¹⁶Ama sinchi chanin kasqaykita yuyaychu, ama sinchi yachayniyoqman tukuychu, ¿imanaqtintaq waqllipuwaqrí?

¹⁷Ama sinchi mana allinta ruwaqchu kay, ama mana yuyayniyoqpaschu kay. ¿Imanaqtintaq manaraq wañunaykipi wañupuwaq?

¹⁸Allinmi chanin-kayta hap'iyqa, mana allin kaqtapas mana kachariyqa. Ichaqa Diosta manchakuqpaqmi tukuy imapas allillan kanqa.

¹⁹Yachayqa hamawt'atan aswan atiyniyoqman tukuchin huk llaqtapi chunka kamachikuqkunamantapas astawanraq.

²⁰Kay pachapiqa manan allinkaqllatapuni ruwaq runaqa kanchu, mana hayk'aq huchallikuq chanin runapas manan kanchu.

²¹Ama tukuy imaymana rimasqatapas uyariychu, paqtan kamachiykiq mana allin nisqasuykita uyariwaq.

²²Qanpas allintan yachakunki may askha kutita hukkunamanta mana allin rimasqaykita.

²³Lliw kaykunatan yachaywan t'aqwirqani: Yachayniyoqmi kasaq, nispa. Yachaymanmi ichaqa mana aypayta atirqanichu.

²⁴Imachus kawsay kasqanqa mana entiendey atiymi. Sinchi sasan aypanapaq, manan pipas taripayta atinmanchu.

²⁵Chay hinaqa, entiendeyta munaspaymi tukuy sonqo t'aqwispa maskharqani yachaytapas, imaynachus imakunaq kasqantapas. Hinan yacharqani mana yuyayniyoq-kayqa mana allin kasqanta, millay kawsaypas waq'ayay kasqanta.

²⁶Wañuymantapas aswan millaytaqa waqllichiq warmitan tarirqani, payqa llika hinan, sonqonpas toqlla hinan, makinpas cadena hinan. Diospa sonqonpaq hina allin kawsaqqa manan chay warmiq makinman chayanqachu, huchallapi kaqmi ichaqa llikanwan hap'ichikunqa.

²⁷Predicadormi nin, kaytan tarini: Imaynachus imakunaq kasqantapas yachanaypaqmi sapankata ch'ulla-ch'ullamanta t'aqwirqani.

²⁸Maskhaspaymi manaraq tarinichu, waranqa qharikuna ukhupin huk qharillata tarirqani. Llapa warmikuna ukhupin ichaqa manapuni huk warmillatapas tarirqanichu.

²⁹Kayllatan tarirqani: Diosqa runataqa chanintan ruwarqan, runataq ichaqa askha sasachakuykunata paqarichirqan.