Read Diospa Simin Qelqa ECLESIASTÉS 8 Bible Online

ECLESIASTÉS 8 - Diospa Simin Qelqa bible

ECLESIASTÉS 8

¹¿Pitaq yachayniyoq hinari? ¿Pitaq imakunatapas sut'inchayta yachan? Yachayqa runaq uyantan k'ancharichin, phiña uyantapas llamp'uyachinmi.

²Diospa qayllanpi kasukunaykipaqmi jurarqanki, chayrayku reypa kamachikusqan simitaqa kasukuy.

³Ama usqhayllaqa qayllanmanta ripuychu. Ama mana chanin ruwaykunamanpas haykuychu, payqa tukuy ima munasqantan ruwanman.

⁴Reypa rimarisqantaqa kasullankupunin, manan pipas paytaqa: ¿Imatataq ruwashanki? ninmanchu.

⁵Pichus kamachikuy simita hunt'aqqa manan ima mana allinpipas rikukunqachu, yachayniyoqqa reparantaqmi hayk'aqchus imaynatachus chayta ruwananta.

⁶Tukuy imaymanapaqmi tiempo kan hayk'aqchus imaynatachus ruwanapaq. Chaypas sasa kawsayninmi runataqa ñit'in.

⁷Payqa manan yachanchu imachus qhepaman kananta, manan pipas imayna kananta willaykuqninqa kanchu.

⁸Manan pipas kawsay samayninta hark'ayta atinmanchu, manallataqmi wañuynintapas hark'ayta atinmanchu. Manan pipas wañuywan churanakuyta atinmanchu, manallataqmi millay runataqa millay-kayninpas kacharinmanchu.

⁹Lliw chaykunatan rikurqani kay pachapi tukuy imaymana ruwasqata entiendeyta munaspa, rikullarqanitaqmi runaqa runamasinta mana allinta ruwananpaq munaychakusqantapas.

¹⁰Rikullarqanitaqmi millay runakunata sumaqta p'ampakushaqta. Ch'uya cheqasman kuti t'ikra puriqkunataqmi ichaqa qonqasqa kapurqanku, llaqtankupi chanin kaqkunataña ruwarqanku chaypas. Chaypas yanqallataqmi.

¹¹Mana chanin ruwasqamanta mana usqhaylla huchachay kaqtinmi, runakunaq sonqonqa aswantaraq millay kaqkunata ruwayta munan.

¹²Pachak kutitapas huchasapaqa huchallikuchun, unaytapas kawsachun, chaypas ñoqaqa yachallanitaqmi Diosta manchakuqkunaqa yupaychaqkunaqa allillanpuni kanankuta.

¹³Millay runaqa manan allillanpuniqa kanmanchu, manataqmi unaytapaschu kawsanqa, kawsasqanqa llanthu hinallan, Diosta mana manchakuq kasqanrayku.

¹⁴Huk yanqa kaypas kay pachapi kallantaqmi: chanin runakunan muchun mana chanin runakunapas kankuman hina, mana chanin runakunataqmi kusikunku chanin runakunapas kankuman hina. Ñoqan nini chaypas yanqallataq kasqanta.

¹⁵Chaymi ñoqaqa nini: Q'ochukuymi aswan allin, nispa. Manan runapaqqa kay pachapi allin kay kanchu, aswanpas mikhuynillanmi, ukyaynillanmi, kusikuynillanmi. Chay hinaqa, Diospa payman qosqan kay pachapi kawsasqan p'unchaykunapiqa may sasawan llank'ayña kanqa chaypas, q'ochukuyninqa kashallanqapunin.

¹⁶Manan runata tutapas p'unchaypas puñuy aysanchu, chaymi yachayta entiendenaypaq kay pachapi runaq tukuy imaymana ruwasqantapas rikunaypaq maskhaspa,

¹⁷Diospa lliw ruwasqanta rikurqani. Manan pipas kay pachapi Diospa ruwasqanta entiendeyta atinchu. Runaqa sinchitaña maskhanqa chaypas, manan chayta tarinqachu. Yachayniyoqña ninqa: Chaytaqa yachanin nispa chaypas, manapunin chaytaqa entiendenqachu.