Read Diospa Simin Qelqa ECLESIASTÉS 9 Bible Online

ECLESIASTÉS 9 - Diospa Simin Qelqa bible

ECLESIASTÉS 9

¹Tukuy chaykunata allinta yuyaykuspaymi, sut'ita repararqani chaninkaqkunaqpas yachayniyoqkunaqpas ruwasqankuqa Diospa makinpi kasqanta. Chaypas runaqa manan yachanchu munakuychus cheqnikuychus payta suyashasqanta. Pitapas imapas sucedellanmanmi.

²Chaymi llapatapas kaqtakama suceden: chanin runatapas mana chanin runatapas, allin runatapas millay runatapas, ch'uya runatapas mana ch'uya runatapas, sacrificiokuna haywaqtapas sacrificiokuna mana haywaqtapas, allin runatapas huchallikuqtapas, juraqtapas jurayta manchakuqtapas.

³Kay pachapi tukuy imaymana ruwaykuna ukhupin kay mana allin kan: kaqtakaman llapa runata suceden. Runakunaq sonqonpas mana allinkaqwan hunt'aykusqan kashan, hinallataq sonqonpas tukuy kawsasqan p'unchaykuna waq'ayaywan hunt'a kashan, chaymantataq aya p'ampanaman apapunku.

⁴Kawsaqkunapaqqa kanraqmi suyakuy, aswan allinmi kawsashaq alqo, wañusqa leonmantaqa.

⁵Kawsashaqkunaqa yachankun wañukapunankuta, wañukapuqkunan ichaqa mana imatapas yachankuchu, manañataq imatapas chaskinkuñachu, paykunaqa qonqasqañan kapunku.

⁶Munakuyninkupas cheqnikuyninkupas envidiakuyninkupas tukukapunñan, manañan astawanpas kay pachapi ima ruwanatapas ruwaysikunkuñachu.

⁷Phaway, t'antaykita kusisqa mikhuykamuy, kusisqallataq vinoykitapas ukyaykamuy, Diosqa ruwashasqaykikunatan: “Allinmi”, ninña.

⁸Yuraq p'achallawanpuni p'achakuy, umaykitapas q'apaq aceitewan hawikullaypuni.

⁹Munakusqayki warmiwan kusisqa kawsakuy, kay pachapi Diospa qosqasuyki sapa p'unchay yanqalla kawsayniykipi. Chayllan kay pachapi sayk'uywan llank'asqaykimanta tupaqniykiqa.

¹⁰Imapas ruwanaykipaq kaqtaqa k'uchilla ruway, maymanchus rishanki chay Wañuy-pachapiqa manan ima llank'anapas yuyanapas reqsinapas yachanapas kanchu.

¹¹Kay pachapiqa rikullarqanitaqmi: Manan allin phawaqkunachu phawaspaqa llallinku, manan kallpasapakunachu awqa-tinkuypiqa atipan, manan yachayniyoqkunachu t'antayoqpas, manan allin yuyayniyoqkunachu qhapaqkunapas, manan allin yachaqkunachu sumaq chaskisqapas, aswanpas sapankan imaynapipas rikukunku.

¹²Manan runaqa imayna tiempochus tupamunanta yachakunchu. Imaynan challwakunapas millay llikapi hap'ichikunku, imaynan phalaq animalkunapas toqllapi hap'ichikunku, ahinatan runapas qonqaylla payman chayaqtin millay tiempopi hap'isqa rikukunqa.

¹³Kay pachapiqa kay yachaytapas rikullarqanitaqmi, chaymi hatuntaraq qhawarichiwarqan:

¹⁴Huk huch'uy llaqtallan karqan, chaypitaq pisi runalla karqan. Chay llaqta contrataq atiyniyoq rey hamurqan, hinaspan muyuykuspa haykunanpaq hatun seqanakunata sayarichirqan.

¹⁵Chay llaqtapitaq huk wakcha runa tiyarqan, ichaqa yachayniyoqmi karqan, paymi llaqtata yachayninwan qespichirqan, manataqmi pipas chay wakcha runata yuyarirqanchu.

¹⁶Chaymi ñoqa nirqani: Aswan allinmi yachayniyoq-kay kallpasapa kaymantaqa, nispa. Chaywanpas, wakcha runaq yachayninqa pisicharparisqan karqan, rimasqankunapas mana uyarisqan karqan.

¹⁷Aswan uyarisqan yachayniyoqkunaq samp'alla rimasqan mana yuyayniyoqkuna ukhupi kamachikuqpa qaparkachasqanmantaqa.

¹⁸Aswan allinmi yachayqa maqanakuna armakunamantapas, ichaqa huk runaq pantasqallanmi ancha allinkaqta waqllichin.