Read Diospa Simin Qelqa CANTARES 1 Bible Online

CANTARES 1 - Diospa Simin Qelqa bible

CANTARES 1

¹Salomonpa aswan munay takin.

²Much'aykuwanaykitan munaykushani, munaykukuyniykiqa vinomantapas aswan misk'iraqmi,

³hawinaykikunaq q'apayninmantapas aswan sumaqraqmi. Sutiykita uyariyqa q'apaq hawinata muskhiykuy hinaraqmi. ¡Chaychá sipaskunaqa munakusunkiku!

⁴Pusakuway, ¡phawasunchis! Reyniymi kanki, wasiykiman pusakuway. Qanwanmi q'ochukusaqkupas kusikusaqkupas, munakuyniykitaqa vinomantapas aswantaraqmi yuyarisaqku. ¡Chaychá munakusunkiku!

⁵Jerusalén warmikuna, yanachan kakuni, ichaqa munaychallañan, ch'inneqpi tiyaq Cedar runakunaq karpan hina yanacha, Salomonpa karpanpi cortinakuna hina munayllañan.

⁶Ama qhawaykuwaychischu yanacha kakuqtiy, intiq q'aspasqan kakuqtiy. Turaykunan ñoqapaq phiñakurqanku, hinaspan uvas chakrakuna qhawaqta churaykuwarqanku, ñoqaq chakraytataq mana yuyarikurqanichu.

⁷Willaway, sonqo rurulláy, ¿maypin michishanki? ¿Maypin chawpi p'unchayta ovejakunata puñurachishanki? Paqtan uywakunaq qayllanpi purishaqtiy michiq-masiykikuna yanqa purikuq warmita hina qhawawankuman.

⁸Qanqa llapa warmikunamantapas aswan munaychallañan kanki, maypichus michishasqanta mana yachankichu chayqa, ovejakunaq yupinta qatipay, hinaspa michiqkunaq ch'ukllan qayllapi cabrachaykikunata michikamuy.

⁹Munakusqalláy, qanqa ñoqaqpunin kanki, rey Faraonpa carretan aysaq china caballon hina munaychallañan kanki.

¹⁰¡Ima munaymi uyaykiqa k'achanchasqa simp'akuna ukhupi rikhurin! ¡Ima munaymi kunkaykiqa walqanakunawan sumaqchasqa rikhurin!

¹¹Lliphipinanpaq qolqewan chawpinasqa, qori simp'akunatan ruwachipusqaykiku.

¹²Tiyananpi rey k'iraykusqa kashaqtinmi q'apaq nardo hawinay q'aparirqan.

¹³Munakusqayqa q'apaq mirra khipucha hinan ñoqapaqqa, qhasqollaypin payqa samakushanpas.

¹⁴En-gadi uvas chakrakunamanta apamusqa alheña t'ika mayt'u hinan munakusqayqa kapuwan.

¹⁵Munakusqalláy, ¡ima munaymi kanki! ¡Ima sumaq rikch'ayniyoqmi kanki! ¡Ñawiykipas iskay urpi hinan!

¹⁶Munakusqalláy, ¡ima munaymi kanki! ¡Sumaq sonqo suwan kanki! Puñunanchisqa munay q'omer q'achu hinan,

¹⁷cedromantan wasinchispa kurkunkunaqa, cipresmantan wasi pata k'aspikunapas.