Read Diospa Simin Qelqa ISAÍAS 10 Bible Online

ISAÍAS 10 - Diospa Simin Qelqa bible

ISAÍAS 10

¹¡Ay, qankunamanta, mana chanin kamachikuy simita wakichiqkuna! ¡Runakuna sarunchanaykichispaq qelqa unanchaqkuna!

²¡Ay, qankunamanta, wakchakunapaq chaninchayta hark'akuqkuna! ¡Llaqtaypi muchuqkunaq uyarichikusqanta mana uyarpariqkuna! ¡Viudakunata ch'utiqkuna, mana tayta-mamayoqkunamanta suwaqkuna!

³Juzgasqa kanaykichis p'unchaypiqa, ¿imanankichistaq? Karumanta hatun llakita Dios apamuqtin, ¿imanankichistaq? ¿Pimantaq asuykunkichis: Yanapaykuway, nispa? ¿Maypitaq qhapaq kayniykichistaqa waqaychankichis?

⁴Manachus presokunawan kuska k'umuykachisqa kankichis chayqa, maqanakuypin wañunkichis. Chaywanpas Señor Diospa k'arak phiñakuyninqa manan thanirqanchu, aswanpas: “Muchuchisaqmi”, nishallanpunin payqa.

⁵Señor Diosmi nin: ¡Ay, Asiria suyumanta! Payqa k'arakta phiñakuspa muchuchinay k'aspin, phiñakuspa hoqarinay tawnan.

⁶Paytan kachani huk mana chanin ruwaq llaqtaman phawaykunanpaq, phiñachiwaqniy suyuta qhapaq kayninkunata llat'anaspa qechunanpaq, callekunapi t'uruta hinaraq sarumunanpaq.

⁷Asiria reyqa manan chayta reparanchu, payqa manan chay hinatachu yuyaykukun, aswanpas paypa yuyayninqa askha hatun suyukunata muchuchispa ch'usaqyachiyllan.

⁸Paymi hatunchakuspa nin: Llapan umalliykunaqa reykunakaman kanku.

⁹Ñoqaqa Carquemis llaqtatan atiparqani, hinallataq Calno llaqtatapas, Arfad llaqtatan atiparqani, hinallataq Hamat llaqtatapas, Damasco llaqtatan atiparqani, hinallataq Samaria llaqtatapas.

¹⁰Askha dioskunayoq suyukunatan munaychakurqani, Jerusalenmantapas Samariamantapas aswan askha idolokunayoq suyukunatan munaychakurqani.

¹¹Imaynan Samaria llaqtatapas idolonkunatapas ruwarqani, ahinallatataqmi Jerusalén llaqtatapas idolonkunatapas ruwarqosaq, nispa.

¹²Señor Diosqa Sión orqopipas Jerusalenpipas lliw ruwananta tukuspanmi ninqa: Asiria reytan muchuchisaq, hatunchakuspa, umata hoqarispa, anchaykachaspa ruwasqanmanta.

¹³Paymi nin: Ñoqa kikiypa atiyniywanmi ruwarqani, ñoqaqa yuyaysapan kani, yachaysapa kaspaymi suyukunata qechuspa qorpankunata ch'usaqyachirqani, qhapaq kayninkunatan hap'ikapurqani, huk allin qhari hinan reyninkunatapas wikch'urqani.

¹⁴Llaqtakunaq qhapaq kaynintan atiyniywan hap'ikurqani, llapan hallp'atan hap'ikapurqani, imaynan huk runa q'esanpi wikch'usqa runtukunata hap'ikun hinata, manataqmi pipas raphranta kuyurichiq karqanchu, manallataq chhurunanta kicharispa “chhurr” niqllapas karqanchu, nispa.

¹⁵¿Hachaqa hap'iqnin runamanta aswan munayniyoq kasqanta yuyanmanchu? ¿Sierraqa kuchuqnin runamanta aswan munayniyoq kasqanta yuyanmanchu? Manan huk tawnapas k'aspilla kashaspa, hap'iqnin runataqa kuyuchinchu.

¹⁶Chayraykun Tukuy-atiyniyoq Señor Diosqa millay onqoyta kachamunqa, hinan allin kallpasapa soldadonkunaqa pisimanta pisi unphuyaykapunqa, cuerponkutapas ancha ruphapakuywan rupharichinqa.

¹⁷Israelpa k'anchayninqa ninamanmi tukunqa, Ch'uya Diosqa rawraq ninamanmi tukunqa, hinan suyupi kashaq llapan khiskakunatapas ch'aphrakunatapas huk p'unchayllapi rupharparispa tukukapunqa.

¹⁸Thami sach'a-sach'akunatapas allin ruruq hallp'akunatapas pasaqtan chaqorqarinqa, imaynan millay onqoyqa huk onqosqa runata p'uchukachin hinata.

¹⁹Sach'a-sach'api mallkikunapas sinchi pisillañan qhepanqa, huk erqeq yupay atinan hinallaña.

²⁰Chay tiempopin pisilla qhepaq Israel runakuna, Jacobpa pisillaña qhepaq mirayninmanta kawsashaqkuna, manaña hayk'aqpas muchuchiqninkunamanqa hap'ipakunqakuchu, aswanmi cheqaqtapuni hap'ipakunqaku Israelpa Ch'uya Diosnin Señorman.

²¹Jacobpa miraynin qhepaq runakunaqa pisillan Atiyniyoq Diosman kutirikunqaku.

²²Yaw, Israel llaqta, lamar-qocha aqo hina ancha askhaña kanki chaypas, sinchi pisillañan kutinkichis. Diosmi unancharqan muchuchisqa kanaykichista, chay muchuchiyqa chaninpunin.

²³Tukuy-atiyniyoq Señor Diosmi muchuchiyta unanchanña, chaytan llapan suyukunapi hunt'anqa.

²⁴Tukuy-atiyniyoq Señor Diosmi nin: Sionpi tiyaq llaqtalláy, Asiria runakunataqa ama manchakuychu, Egipto runakuna hinaña varankuwan waqtasuqtiykipas, maqanankuwanña p'anasuqtiykipas.

²⁵Qankunapaq k'arak phiñakuyniyqa thaniykapunqañan, ichaqa k'arak phiñakuyniymi awqaykikunata ch'usaqyachinqa, nispa.

²⁶Tukuy-atiyniyoq Señor Diosmi Asiria runakunataqa hasut'iwan soq'anqa, Madián runakunata Oreb Qaqapi soq'asqanta hina, imaynan varanwan Egipto runakunata ch'usaqyachirqan, chay hinatan Asiria runakunata ch'usaqyachinqa.

²⁷Chay p'unchaymi q'epichisqasuyki q'epita uraykachisunki, much'uykiman yugo churasqasuykipas p'akisqataqmi kapunqa.

²⁸Asiria awqakunan Ahat llaqtaman chayanku, chaymantataq Migrón llaqtaman rinku, Micmas llaqtapitaq q'epinkunata saqenku,

²⁹wayq'ota chimpaspataq Geba llaqtapi puñusun, ninku. Ramá llaqtan khatatatan Saulpa llaqtan Gabaataq usqhaylla ayqekun.

³⁰¡Yaw, Galim llaqta, kunkayoqta qapariy! ¡Yaw, Laisa llaqta, uyariy! ¡Anatot llaqta, imaynaraqmi kanki!

³¹Madmina llaqtan usqhaylla ayqen, Gebim llaqtapi tiyaqkunan pakakunku.

³²Phawaykuq awqaqa kunanpachan Nob llaqtapi sayaykun, chaymantapachan Sión orqopaq k'utupakun, Jerusalenpaq sarupakun.

³³Tukuy-atiyniyoq Señor Diosta qhawariychis, manchay kallpawanmi sach'akunata kumpan, aswan hatun sayayniyoq kaqkunapas wit'usqan urman, aswan alto kaqkunatapas pampamanmi wikch'upun.

³⁴Huk hachallawanmi thami sach'a-sach'ata kumpan, Atiyniyoq Diospa waqtasqanwanmi Libanopi sach'akunaqa urman.