Read Diospa Simin Qelqa ISAÍAS 2 Bible Online

ISAÍAS 2 - Diospa Simin Qelqa bible

ISAÍAS 2

¹Señor Diosmi Amozpa churin Isaiasman Judá suyumanta Jerusalenmantawan kaykunata rikuchirqan.

²Hamuq p'unchaykunapin Señor Diospa wasin orqo aswan hatunkaray kanqa, llapa orqokunamantapas aswan alton kanqa. Llapa suyu runakunan chayman qhochurikamunqaku.

³Askha hatun suyukunan pusarinakamunqaku: Hakuchis, Señor Diospa orqonman wichasun, Jacobpa Diosnin yupaychana wasiman wichasun. Paymi ñanninkunata yachachiwasun, chay ñanninkunatataq purisunchis, nispanku. Sionmantapachan Señor Diospa yachachikuyninta yachachinqaku, Jerusalenmantapachan Señor Diosqa rimanqa.

⁴Señor Diosmi suyukunaq ch'aqwayninta chaninchanqa, askha llaqtaq churanakuynintan t'aqtanqa. Paykunaqa manañan awqa-tinkuypaq yachaqanqakuñachu, manan mayqen suyupas huk suyuwan maqanakunqañachu, espadankumantapas yapuna rejakunatan ruwakapunqaku, lanzankumantapas ichhunakunatan ruwakapunqaku.

⁵¡Jacobpa miraynin llaqtakuna, hakuchis Señor Diospa k'anchayninpi purisunchis!

⁶Señor Diosníy, Jacobpa miraynin llaqtaykiqa inti lloqsimuy lado suyukunaq ruwaynintan askhallataña ruwashanku, Filistea runakuna hinan layqakuykunatapas ruwashanku, mana iñiq wak llaqtakunawantaq rimanakunkupas, chaymi qanqa paykunata saqerparirqanki.

⁷Suyunkupiqa hunt'an kashan qoripas qolqepas, mana yupay atiymi qhapaq illakunapas, hinallataq caballokunapas sinchi askhallaña, maqanakuypaq carretakunapas mana yupay atiyllaña.

⁸Suyunkuqa hunt'allataqmi kashan idolokunawanpas. Runakunaqa paykunaq ruwakusqan dioskunatan yupaychanku.

⁹Paykunaqa huch'uyyachisqan kanqaku, p'enqachisqan kanqaku, chaywanpas ama pampachaychu.

¹⁰Yaw, runakuna, Señor Diospa manchana qayllanmanta atiyninpa lliphlli-kayninmantawan qaqa-qaqakunaman pakakuychis, pampa t'oqokunaman winakuychis.

¹¹Hatunchakuq runakunaqa k'umuykachisqan kanqaku, uma hoqariq runakunaqa huch'uyyaykachisqan kanqaku, chay p'unchaypiqa Señor Diosllan hatunchasqa kanqa.

¹²Tukuy-atiyniyoq Señor Diosmi chay p'unchayqa k'umuykachinqa llapan hatunchakuqkunata, pay-payman tukuq runakunata, llapan anchaykachaq runakunatapas.

¹³Paymi Libanopi sinchi hatun sayayniyoq cedro sach'akunata kumpanqa, Basanpi encina sach'akunata chaqonqa.

¹⁴Alto orqokunata hatun moqokunatawan kuskachanqa.

¹⁵Hatun torrekunatapas allin perqasqa perqakunatapas thuninqa.

¹⁶Lamar-qochanta puriq llapa barcokunatapas, ancha sumaq buquekunatapas unuwanmi millp'uchinqa.

¹⁷Runaq hatunchakuyninmi huch'uyyachisqa kanqa, uma hoqariyninpas k'umuykachisqan kanqa, chay p'unchaypiqa Señor Diosllan hatunchasqa kanqa.

¹⁸Llapallan idolokunataq ch'usaqyachisqa kanqa.

¹⁹Señor Dios kay pachata chhaphchirinanpaq hamuqtinmi, paypa manchana qayllanmanta, atiyninpa lliphlli-kayninmantawan runakuna pakakunqaku, hinaspan qaqa wasikunaman, pampa t'oqokunaman winakunqaku.

²⁰Chay p'unchaymi runakunaqa qori idolonkutapas qolqe idolonkutapas huk'uchakunaman masu huk'uchakunaman wikch'unqaku, chaykunatan paykuna kikinku yupaychanankupaq ruwakurqanku.

²¹Señor Dios kay pachata chhaphchirinanpaq hamuqtinmi, paypa manchana qayllanmanta, atiyninpa lliphlli-kayninmantawan runakuna qaqa k'aktukunaman ayqekunqaku, qaqa wasikunaman winakunqaku.

²²Amaña runaman hap'ipakuychischu. ¿Imataq runari? Kawsayninqa huk samay hinallan.