Read Diospa Simin Qelqa ISAÍAS 29 Bible Online

ISAÍAS 29 - Diospa Simin Qelqa bible

ISAÍAS 29

¹¡Ay, qanmanta Ariel,[5] Ariel llaqta! ¡Ay, qanmanta, Davidpa tiyanan llaqta! Hinalla pasachun iskay kinsa wata imaymana fiestaykikunapiwan,

²chaywanpas ñoqan, Ariel llaqta hawan-ukhun sonqoyoqta ruwasqayki, hinan waqanki llakikunki, qanqa sacrificio ruphachina altar hinan kanki.

³Kikiypunin muyuykusqayki, muyuriqniykimanmi perqata churasqayki, phawaykuspa hap'irqonaypaqmi qenchata churasqayki.

⁴K'umuykachisqan, pampapi mukisqan rimamunki, rimasqaykipas mukisqa ukhumantan uyarikunqa, kunkaykipas hallp'a ukhumantan kukuchiq kunkan hina uyarikunqa, rimasqaykipas ñut'u hallp'a sonqomantan chhiphchisqa hina uyarikunqa.

⁵Ichaqa qonqayllan huk ratomanta huk rato, askhallaña awqaykikunaqa ñut'u hallp'aman tukuchisqa kanqaku, millay ñak'arichiq awqaykikunaqa q'opa hina phukusqan kanqaku.

⁶Tukuy-atiyniyoq Señor Diosmi awqaykikunata muchuchinqa q'aqyaqekunawan, pacha chhaphchiywan, raqhaqaqaywan ima, parantin wayrantin chikchi pukllaywan, nina wach'iypiwan.

⁷Ariel llaqtawan llapan maqanakuq askhallaña llaqtakunaqa llapanmi awqa-tinkuypi, allin perqankunata thunispa phawaykuq llakichiqkunaqa, yanqa mana kaqman, mosqoyman hina tukupunqa.

⁸Imaynan yarqay hap'iqtin mosqopakun mikhunawan, mosqoyninpitaq mikhushan, rikch'arintaq ch'usaq wiksallantin yarqasqalla, imaynan ch'akisqapas mosqopakun unuwan, mosqoyninpitaq ukyashan, rikch'arintaq kaq ch'akisqalla ch'aki kunkallantin, chay hinan kanqa Sión orqo contra maqanakuq mana yupay atiy llaqtakunaqa.

⁹¡Hinalla qankunaqa mana yuyayniyoq kaychis! ¡Hinalla qankunaqa ñawsa kaychis! ¡Hinalla qankunaqa thampiykachaychis ichaqa mana tragollawan! ¡Hinalla qankunaqa machaychis ichaqa mana vinollawan!

¹⁰Señor Diosmi qankuna pataman misk'i puñuyta kachamurqan, profetakunatan ñawinta wisq'aykurqan mana rikunankupaq, rikhuriykunata qhawaqkunatapas uya qatanawanmi pakaykurqan mana entiendenankupaq.

¹¹Qankunapaqmi llapan kay rikhuriykuna kashan allin wisq'asqa qelqa k'uyupi simikuna hina. Pillapas huk leeqman haywarinqa: Leeykuy kayta, nispa chayqa, paymi kutichinqa: Wisq'asqamá kashan, manan leeymanchu, nispa.

¹²Haywarillanmantaq mana leey yachaqman: Kayta leey, nispa chayqa, paypas kutichillanmantaq: Manan yachanichu leeytaqa, nispa.

¹³Señor Diosmi nin: Kay llaqtaqa rimayllankuwanmi qayllaykamuwan, simillankuwanmi yupaychawan, sonqonkutaq ñoqamanta karupi kashan. Yupaychamuwasqanku yupaychayqa runakunaq yuyaykusqan ruwayllan, yuyayninkumanta horqosqallankun, yuyayninkupin hap'iqarqanku kikintakamalla ruwanankupaq.

¹⁴Chayraykun musphana ruwaykunawan huk kutimantawan kay llaqtata musphashaqta saqesaq. Yachayniyoqninkuq yachayninpas yachaysapakunaq yuyayninpas chinkapunqan, nispa.

¹⁵¡Ay, yuyaykusqankunata Señor Diosmanta pakaykuqkuna! Paykunan pakallapi mana chaninta ruwanku, ninkutaq: Manan pipas rikuwasunchischu, manan pipas reparawasunchischu, nispa.

¹⁶¡Ima millaymi kanku! ¿Manka ruwaqwan t'uruwanqa kaqkamachu? T'urumanta ruwasqari ruwaqninta ninmanchu: ¿Manan qanchu ruwawarqanki, nispa? Mankari llut'aqninta ninmanchu: ¿Manan yachankichu ima ruwaytapas, nispa?

¹⁷As pisi p'unchaymantan Líbano sach'a-sach'a orqoqa imaymanaq wiñanan chakraman tukupunqa, kunan imaymanaq wiñanan chakrapas chaywanqa manan tupanqachu.

¹⁸Chay p'unchaypin roqt'uqa uyarinqa mayqenña qelqata leeykapuqtinpas. Tutayaqpi kashaspa laqhayaqpi kashaspa ñawsapas qhawarinqan.

¹⁹Llamp'u sonqokunapas wakmantan Señor Dioswan kusikunqa, wakchakunapas wakmantan Israelpa Ch'uya Diosninwan q'ochukunqa.

²⁰Sinchi ñak'arichiq runakunaqa tukukapunqan, asipayakuqkunapas ch'usaqyapunqan, mana allinlla ruway munaqkunapas wañuchisqan kanqa.

²¹Mana huchayoqta tumpaykuqpas, juezman misk'ana churaqpas, q'otuspakama mana huchayoqta mana uyariy munaqpas, llapallanpunin wañuchisqa kanqa.

²²Chayraykun Abrahamta qespichiq Señor Diosqa Jacobpa mirayninta nin: Kunanmanta hinaneqmanqa Jacobqa manan p'enqasqañachu kanqa, uyanpas manan p'enqakuymanta pukayanqachu.

²³Ruwasqaykunata rikuspan, paykunaman wawakunatapas qosqayta rikuspan ch'uya sutiyta yupaychanqaku. Hinaspan Jacobpa Ch'uya Diosnin kasqayta reqsiwanqaku, ñoqa Israelpa Diosninta manchakuwanqaku.

²⁴Pantachisqa kaqkunaqa yuyayniyoq-kaytan yachapunqaku, chhuchupakuqkunaqa yachachikuykunatan chaskipunqaku, nispa.