Read Diospa Simin Qelqa ISAÍAS 30 Bible Online

ISAÍAS 30 - Diospa Simin Qelqa bible

ISAÍAS 30

¹Señor Diosmi nin: ¡Ay, mana kasukuq wawakunamanta! Paykunan purinku yuyaykusqallankuta manataq ñoqaq yuyaykusqaytachu, hukkunawanmi rimanakunku mana ñoqaq kamachisqallay, chaykunawanmi huchata yapakushallanku.

²Usqhayllaraqmi Egiptoman phawarinku ñoqata mana tapuykuwaspanku, Egipto rey Faraonpa yanapaynintan maskhanku, Egiptoq llanthunpin pakakuyta munanku.

³Faraonqa yanapanasuykitaqa aswan p'enqaymanmi churasunki, Egiptoqa llanthuykunasuykitaqa hatun llakiwanmi ñit'iykusunki.

⁴Hinaña oficialniykikuna Egipto suyu Zoán llaqtapi kashanku chaypas, kachapuriykikunapas Egipto suyuq Hanes llaqtankama chayanku chaypas

⁵llapallankun paykunaqa p'enqasqa rikukunqaku, chay mana imapaq valeq Egipto suyu hawa, chay llaqtakunaqa mana imapi yanapakuqmi, aswanmi p'enqaypi hatun llakipiraqtaq qhepachinpas, nispa.

⁶Neguev ch'inneqpi uywakunamantan Señor Diosqa nin: Sinchi manchakuy llakiy-llaki suyuntan, qaparkachaq leonkunaq tiyasqan cheqasnintan, picaq mach'aqwaykunaq phalaq mach'aqwaykunaq kanan cheqasnintan, qhapaq kayninkuta illankutawan Judamanta kachapurikuna asnokunapi camellokunapiwan apashanku mana imapaq valeq Egipto llaqtaman,

⁷mana ima yanapakuq yanqa kaq llaqtaman, chayraykun sutichani “Mana kuyuriq Rahab”[6] nisqata.

⁸Señor Diosmi niwan: Kunan riy, hinaspa p'alta rumipi kayta qelqamuy, qelqallaytaq qelqana k'uyupi qhepa p'unchayman paykuna contra kashanallanpaq, nispa.

⁹Kay runakunaqa mana kasukuq k'ullullañan kanku, llullakuspalla puriqkunan kanku, Señor Diospa yachachikuynintapas mana uyariy munaqmi kanku.

¹⁰Rikhuriy rikuqkunatan ninku: Amaña rikhuriyta rikuychisñachu, nispa. Profetakunatapas nillankutaq: Amaña cheqaq kawsaymanta willawaykuñachu, aswan sumaq simikunallata willawayku, aswanpas huk-hinanmanta rimapayawayku.

¹¹T'aqarikuychis ñanmanta, cheqaq ñanmantapas pulqariychis, amaña Israelpa Ch'uya Diosninta ñawpaqeykuman churawaychischu, nispa.

¹²Chayraykun Israelpa Ch'uya Diosninqa nin: Qankunaqa manan munankichischu kay willakuytaqa, aswanmi awqanakuyman q'otunakuymanwan hap'ipakunkichis,

¹³chayraykun qankunaqa huchachasqa kankichis, qonqay thunikunanpaq alto perqa yaqrasqa wiksamushaqmanmi rikch'akunkichis.

¹⁴T'urumanta hatun manka hinan hukpaqkama ñut'ullataña p'akikunkichis, manañan imapaqpas allinñachu kankichis, q'onchamanta sansa wisinapaqpas, manallataq unu wisinapaqpas, nispa.

¹⁵Israelpa Ch'uya Apu Señor Diosninmi nirqan: Kutirikamuwaspaykichismi llakhilla kaspaykichismi qespisqa kankichis, thak-kayniyoq kaspaykichismi mak'allikuwaspaykichismi kallpachasqa kankichis. Qankunataq ichaqa mana munarqankichischu,

¹⁶aswanmi nirqankichis: Manan, caballopin ayqekusaqku, nispaykichis. Chay hinaqa, ayqekullaychisyá. Nillarqankichistaqmi: Allin phawaq caballopin ayqekusaqku, nispaykichis. Chay hinaqa phawallaychisyá, ichaqa qatiykachaqniykichisqa aswan phawaqmi kanqa.

¹⁷Huk runa mancharichillaqtinraqmi waranqa runa ayqerikapunqa, phisqa runa mancharichillaqtinraqmi qankunaqa llapaykichis ayqerikapunkichis, moqo patapi saywa hina ch'ullalla qhepanaykichiskama, orqo patapi bandera hina sapallaykichis kanaykichiskama, nispa.

¹⁸Señor Diosmi ichaqa suyashasunkichis anchata khuyapayananpaq, payqa chanintapuni ruwaq Dios kaspan sinchitapuni munashan qankuna khuyapayaykuyta. ¡Kusisamiyoqmi paypi suyakuqkunaqa!

¹⁹Sión orqopi tiyaq Jerusalén runakuna, cheqaqtapunin manaña waqankichischu. Yanapanapaq waqyakuqtiykiqa Señor Diosqa anchatan khuyapayasunkipacha, waqyakuqtiyki hinan kutichimusunkipacha.

²⁰Señor Diosqa hinaña llakikuy mikhuywan, muchuy unuwan ñak'arichisunki chaypas, yachachiqniykiqa manan pakasqachu kanqa, aswanmi ñawiykiwanpuni rikunki.

²¹Purisqaykipi pañamanña lloq'emanña pantanki chaypas, ninriykiwanmi qhepaykipi rimaqta uyarinki: Kayninmi ñanqa, kayninta puriy, nimuqta.

²²Hinan qolqewan k'uyusqa idoloykikunatapas, qoriwan k'uyusqa rikch'ayniykikunatapas qhellita hina cheqnikapunki. Qhelli thantata hinan wikch'upunki: ¡Lloqsiychis kaymanta! nispa.

²³Señor Diosmi parata parachimunqa chakra llank'asqaykiq rurunanpaq, hinan trigoykipas allinta poqospa askhata rurunqa. Chay p'unchaykunan askha pastokuna kanqa uywaykita michinaykipaq.

²⁴Kallanqataqmi askhallaña q'achu qachasqapas, llank'aq toroykikunapaq carga asnoykikunapaqwan, kanchanman k'aspi palawan horkitawan qaranaykipaq.

²⁵Hatun wañuchiy p'unchay chayamuqtinmi, allin perqasqa llaqtakuna thunikuqtinmi, hinantin orqo patakunapi, hinantin moqokunapi mana ch'akiq pukyukuna kanqa.

²⁶Señor Diosqa llaqtanpa k'irinta wataykuqtinmi, paypa k'irisqankunata hampiykuqtinmi, killaq k'anchayninqa intiq k'anchaynin hinaraq k'anchanqa, intiq k'anchaynintaq qanchis inti hinaraq k'anchanqa, qanchis p'unchaypa k'anchaynin huñurqosqa hinaraq k'anchanqa.

²⁷Qhawariychis, haqaytan kikin Señor Diospuni hamushan, sinchi phiñasqa yana phuyu sonqopin chayamushan, siminpas k'arak phiñakuywan hunt'an kashan, qallunpas ruphakuq nina hinan kashan,

²⁸samayninpas patantin phoqchishaq mayu hinan kashan, kunkakamaraqmi aypashan, payqa thuninanpaqmi suyukunata suysun, pantachinanpaqmi llaqtakunaq siminman fierro frenowan churan.

²⁹Qankunataqmi kusikuymanta takinkichis Diospa unanchasqan fiesta tutapi hina, sonqoykichispas kawsarinqaraq imaynan qenata tocaspa Señor Diospa orqonman wichanku hinaraq, imaynan Israelpa pakakunan qaqa hina Dios yupaychaq rinku hinaraq.

³⁰Señor Diosqa atiyniyoq kunkantan uyarichinqa, atiyniyoq makintan k'arak phiñakuywan rikuchinqa, ruphakuq nina rawraywan, illapawan, lloqlla parawan, chikchipiwan.

³¹Señor Diospa kunkanta uyarispanmi, waqtasqantapas chaskispanmi Asiria suyu runakunaqa mancharikuymanta llaksakunqaku.

³²Señor Diosqa Asiria suyu runakunawan maqanakushaspan, tinya tocasqawan arpa tocasqawan tupaqta paykunata muchuchispa waqtanqa.

³³Unay watakunamantañan Asiria suyu reypa ñak'arinanpaq wakichisqa kasharqan huk t'oqo anchollaña ukhullañataq, chaypin kashan ichhu, llant'a, k'aspipiwan, chaytan Señor Diospa samayninqa azufre rawraqta hinaraq rawrachinqa.