Read Diospa Simin Qelqa ISAÍAS 35 Bible Online

ISAÍAS 35 - Diospa Simin Qelqa bible

ISAÍAS 35

¹Ch'inneqpas ch'aki pampapas kusikunqan, wakmanta t'ikarispan q'ochukunqa.

²Hamanq'ay hinan t'ikarinqa, kusikuymanta takispan q'ochukunqa. Diosmi Libanota hina sumaqta llanllarichinqa, Carmelo orqota hinaraq, Sharón pampata hinaraq sumaqyachinqa, llapallan rikunqaku Señor Diospa lliphlli-kayninta, llapallan rikunqaku Diospa hatun-kaynintapas.

³Kallpachaychis makhurkisqa makikunata, takyachiychis liwi-liwi moqokunata,

⁴manchalikunata niychis: ¡Kallpachakuychis! ¡Amaña manchakuychischu! ¡Hamushanñan Diosniykichis qespichinasuykichispaq, awqaykikunataqa muchuchinqan imaynachus muchuchinata hinapuni! nispa.

⁵Hinan ñawsakunapas qhawarinqa, roqt'ukunapas uyarinqa.

⁶Wist'ukunapas taruka hinaraq p'itanqa, upakunapas kusikuymanta takinqa. Ch'inneqpin pukyukuna paqarinqa, ch'aki pampapin askha unu puririnqa.

⁷Ch'inneqpi pariq aqon qochaman tukunqa, ch'aki hallp'apin phullpuq pukyukuna kanqa. Chacalkunaq tiyananpin soqoskuna t'otorakuna wiñapunqa.

⁸Chayninqa ñanmi kapunqa, Ch'uya ñan sutiyoqmi kapunqa, huchasapa runaqa manan chay ñantaqa purinqachu. Mana yuyayniyoqpas manan chay ñantaqa purinqachu.

⁹Manan chaypiqa leonkunapas kanqachu, manan salqa animalkunapas qayllaykamunqachu. Chay ñannintaqa purinqa Diospa qespichisqankunallan,

¹⁰Señor Diospa kamachi-kaymanta horqomusqan kaqkunallan. Sionmanmi wichanqaku kusikuymanta takikuspa, kusikuymanta sonqopas-sonqon tiyashallanqakupuni. Q'ochukuytan kusikuytan tarinqaku, waqaypas llakikuypas chinkapunqan.