Read Diospa Simin Qelqa ISAÍAS 36 Bible Online

ISAÍAS 36 - Diospa Simin Qelqa bible

ISAÍAS 36

¹Chunka tawayoq wata hinaña Ezequías rey kashaqtinmi, Asiria suyu rey Senaqueribqa Judá suyupi llapan allin perqasqa llaqtakunata phawaykuspa dueñochakurqan.

²Laquismantapachan Senaqueribqa Jerusalenpi kashaq rey Ezequiasman kachamurqan huk qollana oficialninta askha soldadokunatawan. Hinan Jerusalenpi huñukurqanku “Hanaq P'uytu” nisqamanta lloqsiq yarqha qayllapi, “T'aqsaqkunaq Hallp'an” nisqaman rina ñan patapi.

³Chaymanmi reypa mayordomon Hilciaspa churin Eliaquim, qelqaqnin Sebna, qelqa waqaychaq Asafpa churin Joapiwan tariparqanku.

⁴Hinan Asiria suyu oficialqa paykunata nirqan: — Rey Ezequiasman willamuychis: Asiria suyu ancha hatun reymi nin: ¿Imamantaq qanqa hap'ipakushanki?

⁵Qanqa ninkin: Maqanakuypaq allin wakichisqan kashani, kanmi askha soldadoypas tupapakunaypaq, nispayki. Chayqa yanqa rimayllan, ¿pimantaq qanri hap'ipakushanki, ñoqa contra sayarispayki?

⁶Egipto suyumanmi hap'ipakushanki, riki. Qhawariy, chay hap'ipakusqayki suyuqa ch'eqtasqa soqos hinan, pipas chayman tawnaykukuqtaqa makintan t'urpuspa patamanraq lloqsin. Chay hinan Egipto rey Faraonqa llapan payman hap'ipakuqkunapaq.

⁷Icha niwankichispaschá: Ñoqaykuqa Diosniyku Señor Diosmanmi hap'ipakuyku, nispaykichis. Qhawariychis, ¿manachu Ezequiasqa Diosniykichis yupaychana cheqaskunatapas altarkunatapas thunipurqan? ¿Manachu Judá runakunata Jerusalén runakunatapas kamachirqan: Jerusalén llaqta altarllapin yupaychankichis, nispa?

⁸Chay hinaqa, Asiria suyu rey wiraqochaymi Ezequiasta nin: Iskay waranqa caballokunata qoykiman chaypas, akis mana iskay waranqa sillakuqkunata churawaqchu.

⁹Chayri, ¿imaynataq qanqa atipawaq huk oficialniyta mana kasuyllaña kashaqtinpas? ¡Qanqa Egiptomanta carretakunata caballería soldadokunallatan qhawarayashanki!

¹⁰Señor Dios kachamuwaqtinmi kay suyu thuniqqa hamuni, mana chayqa manachá hamuymanchu. Paymi kamachiwarqan phawaykunaypaqpas thuninaypaqpas, nispa.

¹¹Hinan Eliaquimqa, Sebnapiwan Joapiwan Asiria suyu oficialta nirqanku: — Valekuykikun arameo rimaypi niwanaykikupaq, yachaykun chay rimaytaqa. Ama hebreo rimaypichu niwayku, perqa patapi kashaq runakunan uyarimushanku, nispa.

¹²Chaymi Asiria suyu oficialqa nirqan: — Wiraqochayqa manan kachamuwarqan reyniykichisman qankunamanwan willanallaypaqchu, aswanpas llaqta muyuriq perqa patapi runakunamanwanmi. Qankunapas paykunapas llapaykichismi hatun hisp'ayniykichista mikhunaykichispaq, unu hisp'ayniykichista ukyanaykichispaqwan nisqaña kashankichis, nispa.

¹³Hinaspan sayaykuspa oficialqa kunkayoqta hebreo rimaypi qaparirqan: — ¡Uyariychis Asiria suyuq hatu-hatun reyninpa nisqanta!

¹⁴¡Ama Ezequiaswanqa q'otuchikuychischu, payqa manan qespichisunkichismanchu!

¹⁵Ezequiaschus Señor Diosman hap'ipakunaykichista munaspa nisunkichisman: Señor Diosmi qespichiwasunchis, payqa manan munanqachu kay llaqtaq Asiria suyu reypa makinman urmaykunanta, nispa chayqa, ¡ama q'otuchikuychischu! nispa.

¹⁶Chay hinaqa, aman kasunkichischu. Asiria suyu reymi nin: Ñoqawan sumaqta rimanakuychis, hinaspa llaqtamanta lloqsimuychis. Sapankaykichistaq uvasniykichista higosniykichista mikhunkichis, p'uytuykichis unutapas ukyankichis.

¹⁷Chaymantataq kay hallp'aykichisman rikch'akuq wak suyuman apasqaykichis, chaypiqa kanmi trigopas, uvaspas, vinopas, t'antapas.

¹⁸Ezequiaschus: Señor Diosmi qespichiwasun, nisunkichis chayqa, ¡ama paywan q'otuchikuychischu! ¿Mayqen suyuq diosnintaq Asiria suyu reymanta llaqtanta qespichiyta atirqan?

¹⁹¿Maytaq Hamatpa diosninkuna, Arfadpa diosninkunapas? ¿Maytaq Sefarvaimpa diosninkunapas? Samariatapas manan qespichiyta atirqanchu atiyniymantaqa.

²⁰¿Mayqen dioskunataq suyunta makiymanta qespichiyta atirqanku? ¿Imaraykun qankunaqa yuyankichis Jerusalenta Señor Diospa qespichinanta? nispa.

²¹Chaymi paykunaqa ch'inlla kakurqanku, mana imata rimarispa, reypa: Aman imaninkichispaschu, nispa kamachisqanrayku.

²²Chaymantataq reypa mayordomon Eliaquimpas, qelqaq Sebnapas, qelqa waqaychaq Joapas llakikuymanta p'achankuta llik'ikuspa Ezequiasman rirqanku, hinaspan Asiria suyu oficialpa nisqanta payman willarqanku.