Read Diospa Simin Qelqa ISAÍAS 38 Bible Online

ISAÍAS 38 - Diospa Simin Qelqa bible

ISAÍAS 38

¹Chay p'unchaykunapin Ezequiasqa sinchitapuni onqoykapurqan. Hinan Amozpa churin profeta Isaiasqa watuykukuq rispa nirqan: — Señor Diosmi nin: Testamentota ruwachikuy, wañukapunkin, manan qhaliyawaqñachu, nispa.

²Chaymi Ezequiasqa uyanta perqaman kutirispa Señor Diosmanta mañakurqan:

³Señor Diosníy, valekuykipunin imaynatachus servisqayta yuyarinaykipaq. Ñoqaqa tukuy sonqon chaninta servirqayki, sonqoykiman chayaqtataqmi ruwarqanipas, nispa. May khuyaytataq waqaykurqan.

⁴Chaymantataq Señor Diosqa kamachirqan Isaiasta:

⁵Phaway, Ezequiasta nimuy, ñawpa taytayki Davidpa Diosnin Señormi nin: Uyarinin mañakuwasqaykita, rikunitaqmi ruwasqaykitapas, chaymi yapaykuyki chunka phisqayoq watatawan kawsanaykipaq.

⁶Qantapas Jerusalén llaqtatapas Asiria suyu reypa makinmantaqa qespichisaqmi. Ñoqan kay llaqtataqa awqanmanta waqaychasaq, nispa.

⁷Señor Diospa rimarisqan hunt'akunanta yachanaykichispaqqa kay señaltan Diosqa ruwanqa.

⁸Intiq purisqanman hinan llanthuqa Ahazpa ruwasqan gradasta uraykunña, chaywanpas paymi intita qhepaman kutichinqa chunka gradasman llanthuq wichanankama, nispa. Hinan intiqa chay nisqanta hinapuni qhepaman kutirqan.

⁹Judá suyu rey Ezequiasmi qhaliyasqanmanta kay takita kamarirqan:

¹⁰— Ñoqaqa yuyarqanin: Kallpayoq kashaspaymi wañupusaq, unay wata kawsayta manaña rikuspan Wañuy-pachaman haykupusaq, nispa.

¹¹Ñoqaqa yuyarqanin: Kay pachapiqa manañachá Señor Diosta rikusaqchu, kay pachapi kawsaqkunatapas manañachá qhawarisaqchu, nispa.

¹²Michiqkunaq ch'ukllan paskasqa hinan kawsayniyqa paskaspa apasqa kapurqan. Kawsayniyqa awa allwisqa q'aytu hinan, Diostaq chaymanta wit'uqapuwaspa k'uyurqapuwan, chay hinapin tuta-p'unchay ñak'arichiwarqan.

¹³Illariq tutantinmi nanaymanta qaparirqani, leonpas tulluykunata k'utushawanman hinaraq, tuta-p'unchaymi Diosqa ñak'arichiwarqan.

¹⁴Khallwakuna hinan waqarqani, urpikuna hinan anchirqani, ñawiypas utiwarqanñan hanaq pachata qhawarayashaqtiy, ¡Señor Diosníy, uyariway! Khuyaytan muchushani.

¹⁵Ñoqari, ¿ima niymantaq? Pay Señor Diospunin chay hinata onqochishawan, paytaq rimapayawarqan. Tukuy p'unchay kawsayniypin k'umuykukuspa purisaq sonqoypi phutikusqayrayku.

¹⁶Señor Diosníy, rimapayasqaykiwan ruwasqaykipiwanmi runaqa kawsan, ñoqapas chaykunawanmi kawsashani, qanmi qhaliyachiwaspa kawsachiwarqanki.

¹⁷Cheqaqtapunin ñak'arisqayqa allinniypaq karqan, munakuwaspaykin aya p'ampanaman rinaymanta hark'awarqanki, llapan huchaykunatataq pampachawarqanki.

¹⁸Aya p'ampanapi kaqkunaqa manañan yupaychayta atisunkikuñachu, wañusqa kaqkunaqa manañan hatunchasunkiñachu, hallp'a ukhuman chinkaykapuqkunaqa manañan hunt'aq-kayniykipi suyakunkuñachu.

¹⁹Kawsaqkunallapunin yupaychaytaqa atisunki, imaynan ñoqapas kunan ruwashani hinata. Taytakunan wawankuman willanku hunt'aq-kayniykimanta.

²⁰Señor Diosmi qespichiwanqa, chay hinaqa arpanchista tocaspanchis takisunchis Señor Dios yupaychana wasipi tukuy p'unchay kawsayninchispi, nispa.

²¹Isaiasqa nirqañan: Higosta kutaspa reypa k'irinman laq'aychis, hinan qhaliyanqa, nispa.

²²Ezequiastaq Isaiasta tapusqa: ¿Imaynapitaq yachasaq Dios yupaychana wasi rinaytari? nispa.