Read Diospa Simin Qelqa ISAÍAS 40 Bible Online

ISAÍAS 40 - Diospa Simin Qelqa bible

ISAÍAS 40

¹Diosniykichismi nin: Llaqtayta sonqochaykuychis, paykunata kusirichiychis.

²Jerusalenta sumaqta rimaykuychis, sut'itapuni payman willaykuychis: Khuyay muchusqaykin tukukapun, huchallikusqaykin pampachasqa kapun, tukuy huchallikusqaykimantan Señor Diosqa anchatapuni ñak'arichirqasunki, nispa.

³Huk kunkan waqyakun: Ch'inneqpi Señor Diospaq ñanta kichaychis, Diosninchispaq purun pampapi purinata wakichiychis.

⁴Llapa wayq'ota hunt'achiychis, llapa orqotapas llapa moqotapas pampayachiychis, p'uktutapas kuskachaychis, khallkatapas llamp'uyachiychis.

⁵Chhaynaqa, Señor Diosmi qhapaq-atiyninpi rikhurimunqa, hinan llapa runa payta rikunqa. Señor Diospunin chaytaqa nin, nispa.

⁶Huk kunkan nin: ¡Waqyakuy! nispa. Ñoqataq tapuykurqani: — ¿Ima nispataq waqyakusaqri? Llapa runaqa qora hinallan, tukuy sumaq-kayninpas campopi t'ika hinallan.

⁷Señor Dios chayman wayrachimuqtinmi qorapas ch'akipun, t'ikapas naq'epun. Runaqa qora hinallapunin, nispa.

⁸Hinan niwarqan: Arí, qorapas ch'akipunmi, t'ikapas naq'epunmi, Diosninchispa siminmi ichaqa wiñaypaq qaqatapuni sayan, nispa.

⁹Sión llaqta, qanqa allin willakuytan apamushanki, orqo pataman wichay willakunaykipaq. Jerusalén llaqta, qanqa allin willakuytan apamushanki, mana mancharispa kunkayoqta waqyakuy. Judá suyu llaqtakunaman willay: ¡Chayamushanñan Diosniykichisqa! nispa.

¹⁰Apu Señor Diosqa atiyniyoqmi chayamushan, atiyninwanmi lliwpi munaychakushan, horqokampusqan llaqtanwanmi hamushan.

¹¹Uywa michiq hinan llaqtanta michin, uñakunatan marq'an, chaykunatan oqllaykun, sumaqllatan qholla uñayoqkunata michin.

¹²¿Pitaq lamar-qochata maki qochanpi tupurqan? ¿Pitaq hanaq pachata makinwan cuartarqan? ¿Pitaq pachantin hallp'ata huk tupunallapi huñuykurqan? ¿Pitaq orqokunata romanapi aysarqan? ¿Pitaq moqokunata balanzapi pesarqan?

¹³¿Pitaq Señor Diospa yuyayninta yacharqan? ¿Pitaq payta yuyaycharqan?

¹⁴¿Piwantaq yuyaychachikurqan? ¿Pitaq payman yachachirqan chaninkaqta ruwayta? ¿Pitaq yachayta payman yachachirqan? ¿Pitaq reparayta payman rikuchirqan?

¹⁵Diospaqqa hatun suyukunaqa unu sut'uy hinallan, balanzapi k'askarayaq ñut'uy-ñut'u hallp'a hinallan. Islakunatapas ñut'u hallp'ata hinallan pesan.

¹⁶Diosman ruphachispa haywanapaqqa manan Líbano orqo-orqopi sach'akunapas altar ninapaqqa aypanmanchu, manallataqmi chaypi kaq animalkunapas aypanmanchu.

¹⁷Llapa hatun suyukunapas ñawpaqenpiqa manapas kanmanchu hinan, paypaqqa manapas kashankumanchu hinan.

¹⁸Chay hinaqa, ¿imawantaq Diosta rikch'anachinkichis? ¿Imaman rikch'akuqtan payta ruwankichis?

¹⁹Metal unuyachiqmi hich'aspa idolota ruwan, qori takaqmi chayta qoriwan qatan, hinaspan qolqe cadenakunata chaypaq ruwapun.

²⁰Wakcha kaspan wakin runaqa mana chay hina idolota ruwayta atinchu, chaymi kuruq mana mikhunan kurkuta akllan, hinaspa allin llaqllaqta maskhan mana kumpakuq idolota ruwananpaq.

²¹¿Manachu yacharqankichis? ¿Manachu uyarirqankichis? ¿Manachu kay pachamantapas willarqasunkichis? ¿Manachu kay pacha kamasqanmantapas entienderqankichis?

²²Diosqa kay pachaq muyun patapin tiyashan, runakunatapas t'isku-t'iskuta hinallan rikun. Paymi hanaq pachata cortinata hina mast'arin, chaytan tiyana karpata hina chutarin.

²³Paymi atiyniyoqkunata mana imaman tukuchin, kay pachapi kamachikuqkunata mana kaqman tukuchin.

²⁴Paykunaqa qholla mallkikuna hinan, chayllaraq mallkisqakuna hina saphichakushaqtillankuraqmi Diosqa chaykunaman wayrachimun, hinan naq'epun, tutuka hatun wayrapas chaykunataqa chhapata hinan apapun.

²⁵Ch'uya Diosmi tapukun: ¿Piwanmi rikch'anachiwankichis? ¿Pin ñoqa hina kanman? nispa.

²⁶Hanaq pachata qhawariychis. ¿Pin chaykunata kamarqan? Ch'askakunata ch'ulla-ch'ullamanta lloqsichimuqmi, sutinmantakama qoyllurkunata waqyamuqmi. Payqa sinchi atiyniyoqmi sinchi kallpayoqmi, manan ch'ullapas faltanchu.

²⁷Jacoblláy, ¿imanaqtintaq quejakunki? Israel-lláy, ¿imanaqtintaq rimanki: Señor Diosqa manan imaynachus kashasqayta reparanchu, Diosqa manañan yuyariwanchu, nispayki?

²⁸¿Manachu yacharqanki? ¿Manachu uyarirqanki? Señor Diosqa wiñay Diosmi, teqsimuyuntinta kamaqmi. Manan payqa sayk'unchu, manan payqa pisipanchu, manan yuyayninmanpas pipas aypanchu.

²⁹Payqa sayk'usqatan kallpachan, pisipaqtapas wakmantan kallpachan.

³⁰Waynakunapas sayk'unmi pisipanmi, kallpasapakunapas peqtunmi urmanmi,

³¹Señor Diospi confiakuqkunan ichaqa wakmanta kallpachasqa kanqaku, anka hinan phalanqaku, phawanqakun, manataqmi sayk'unqakuchu, purinqakun, manataqmi pisipanqakuchu.