Read Diospa Simin Qelqa ISAÍAS 45 Bible Online

ISAÍAS 45 - Diospa Simin Qelqa bible

ISAÍAS 45

¹Señor Diosmi rey kananpaq Cirota hawirqan, paytan paña makinmanta hap'iykuspa nin: Ñawpaqeykipin hatun suyukunata atipani, reykunaq atiynintapas yanqayachini, ñawpaqeykipin llaqta punkukunata kichani kicharayashananpaq.

²Ñoqan ñawpaqeykita risaq, orqokunatan pampayachisaq, bronce punkukunatan p'akisaq, fierro q'ewikunatan chhallusaq.

³Ñoqan pakasqa illakunata qosqayki, pakapi waqaychasqa qhapaq kaykunata qosqayki Señor Dios kasqayta yachanaykipaq, Israelpa Diosnin sutiykimanta waqyasqayta yachanaykipaq.

⁴Kamachiy Jacobta yanapanaykiraykun akllakusqay Israel llaqtata kacharichinaykiraykun sutiykimanta waqyayki, qhapaq sutiwanmi sutichayki qanqa manaraq reqsiwankichu chaypas.

⁵Ñoqan Señor Diosqa kani, manan wakqa kanchu, manan ñoqamanta wak diosqa kanchu. Ñoqan maqanakunaykipaq kallpachayki, qanqa manaraq reqsiwankichu chaypas.

⁶Ñoqan chayta ruwani teqsimuyuntinpi runakuna ñoqallapuni Diosqa kasqayta yachanankupaq. Ñoqan Señor Diosqa kani, manan wakqa kanchu.

⁷Ñoqan k'anchayta k'ancharichini, laqhayaqtapas kamani, ñoqan samitapas rikhurichini, hatun llakitapas paqarichini, ñoqa Señor Diosmi tukuy chaykunataqa ruwani.

⁸Ñoqan hanaq pachamanta chanin-kayta parachimusaq, phuyumantan chanin-kayta parachimusaq. Hallp'a pampan ch'onqanqa, hinaspa qespikuyta ruruchinqa, chaninkaqtapas t'ikachinqa. Ñoqa Señor Diosmi chayta ruwasaq.

⁹¡Ay, Kamaqninwan churanakuqmanta! Payqa k'arpakuna ukhupi k'arpallataqmi. T'uruqa llut'aqninta ninmanchu: ¿Imatan ruwashanki, nispa? Ruwasqanpas ninmanchu: ¿Manan llut'ayta yachankichu, nispa?

¹⁰¡Ay, taytanta: ¿Imapaqmi churiyawarqanki? niqmanta! ¡Ay, mamantapas: ¿Imapaqmi wachawarqanki? nispa qapariykuqmanta!

¹¹Israelpa Ch'uya Diosninmi, Kamaqnin Señor Diosmi nin: Ñoqan imachus qhepaman kananta yuyaykuni, qankunari, ¿wawaykunamantachu tapuwankichis? Icha, ¿imaynata ruwanaypaqchu yachachiwankichis?

¹²Ñoqan kay pachata ruwarqani, chaypin runata kamarqani, ñoqa kikiymi hanaq pachata mast'arqani, llapa ch'askakunatan kamachini.

¹³Ñoqan Cirota paqarichimurqani chanin yuyaykusqayta hunt'anaypaq, maykunantachus purinantan kuskachasaq. Paymi llaqtayta wakmanta perqanqa, kamachipaq apasqa runakunatapas kacharinqa, mana pagotapas qokuytapas chaskispalla. Ñoqa Tukuy-atiyniyoq Señor Diosmi chayta nini, nispa.

¹⁴Señor Diosmi Israelta nin: Egipto suyuq ruruchisqankunan, Etiopía suyuq qhatunankunan, Sabá suyu hatunkaray runakunan qanman chayamunqa, hinaspan qankunaq kapunqa. Chay runakunaqa cadenawan watasqan qhepaykita purinqaku, ñawpaqeykipin qonqorikuspa nisunkiku: Qanllawanpunin Diosqa kashan, manan wak Diosqa kanñachu, nispanku.

¹⁵Israelpa Diosnin, qanmi llaqtayta qespichinki, qanqa mana rikuna Diosmi kanki.

¹⁶Idolota ruwaqkunaqa llapallankun musphachisqa p'enqachisqa kanqaku, llapallankun hatun llakipi rikukunqaku.

¹⁷Israeltan ichaqa Señor Diosqa qespichin, mana p'itiytan yanapashallanpuni, manan hayk'aqpas p'enqachisqachu k'umuykachisqapaschu kanqa.

¹⁸Señormi hanaq pachata kamarqan, paymi Diosqa. Paymi kay pachata ruwarqanpas teqsicharqanpas, manan yanqa kananpaqchu chayta kamarqan, aswanpas runaq tiyananpaqmi kamarqan. Paymi nin: Ñoqallan Señor Diosqa kani, manan wak diosqa kanchu.

¹⁹Manan pakapichu rimarqani, manan tutayaq hallp'a pachapipaschu rimarqani. Manan Jacobpa mirayninta nirqanichu: Maskhawankichisña chaypas, yanqapaqmi kanqa, nispaqa. Aswanpas ñoqa Señor Diosmi cheqaqtaqa rimani, chaninkaqtan willani, nispa.

²⁰Señor Diosmi nin: Hatun suyu runakuna, huñukamuychis, Babilonia suyuq urmaykusqanmanta ayqekuqkuna hamuychis. Mana ima yachaqmi k'ullu idolonkuta wantuqkunaqa, mana yuyayniyoqmi paykunata mana qespichiyta atiq diosmanta mañakuqkunaqa.

²¹Juzganapi rimariychis, pruebakunata willakuychis, llapallaykichis tapunakuychis. ¿Pitaq ñawpamantapacha chaykunata willakurqan? ¿Pitaq unaymantaña chay sucedesqakunata willakurqan? ¿Manachu ñoqa Señor Diosqa willakurqani? Ñoqallapunin Diosqa kani, chanin Diosmi kani, qespichiqmi kani, manan ñoqamanta wak diosqa kanchu.

²²Kay pachantinpi tiyaqkuna, kutimpuwaychis, ñoqan qespichisqaykichis, ñoqan Diosqa kani, manan wakqa kanchu.

²³Sutiypin jurani, cheqaqtapunin rimani: ñawpaqeypin llapa runa qonqorikamuwanqaku, hinaspan kasuwanankupaq juranqaku:

²⁴Señor Diosllapunin atipachinpas kallpachanpas, nispanku. Chay ruwasqayqa hunt'akullanqapunin. Ñoqa Señor Dios contra llapa phiñakuqkunan ñawpaqeyman hamuspanku p'enqakunqaku.

²⁵Ñoqa kaqtiymi Israelpa llapa mirayninqa atipanqa, hinaspan hatunchawanqaku, nispa.