Read Diospa Simin Qelqa ISAÍAS 48 Bible Online

ISAÍAS 48 - Diospa Simin Qelqa bible

ISAÍAS 48

¹Jacobpa ayllun, kayta uyariychis, qankunaqa Israel sutiwan sutichasqan kankichis, qankunaqa Judapa mirayninmi kankichis, Señor Diospa sutinpin jurankichis, Israelpa Diosninmantan mañakunkichis, ichaqa hawa sonqollan manan chaninpichu,

²chaypas nishankichismi: Ch'uya llaqtamantan kayku, Israelpa Diosninmanmi hap'ipakuyku, payqa Tukuy-atiyniyoq Señor Diosmi, nispaykichis.

³Chay hinaqa, Señor Diosmi nisunki: Unaymantañan ñawpa imakunachus sucedenantaqa willakurqani, ñoqan chaykunataqa sut'incharqani. Usqhayllan ruwarqani, hinan hunt'akurqan.

⁴Rumi sonqo kasqaykitan reqsirqayki, kunkaykipas fierro k'aspi hina kasqantan reqsirqayki, mat'iykipas bronce hina kasqantan reqsirqayki.

⁵Chayraykun unaymantaña chayta nirqayki, manaraq sucedeshaqtinmi chayta willarqayki, mana chayqa niwaqmi karqan: Idoloymi chayta ruwarqan, llaqllasqa diosniymi, unuyachisqa rikch'ayniymi chaykunata chayachimurqan, nispa.

⁶Llapantan chaykunataqa uyarirqanki rikurqanki, ¿manachu qanqa chayta ninki: Arí, cheqaqpunin sucedesqanqa, nispa? Kunanmantaqa mosoq sucedenankunatan willasqayki, mana yachasqayki pakasqakunatan willasqayki.

⁷Chaykunataqa kamarishanin, manan ñawpa kaqkunachu, manan ñawpaqqa chaykunamanta uyarirqankichu, chaymi: “Yacharqaniñan”, nispaqa manan niyta atiwaqchu.

⁸Yacharqanipunin mana hunt'aq kasqaykita, nacesqaykimantapacha “mana kasukuq” nisqa kasqaykitapas, chaymi qanqa manapuni chaykunamanta rimaqta uyarirqankichu, manataqmi ninriykitapas kicharirqankichu reparanaykipaq.

⁹Sutiyraykun phiñakuyniyta sonqollaypi pakani, yupaychasqa kanaypaqmi sonqoyta tiyachikuni, ama qanta wañuchinaypaq.

¹⁰Ñoqan ch'uyayachiyki, ichaqa manan qolqeta hinachu, aswanpas hornopi hina ñak'arichispan probayki.

¹¹Ñoqaraykupunin chayta ruwani, sutiytaqa manapunin qhellichanata munanichu, manan pipas ñoqa hina qhapaqchasqaqa kanqachu.

¹²Jacobpa ayllun uyariway, waqyakusqay Israel, uyariway. Ñoqallapunin Diosqa kani, ñoqan ñawpaqkaqpas qhepakaqpas kani.

¹³Makiymi kay pachata teqsicharqan, paña makiymi hanaq pachata mast'arqan, sutinkumanta waqyariqtiymi llapallanku qayllaykamuwanku.

¹⁴Llapallaykichis huñukuychis, hinaspa uyariychis: ¿Mayqen idolonkutaq kay sucedenankunata willakurqan? Munakusqay amigoy Ciron Babilonia contra yuyaykusqayta ruwanqa, Caldea runakuna contran phawaykunqa.

¹⁵Ñoqapunin chayta rimarqani, ñoqan payta waqyamurqani, hinaspan pusamurqani, chaymi paypa ruwasqanqa allinpuni kanqa.

¹⁶Kunanqa Apu Señor Diosmi kachamuwan, hinaspan Espiritunwan hunt'aykuwan. Chayrayku asuykamuwaychis, hinaspa kayta uyariychis:

¹⁷Qespichiqniykichis Señor Diosmi, Israelpa Ch'uya Diosninmi nin: Qallariymantapachaqa manan pakapichu rimarqani, tukuy chaykuna hunt'akuqtinqa chaypin kasharqani. Ñoqan Diosniyki Señor Diosqa kani, ñoqan allinniykipaq yachachiyki, ñoqan purinayki ñantapas pusayki.

¹⁸Kamachikuyniykunallata uyariwaq karqan, thak-kayniykiqa mayu hinan hunt'a kanman karqan, chanin-kayniykipas lamar-qochaq phoqchiqesqan hinaraqmi kanman karqan.

¹⁹Mirayniykiqa aqo hinan askha kanman karqan, wawaykikunaqa ñut'u aqo hinan kanman karqan, ñoqaqa manapunin t'iraykichismanchu karqan, manallataqmi qayllaymantapas chinkachiykichismanchu karqan.

²⁰¡Lloqsiychis Babilonia suyumanta! ¡Ayqeychis Babilonia runakuna ukhumanta! Kusisqa qaparispa teqsimuyuntinman kayta willaychis: ¡Señor Diosmi kamachin Jacobta qespichimun!

²¹Manan unumanta ch'akichikunkuchu, ch'inneqninta paykunata pusashaqtin, unutan paykunapaq qaqamanta phullpuchimun, qaqatan ch'eqtan, hinan unu phawarin, nispa.

²²Señor Diosmi nin: Manan thak kawsayqa millay runakunapaqqa kanchu, nispa.