Read Diospa Simin Qelqa ISAÍAS 49 Bible Online

ISAÍAS 49 - Diospa Simin Qelqa bible

ISAÍAS 49

¹Qocha patapi kaq suyukuna, uyariwaychis, karupi kaq hatun suyukuna, maki uyariwaychis. Señor Diosmi manaraq naceshaqtiy waqyawarqan, mamaypa wiksanpi kashallaqtiyraqmi akllakuwarqan.

²Rimasqaytan filoyachisqa espadata hina ruwarqan, maki llanthunwanmi pakaykuwarqan, ñawch'iyachisqa wach'ita hinan ruwawarqan, hinaspan wach'ina waqaychananpi pakaykuwarqan.

³Niwarqanmi: Israel, qanmi kamachiy kanki, qan hawan hatunchasqa kasaq, nispa.

⁴Ñoqataq nirqani: Yanqan llank'arqani, mana imapaqmi kallpayta tukurqani. Chaypas Señorniymi: “Allinmi”, nispa chaninchawanqa, Diosniymi premiota haywariwanqa, nispa.

⁵Señor Diosmi manaraq naceshaqtiy kamachin kanaypaq ruwawarqan, Jacobpa mirayninta payman kutichinaypaq akllawarqan, ch'eqechisqa Israel runakunata payman huñumunaypaq. Paymi hatunchawanpas kallpachawanpas.

⁶Paymi niwan: Qanmi kamachiyqa kanki Jacobpa ayllunkunata wakmanta sayarichinaykipaq, Israel runakunamanta puchuqta kutichimunaykipaq. Kay llank'anamanqa aswan hatun llank'anataraqmi yapaykusqayki, hatun suyukunata k'anchanaykipaqmi qanta churasqayki, kay pachantin runakuna qespichisqay kanankupaq, nispa.

⁷Señor Diospa kamachinmi hatun suyukunaq pisichasqan cheqnisqan kashan, kamachikuqkunaq kamachinmi kashan, ichaqa Israelta kacharichiq Señor Diosmi, Israelpa Ch'uya Diosninmi payta nin: Akllakurqaykin, ñoqa Señor Diosmi simiyta hunt'ani, chaymi reykuna rikusunkiku hinaspan sayaykunqaku, kamachikuqkuna rikusunkiku, hinaspan k'umuykamusunkiku, nispa.

⁸Wakmanta qanta sumaqta qhawarispaymi uyarisqayki, qespichinaypaq hamuspaymi yanapasqayki. Ñoqan waqaychasqayki, hinan runakunawan sutiypi rimanakunki. Ñoqataq wakmanta suyuta t'ikarichisaq, purunyachisqa hallp'akunata rakisaq.

⁹Presokunatan: Lloqsiychis, nisaq, laqhayaqpi kaqkunatapas: Rikuchikuychis, nisaq. Kutimuspankun llapa ñan patakunapi oveja hina michisqa kanqaku, llapa q'ara orqokunapipas q'achuta tarinqaku.

¹⁰Manan yarqachikunqakuchu ch'akichikunqakupaschu, manan rupha wayrapas intipas paykunata muchuchinqachu, ñoqan paykunata khuyapayasaqpas pusasaqpas, unu pukyukunamanmi paykunata pusasaq.

¹¹Llapa orqokunapin ñanta kichasaq, purinankunapas pampayachisqan kanqa.

¹²¡Qhawariychis! ¡Karumantan hamunku, wakinmi wichaymanta, wakintaq inti haykuymanta, wakintaq Egipto suyupi Sinim llaqtamanta! Señor Diosmi llaqtanta sonqochaykunqa, wakcha runakunatan llakipayanqa,

¹³chayrayku, hanaq pacha, ¡kusisqa takiy! Hallp'a pacha, ¡anchata kusikuy! Orqokunapas, ¡kusisqa qapariychis!

¹⁴Jerusalenmi ichaqa nirqan: Señormi saqerpariwarqan, Diosmi qonqarpariwarqan, nispa.

¹⁵Chaymi Señor Diosqa nin: ¿Warmiqa ñuñusqan wawata qonqanmanchu? ¿Wachakusqan wawata mahipunmanchu? Mamanña qonqapunqa chaypas, manan ñoqaqa qonqasaqchu.

¹⁶Ñoqaqa maki qochaypi marcasqatan hap'isqayki, qhawashallanipunin perqaykikunataqa.

¹⁷Wakmanta perqaqniykikunaqa usqhayllan hamushanku, raqayman tukuchiqniykikunataqmi qayllaykimanta ripunku.

¹⁸¡Muyuriqniykita qhawariy! Llapallankun wawaykikuna huñuykukunku, hinaspan qanman hamusunkiku. Ñoqa Señor Diosmi sutiypi jurani, paykunan sumaq rikch'ayniyoqman tukuchisunki, hinan qanqa sumaqchasqa novia hina kapunki.

¹⁹Hatun suyuykiqa thunisqan kasharqan, soqyayachisqa, purunyachisqa, kunantaqmi thuniqniykikunaqa karupi kashanku, hallp'aykiqa runaykikunapaq huch'uyllan kanqa.

²⁰Manaña kapunanpaq yuyasqayki wawakunapas ninriykimantan rimaykusunkiku: Kay cheqasqa ñoqaykupaq sinchi huch'uyllan, huk cheqasta tiyanaykupaq qowayku, nispa.

²¹Hinan qanqa sonqoykipi ninki: ¿Pitaq kay wawakunatari wachapuwarqan? Ñoqaqa mana wawayoqmi qheparqani, wiksallikuytapas manan atirqanichu, wikch'usqataq t'aqasqataqmi kasharqani, ¿pitaq kaykunatari uywasharqan? Sapallaymi qhepakurqani, ¿maymantataq kaykunari hamunku? nispa.

²²Apu Señor Diosmi llaqtanta nin: Kayqa, hatun suyukunatan kamachisaq, llaqtakunamanmi banderayta rikuchisaq, churiykikunata marq'amunankupaq, ususiykikunatapas q'epimunankupaq.

²³Reykunan wawaykikunaq uywaqen kanqa, reynakunataq uywapuqniykikuna kanqa. Paykunan pampakama ñawpaqeykipi k'umuykukunqaku, chakiykipi hallp'a polvotaraq qallunkuwan llaqwanqaku. Chaymi yachanki ñoqa Señor Diosqa kasqayta, manan p'enqasqachu kanqa ñoqapi suyakuqkunaqa, nispa.

²⁴Llaqtanmi ichaqa nin: ¿Kallpasapa runamantaqa awqa-tinkuypi llat'anasqanta qechuyta atikunmanchu? Icha, ¿muchuchiqpa atiyninmanta huk presota kacharichiyta atikunmanchu? nispa.

²⁵Señor Diosmi nin: Arí, presotaqa kallpasapamanta qechunqakupunin, muchuchiqmantaqa llat'anasqantapas qechunqakupunin. Ñoqan hap'inakusaq qanwan maqanakuqkunawanqa, ñoqan wawaykikunatapas qespichisaq.

²⁶Ñak'arichiqniykikunamanqa kikin aychankutapunin mikhuchisaq, vinowan hinan yawarninkuwanpas machachisaq, chay hinapin llapa runa yachanqa ñoqa Señor Diosqa qespichiqniyki, kacharichiqniyki kasqayta, Jacobpa atiyniyoq Diosnin kasqaytapas, nispa.