Read Diospa Simin Qelqa ISAÍAS 54 Bible Online

ISAÍAS 54 - Diospa Simin Qelqa bible

ISAÍAS 54

¹Señor Diosmi Jerusalenta nin: Mana wiksallikuq warmi kusikuy, qanqa manan hayk'aqpas wachakurqankichu, kunanqa takiykuy, manan hayk'aqpas wachakuy nanaywan hap'ichikurqankichu, kunanqa kusisqa qapariy. Saqerparisqa warmin casarasqa warmimantaqa aswan askha wawayoqraq kanqa.

²Tiyasqayki karpata hatunyachiy, ama mich'akuspa karpaykiq qatanankunata yapay, waskhaykikunata hatunyachiy, takarpuykikunata allinta takaykuy.

³Mast'arikunkin pañamanpas lloq'emanpas, hatun suyukunatan mirayniykikunaqa qarqonqaku, purunyachisqa llaqtankupipas tiyanqakun, nispa.

⁴Ama manchapakuychu, manan p'enqachisqachu kanki, ama pukamanraq tukuychu, manan k'umuykachisqachu kanki, aswanpas sipas kashaspa p'enqachisqa kasqaykitan qonqapunki, viuda kashaspa k'amisqa kasqaykitapas manañan yuyarinkichu.

⁵Kamaqniykiqa qosaykin, Tukuy-atiyniyoq Señor Diosmi sutinqa, Israelpa Ch'uya Diosninqa kacharichiqniykin, kay pachantinpa Diosninmi sutinqa.

⁶Diosniykin nisunki: Qanqa sipasllaraqmi casarakurqanki, hinaspan wikch'usqa kapurqanki, chaymi wikch'usqa llakisqa sonqoyoq warmita hina waqyamushayki.

⁷Huk ratollan wikch'urqayki, anchata khuyapayaspaytaqmi hoqarikapuyki.

⁸K'araktapuni phiñakuspaymi huk ratolla qanmanta pakaykukurqani, ichaqa wiñaypaq munakuspaymi llakipayashayki. Kacharichiqniyki Señor Diosmi chayta niyki.

⁹Noepa p'unchayninkunapin jurarqani manaña astawanpas hallp'a pachata unu millp'unanpaq, chay hinatan kunanpas jurani manaña qan contra phiñakunaypaq, manaña qanta phiñarinaypaq.

¹⁰Orqokunapas kuyurinmanmi, moqokunapas thunikunmanmi, qantan ichaqa munakushallasqaykipuni, sumaq kawsanaykipaq rimanakusqaytapas hunt'ashallasaqmi, nispa. Khuyakuqniyki Señor Diosmi chayta nin.

¹¹Señor Diosmi nin: Jerusalén llaqta, llakichisqan, llakiq ñit'isqanmi kashanki, manan pipas sonqochaykurqasunkichu. Ñoqan ichaqa allinkaq teqsipi perqasqayki, anqas umiñakuna patapin teqsichasqayki.

¹²Torreykikunatan puka-sansaq umiñakunawan perqasaq, punkuykikunatan k'anchaq umiñakunamanta ruwasaq, llapa perqaykikunatapas chaniyoq rumikunawanmi perqasaq.

¹³Llapa wawaykikunatan ñoqaqa yachachisaq, paykunataq ancha allintapuni kawsanqaku.

¹⁴Chanin-kayta ruwaspan allinta sayanki, manañan muchuchisunkiñachu, manañan manchapakunkiñachu, manapunin imapas manchachisunkiñachu.

¹⁵Manan ima awqatapas qan contra kachamusaqchu, chhaynaqa, pipas awqayki sayariqqa atipasqan ñawpaqeykipi urmanqa.

¹⁶Ñoqan herrerota kamarqani k'illimsa sansa phukuqpaq, paymi maqanakunapaq armata ruwan. Ñoqallataqmi soldadotapas kamarqani hukkunata atipananpaq,

¹⁷ichaqa manan ima ruwasqa armapas imanasunkipaschu, llapa huchachaqniykitapas upallachinkin. Chaytan kamachiykikunapaq ruwani, chay hinatan atipachishani, nispa. Señor Diosmi chay hinatapuni nin.