Read Diospa Simin Qelqa ISAÍAS 57 Bible Online

ISAÍAS 57 - Diospa Simin Qelqa bible

ISAÍAS 57

¹Chanin runakunan wañunku, manataq pipas chayta kasunchu, Dios sonqo runakunapas wañunkun, manataqmi pipas entiendenchu, llakiq qayllanmanta chanin runaq karunchasqa kasqanta.

²Chaninta kawsaqkunaqa aya p'ampanapin samakunku, thak-nisqataq kanku.

³Qankunan ichaqa layqakuna kankichis, qhelli huchapi puriqkunan wasanchaqkunan kankichis, chayrayku juzganaman hamuychis.

⁴¿Pitataq asipayashankichis? ¿Pitataq pisichankichispas k'aminkichispas? Qankunaqa huchasapakunan llullakunan kankichis.

⁵Llapa encina mallki k'uchupi, llapa k'allmasapa sach'a chakipi idolokunata yupaychaspan t'inkikunkichis. Mayu patakunapi qaqa k'aktukunapi wawakunata wañuchispa idolokunaman haywankichis.

⁶Qankunaqa chaypi kaq llusk'a rumikunata akllakuspan idolokunaman tukuchinkichis yupaychanaykichispaq. Chaykunamanmi vinota ch'uyashankichis, ruru ofrendatapas haywashankichis, ñoqari, ¿chaykunata hinallatachu qhawasaq?

⁷Hatunkaray orqo patapin puñunaykita mast'arqanki, chaymanmi sacrificiokunata haywanaykipaq wicharqanki.

⁸Punku qhepapin idolokunata churakurqanki. Qonqapuwarqankin, p'achaykitan ch'utikurqanki, hinaspan pi munasqaykiwan puñunaykipi siriykurqanki, qanwan puñunankupaqmi paykunaman pagarqanki, paykunawanmi anchatapuni qhellichakurqanki.

⁹Hawina aparisqan Moloc idoloman rirqanki, askha q'apaqkunatan payman aparqanki. Kachapurikunatapas karumanmi kacharqanki wak dioskunata maskhamunankupaq, Wañuy-pachakamaraqmi paykunataqa uraykachirqanki.

¹⁰Sinchita purispaykin sayk'urqanki, manataqmi nirqankichu: Saqepusaq, nispaykiqa. Aswanpas wakmantan kallpachakurqanki, chaymi mana pisi kallpayarqankichu.

¹¹¿Pitan manchakunkipas yupaychankipas mana iñiwanaykipaq mana yuyariwanaykipaq, chaykunata mana reparanaykipaq? Unayñan upallakurqani, ¿chaychu mana manchakuwanki?

¹²Qanqa chanin kawsasqaykipaqmi yuyakunki, ñoqataqmi ruwasqaykikunata sut'inchasaq, diosniykikunaqa manan yanapayta atisunkichu.

¹³Waqyakuqtiykiqa, manan idoloykikunaqa qespichisunkichu, llapallankutan wayraqa apanqa, hukllatan chaykunataqa phukurparinqa. Ñoqaman hamuqmi ichaqa kay suyuta hap'ikapunqa, ch'uya orqoytapas hap'inqa.

¹⁴Señor Diosmi nin: Allin allichasqata ñanta ruwaychis, misk'anakunata llaqtaypa pasananpaq wikch'uychis.

¹⁵Ñoqan Ancha Hatun Diosqa kani, ñoqan Ch'uya Diosqa kani, ñoqan wiñaypaq kawsaqqa kani. Ñoqaqa hanaqpin, ch'uya cheqaspin tiyani, chaypas huchanta reqsikuqwanmi k'umuykukuq sonqoyoqwanmi kashani, k'umuykukuqkunata kallpachanaypaq, huchankuta reqsikuqkunaq sonqontapas kawsarichinaypaq.

¹⁶Manan wiñaypaqchu llaqtaytaqa muchuchisaq, manan wiñaypaqchu phiñakusaq, paqtan kamasqay runakunaqa ñawpaqeypi pisi kallpayankuman.

¹⁷Munapakusqanraykun phiñakurqani, muchuchirqanin, phiñakuspaymi saqerparirqani, paymi ichaqa mana kasukuspa sonqonwan aysachikurqan,

¹⁸ñoqataqmi imayna purisqanta rikurqani, chaypas paytaqa qhaliyachisaqmi, paytaqa pusaspaymi sonqochasaq, wañuqmanta llakikuqkunatapas kusisqatan takichisaq.

¹⁹Karupi kaqkunatapas qayllapi kaqkunatapas: ¡Thak-kay qankunapaq kachun! nisaqmi, llaqtaytaqa qhaliyachisaqmi, nispa.

²⁰Lamar-qochaqa mana thanispan aytin, ununmi t'uruta qhellitawan wikch'umun, chay hinan millay runakunaqa kanku.

²¹Millay runakunapaqqa manan thak kawsayqa kanchu, nispan nin Diosniyqa.